1. Ngowapi mupango wakajeka wakapa Jesu ku vajiji vake? (Vonanyi pikica yo pakapa.)

PA USIKU acito afa, Jesu wakapa mupango wakajeka ku vajiji vake. Iyena wakati: “Kudari ngo bzo ndakamuda, imwimwivo mudisane ngo cenyu.” Woengejera eciti: “Mukaita kudaro vese vanozoziva kuti muri vajiji vangu: mukadisana ngo cenyu.”—Johani 13:34, 35.

2. Ngenyi kudisana kunosisira?

² Jesu wakananga kuti taizozivika inga vajiji vake kudari tikakhombija rudo wakatatijwaya ndiyena. Magama aya, aacaishandira basi ku vajiji vake vo muzana ro kutanga ro makore, anoshandavo kwatiri nyamasi uno. Ngo ndava yazvo, tinodikana kudisana pikija pazvinonga zvecinesa.

3. Tinozojijenyi pa musoro uno?

³ Ku vandhu vacizivi kukwana zvinganesa kukhombija rudo ku vamweni. Asi tinodikana kueja kutevejera Kristu. Pa musoro uno, tinozojija kuti kuitisa kudini rudo unotibesera kuti tive no runyararo, kuti titame kuva no mukheto zve tova vandhu vanoashira vamweni. Pamunonga mecijija musoro uu, jivhunjisenyi kudari: ‘Ndinojijenyi ku hama no hambzaji jakaenderera mberi jecikhombija rudo ku umwe no umweni pikija no zvineso?’

4. Mukuzwirana na Mateu 5:23, 24, ngenyi tinodikana kuita runyararo no hama yakanyangajwa ndisu?

⁴ Jesu wakatijijisa kuti kudari hama iri yese yakanyangajwa ndisu, tinodikana kueja kuita runyararo. (Verenganyi Mateu 5:23, 24.) Iyena wakanangazve kuti tingakwanisa kudakajisa Mwari,  kudari tikava no ushamwari waushoni no vamweni. Jehovha anodakara maningi patinoita zvese zvatinokwanisa kuti tive no runyararo no hama jedu. Ngo divi rimweni, tikaviga bundu ku hama imweni kana kutoramba kuita runyararo nayo, Jehovha aazotenderi kunamata kwatinomuita.—1 Johani 4:20.

5. Ngenyi zvakanesa kuti hama imweni iite runyararo?

⁵ Kuita runyararo kunganesa nguva jimweni. Ngenyi? Vonanyi basi zvakaitikira hama Marko. * Hama imweni, yakashora hama Marko zve yakavereketa zvakashata ngo pamusoro pavo no hama jimweni mu ungano. Hama Marko vakaitenyi? Ivona vakati: “Ndakamukira kubararika hwiru zve ndakatukana nayo.” Asi pa kufamba ko nguva hama Marko vakazozvidemba ngo zvovakaitaro. Ivona vakaeja kookumbira kuregerehwa ngo hama iya no kuita runyararo nayo. Asi, hama iya yakaramba kuregerera hama Marko, yoenderera mberi yakanyangajwa. Izvo, zvakaita kuti hama Marko varangarire kudari: ‘Iyona aidi kuita runyararo na inini, waro ngenyi ndinodikana kueja kuisembezera basi?’ Ndiyena ari kuramba kuita runyararo. Asi muvonereri wo ndharaundha wakabesera hama Marko kuti vatame kuremba. Hama Marko vakaitenyi?

6. (a) Hama Marko vakaeja kuitenyi kuti vaite runyararo? (b) Hama Marko vakashandisa kudini zvinowanika pana VaKolosi 3:13, 14?

⁶ Hama Marko povakasotesesa mugariro wavo, vakazwisisa kuti vaidikana kuva mundhu anojidodokesa ngokuti vairangarira kuti nguva jese ivona vainga no razau. Vakazwisisa kuti vaidikana kucinja. (VaKolosi 3:8, 9, 12) Ngo kujidodokesa kwese, ivona vakaenda koobhuya no hama iya kocipiri vecikumbira kuregerehwa. Vakatara karata vopa hama iya vecinanga kuti vari kuzvidemba ngo zvovakananga zve vaidazve kuva no ushamwari nayo. Ivona vakatotenga zviri zvese kuti vapekeje hama iya. Zvinosuruvarisa ngo zvokuti, hama iya yakaenderera mberi no yakanyangajwa. Pikija zvakadaro, hama Marko vakaenderera mberi  vecizwira mupango wa Jesu wo kuda hama jedu no kujiregerera. (Verenganyi VaKolosi 3:13, 14.) Inga zvakaitikirari hama Marko, zvingaita kuti pikija no kuvangisira kwenyu, hama yoramba kuita runyararo nemwi. Asi rudo hwo Cikristu unozomubesera kuti muregerere hama yenyu no kuita mukumbiro kuti shwiroyo ipere ushoni.—Mateu 18:21, 22; VaGalàsia 6:9.

7. (a) Jesu wakativangisa kuti tiitenyi? (b) Hambzaji Rara vakasongana no mugariro wapi unonesa?

⁷ Jesu wakativangisa kuti titaje vamweni ngo manera atinoda kutajwa. Zve wakaengejera ecinanga kuti atidikani kuda basi vaya vanotida. (Luka 6:31-33) Pikija ativeteri kuti izvi zviitike, zvingaita kuti hama yakati kuti mu ungano yotanga kutinyenya, kana kutotama kuticungamija. Tinozoitenyi? Hambzaji Rara vakasongana no mugariro uwu. Ivona vakati: “Hambzaji imweni yakatanga kunditaja mu njira yakasiyana, asi andicaizviziva kuti ngenyi yaiita kudaro. Izvo zvakandisuruvarisa maningi zve ndaienda kumusongano ndakanyangajwa.” Pakutanga, hambzaji Rara vakarangarira kudari: ‘Andina ndava inini. Pikija hama jimweni jo mu ungano jinovonavo kuti hambzajiyo airipi ushoni.’

8. Hambzaji Rara vakaitenyi kuti vaite runyararo zve tinojijenyi ngo muezaniso wavo?

⁸ Hambzaji Rara vakaita mudanyu jinodikana kuti vaite runyararo nayo. Ivona vakaita mukumbiro kuna Jehovha, vosunga kwenda kobhuya no hambzajiyo. Ivona vakabhuya ngo pamusoro po shwiroyo, vokumbatirana votoita runyararo. Zvaidari inga kuti zvese zvainga zviri ushoni. Hambzaji Rara vakati: “Pa kufamba ko nguva, hambzaji iya yakatakangazve kunditaja mu njira yakasiyana. Zvakandirembesa maningi!” Pakutanga, hambzaji Rara vairangarira kuti vaizova no mudakaro, kudari hambzaji iya ikacinja murangariro wayo. Pejisire hambzaji Rara vakazwisisa kuti, vaidikana kwenderera mberi vecikhombija rudo ku hambzaji iya no kuiregerera. (VaEfeso 4:32–5:2) Izvi zvakavaita kuti vaceukije kuti rudo hwokadi hwo Makristu “ahugari no runya. Hunokungurira bzese, hunotenda bzese, hunovetera bzese, hunovangirira ku bzese.” (1 VaKorinto 13:5, 7) Ngo kudaro, vakatangazve kuva no runyararo hwo mukati. Pakufamba  ko nguva, hambzaji iya yakatanga kutaja ushoni hambzaji Rara. Pamunopsaka kuva no runyararo no hama no hambzaji jenyu, moenderera mberi mecivada, mungava no cokwadi co kuti “Mwari wo rudo no wo rugarisiko anozogara nemwi.”—2 VaKorinto 13:11.

9. Mukuzwirana no Maitiro o Vapostori 10:34, 35, ngenyi atidikani kuva no mukheto?

⁹ Jehovha asipi mundhu ano mukheto. (Verenganyi Maitiro o Vapostori 10:34, 35.) Patinonga ticina mukheto, tinokhombija kuti tiri vana vake. Tinozwira mbhangiro yo kudisa mudoni wedu inga madisiro otinojiita zve tinovangisira kuti tiite runyararo no hama no hambzaji jo muungano.—VaRoma 12:9, 10; Jakobo 2:8, 9.

10-11. Hambzaji Rute vakaitenyi kuti vanyise mazwiro avo?

¹⁰ Ku vamweni, azvizivi kureruka kutama kuva no mukheto. Inga muezaniso, vonanyi zvakaitika na hambzaji Rute. Povaiaruka, mbhuri yavo yakaitihwa zviro zvakashata ngo mundhu wo nyika imweni. Izvi zvakavapsasisa kudini? Ivona vakati: “Inini ndainyenya zvese zvaivha ku nyika yondhoyo. Ndairangarira kuti vandhu vese vo nyika yondhoyo vainga vakadaro, kubatanijavo hama no hambzaji.” Hambzaji Rute vakaitenyi kuti vanyise mazwiro ondhowo?

¹¹ Hambzaji Rute vakavona kuti vaidikana kushanda ngo simba kuti vasiye murangariro wovainga nawo. Ngo kudaro, vakatanga kuverenga zviitiko no ripoti jo munyikemo mu Bhuku Regore. Ivona vakati: “Ndakavangisira kuti ndivone vandhu vo munyikeyo mu njira yaushoni. Ndakatanga kuvona kuti hama no hambzaji jo munyikemo jaivangisira maningi pa kushandira Jehovha. Zvakazojeka kwandiri kuti ivona vanoitavo divi ro ukama hwedu hwo nyika yese.” Pakupera po mukuvo wakati kuti, hambzaji Rute, vakazwisisa kuti vaidikana kukhombija rudo hwavo. Ivona vakati: “Pandaisongana no hama no hambzaji jo nyika yondhoyo, ndaivangisira kuita ushamwari navo. Kubhuya naivona zvaindiita kuti ndinase kuvaziva.” Kuvangisira uku kwakabesera here? hambzaji Rute vakadavira kudari: “Pa kufamba ko nguva, mazwiro angu akangara-ngara.”

12. Ngocapi cineso cakasongana na hambzaji Sara?

¹² Vamweni vangava no mukheto vacikazvizivi. Inga muezaniso, hambzaji Sara, vaijivona inga vacina mukheto ngokuti avacashorepi vamweni ngo ndava yo ganda ravo, dangani vano mare kana haiwa kana mutoro jo muungano. Asi ivona vakati: “Ndakatanga kuvona kuti ngo mukati ndainga no mukheto.” Kuitisa kudini? Hambzaji Sara vakakurira pa mbhuri yakajija maningi, ngo kudaro, vaida kushamwarijana no vandhu vakajijavo maningi. Pa vhaza imweni, vakatovhunja shamwari yavo kudari: “Ndinoshamwarijana basi no hama jakajijavo. Vaya vacizivi kujija ndinovasiya pa mutivi.” Zvakajeka kuti, hambzaji Sara vaidikana kucinja murangariro wavo. Vakazviitisa kudini?

13. Tingajijenyi ngo cinjo yakaita hambzaji Sara?

¹³ Muvonereri umweni wo ndharaundha wakabesera hambzaji Sara kuti vacinje murangariro wavo. Hambzaji Sara vakati: “Vakandisimba ngo kushanda kwangu ndakagondeka, no kupingura kondaiita pa musongano no zivo yandinayo yo Bhaibheri. Vonangazve kuti uzivi hwedu pahunoengejeka, tinodikanavo kusakurira mavara o Cikristu inga kuzvidodokesa, kujibata no kuzwira unyasha.” Hambzaji Sara vakabatisisa zvakabhuyaro muvonereri wo ndharaundha. Ivona vakati: “Ndakavona kuti zvinosisira maningi, kuva no unyasha no rudo.” Inga muviyo, hambzaji Sara vakatanga kuvona hama no hambzaji jiya mu njira yakasiyana. Ivona vakati: “Ndakaeja kuvona kuti ngojapi mugariro jinoita kuti hama jive jinosisira kuna  Jehovha.” Itusuvo keni? Atidikani kutendera kuti kujija kotakaita, kutiite kuti tijivone inga tinosisira maningi kupinda vamweni. Kudari ‘tikada hama’ jedu, mukheto auzovi no ndau mu mwoyo mwedu.—1 Pedru 2:17.

14. Mukuzwirana no Vaheberi 13:16, Jehovha anozwa kudini patinoashira vamweni?

¹⁴ Jehovha anodakara paanotivona teciashirana ngo cedu. (Verenganyi Vaheberi 13:16.) Iyena anozvivona inga divi ro kunamata kwedu, maningi-ningi patinobesera hama jedu. (Jakobo 1:27; 2:14-17) Nga izvo zvinoitisa kuti Bhaibheri ritivhunje kudari: “Axiranyi vafambi nguva yese.” (VaRoma 12:13) Kuashira vafambi kunokhombija kuti itusu tinoda hama jedu zve tinoda kuva shamwari javo. Jehovha anodakara maningi patinopa mundhu zvokucenga-cenga, ica, saja kana nguva yedu no kumupurukira. (1 Pedru 4:8-10) Pikija zvakadaro, pano zviro zvingaitisa kuti zvinese kuashirana ngo cedu.

15-16. (a) Ngenyi vamweni avajizwi vakasujunuka kuti vaashire varendo? (b) Zvicinyi zvakabesera hambzaji Edhiti kuti vadakarire maningi kuashira varendo?

¹⁵ Kangaije atijizwi takasujunuka kuti tiashire vamweni, ngo ndava yo mugariro wedu. Vonanyi muezaniso wo noni inozwi Edhiti. Icito yajija cokwadi, iyona aicaidakarira kushamwarijana no vamweni. Iyona yairangarira kuti vamweni ngo vainga no mugariro waivatendera kuashira varendo.

¹⁶ Pavakapera kujija cokwadi, vakacinja manera avo o kurangarira. Vakaita zviri zvese kuti vaashire vamweni. Ivona vakananga kudari: “Nyumba yedu yo Umambo poyainga icivakwa, umwe mukuru wakandivhunja kudari: ‘Hambzaji Edhiti kuno varovorani vari kuviya koobesa kuvakwa ko Nyumba yo Umambo. Kureva kuti zvingakwanisika kuvaashira pa sumana mbiri here?’ Inini ndakaceuja manera akakomborera Jehovha noni yo Sarefaa.” (1 Majimambo 17:12-16) Hambzaji Edhiti vakadavira kuashira varovoranivo. Waro kureva kuti vakakomborehwa here? Ivona yakati: “Varovorani  vaya vakazogara mweji muviri. Asi pa mweji jese iji, takazova no ushamwari wakavanga kamare.” Hambzaji Edhiti vakazovazve no makomborero o kuva no shamwari jakanaka mu ungano. Nyamasi uno, ivona vari kushanda inga piyona zve vanodakarira kukoka vavanoshanda navo mu basa ro kucumaera kuti vaende kocenga-cenga kanyi kwavo. Ivona vakananga kudari: “Kupa vamweni zvinondiita kuti ndijizwe ushoni! Kunasa kunanga, ndinopejisira ngo kuvisihwazve makomborero.”—Vaheberi 13:1, 2.

17. Ngozvapi zvakavoniwa ndi hama Ruka no mukaji wavo?

¹⁷ Pikija teciashira vafambi, kangaije tingadikana kuitisa nani. Inga muezaniso, hama Ruka no mukaji wavo vanokwanisa ushoni kuashira varendo. Nguva jese, ivona vaikoka vabari vavo, ukama, shamwari no muvonereri wo ndharaundha no mukaji wake. Pikija zvakadaro, hama Ruka vakananga kudari: “Itusu takavona kuti tinokoka maningi vaya vanozwana na itusu.” Ngozvapi zvakaita hama Ruka no mukaji wavo kuti vaengejere kukova kwavo?

18. Ngozvapi zvakaita hama Ruka no mukaji wavo kuti vaengejere kukova kwavo?

¹⁸ Hama Ruka no mukaji wavo vakacinja mavonero avo pavakarangarijisisa ngo magama a Jesu: “Mukadisa basi vaya vanomudisavo, munozowana mupocero wenyi?” (Mateu 5:45-47) Ivona vakazwisisa kuti vaidikana kutevejera Jehovha, anokova ku vandhu vese. Ngokudaro, varovorani ava, vakasunga kukoka hama no hambzaji jo vacikazivi kumbodanijazve. Hama Ruka vakati: “Tese takadakarira maningi kuva pamwepo. Vese vakapinda no vakavangiswa zve vecidakajihwa.”

19. Tinotatijisa kudini kuti tiri vateveri va Jesu zve imwimwi masunga kuitenyi?

¹⁹ Musoro uwu, watitatija kuti rudo watinahwo umwe kuno umweni unotibesera kusakurira runyararo, kutama kuva no mukheto no kuva vanokova. Tinodikana kunyisa mazwiro ese acikabeseri ari mukati mwedu zve toda hama jedu ngo mwoyo wese. Tikaita kudaro, tinozova takadakara zve tinozotatija pacena kuti tiri vateveri va Jesu.—Johani 13:17, 35.