1. Ngenyi Jehovha wakasika zviro zvinopona?

PAKAVA no mukuvo wo kuti Jehovha wainga ari ega. Asi iyena aacaijizwa ari ega ngokuti wakakwana pa zvese. Pikija zvakadaro, Mwari waida kuti vamweni vadakajihwe mu upenyu. Ecindundihwa ngo rudo, Jehovha wakatanga basa rake ro kusika.—Nduyo 36:9; 1 Johani 4:19.

2. Ngoapi mazwiro akava na Jesu pomwe no ngirozi ngo pamusoro po mabasa o kusika akaitwa ndi Jehovha?

² Pokutanga, Jehovha wakasika mundhu kuti ashande naye: Jesu, Mwana wake. Ecishandisa Jesu, “bziro bzese bzakaruhwa,” kubatanijavo zviuru no zviuru zvo ngirozi. (VaKolosi 1:16) Kuna Jesu wakava mudakaro mukuru maningi kuva no cidakajiso co kushanda na Babake. (Mazwi Akangwara 8:30) No ngirozivo jainga no mathangwe okudakara. Ijona jakakwanisa kuvona ngo phedo Jehovha na Jesu, vacishanda ngo simba kuti varure nyezuru no pasi. Waro ngirozi jakaitenyi? Ijona “jaiimba” nyika poyaisikwa, pacina kukana-kana ijona jakaenderera mberi jeciita izvo Jehovha paaipejisa kusika ciro cimwe nga cimwe. Zvinovoneka inga kuti ngirozi jakadakara maningi pojakavona ciro cokupejisira kusikwa pa nyika: Vandhu. (Jobe 38:7; Mazwi Akangwara 8:31) Zviro zvese zvakasikwari zvinokhombija rudo no uzivi hwa Jehovha.—Nduyo 104:24; VaRoma 1:20.

3. Mukuzwirana no 1 VaKorinto 15:21, 22, muripo wa Jesu unokwanisa kuitenyi?

³ Jehovha waida kuti vandhu vagare kwenda no kwenda mu nyika yakaseja yaakasika. Asi Adhamu na Evha vakapandukira Baba wavo vano rudo, zvoita kuti rufu no ushaishi ugumire vandhu vese. (VaRoma 5:12) Waro Jehovha wakaitenyi? Pakupera kushaisha ka Adhamu na Evha iyena wakananga zvaaizoita kuti aponese vandhu. (Genesi 3:15) Iyena waizopa mwana wake Jesu inga  muripo, izvo zvaizoita kuti vana vese va Adhamu na Evha vasujunuhwe kuvhira ku ushaishi no rufu. Mundhu no mundhu waizova no mukana wo kukheta kushandira Jehovha perapo wozova no upenyu ucingaperi.—Johani 3:16; VaRoma 6:23; verenganyi 1 VaKorinto 15:21, 22.

4. Muvhunjo japi jatinozodavira pa jijo iyi?

⁴ Cigondiso co rumuko cinomusa muvhunjo munganani. Inga muezaniso, rumuko unozoitikisa kudini? Kunanga kuti tinozokwanisa kuziva ukama hwedu no shamwari jedu pavanozomuswa? Tinozova no mudakaro wakadini vandhu pavanozomuswa? Rumuko ungatijijisenyi ngo pamusoro po rudo, uzivi no kusengerera ka Jehovha? Ngatende tidavire muvhunjo umwe nga umwe.

5. Ngenyi tingananga kuti rumuko unozoitika mu njira yakarongeka zve padoko ngo padoko?

⁵ Mu paradhiso, Jehovha anozoshandisa Mwana wake kuti azomuse zviuru no zviuru zvo vandhu. Asi tingaguma pa mbhejiso yo kuti, vakafa avazomuswi pa mukuvo wondhowo. Ngenyi tingananga kudaro? Ngokuti kudari vandhu pa nyika vakawandisisa ngo kukasika, pangatova no kutama kurongeka. Asi tinoziva kuti Jehovha anoita zvese mu njira yakarongeka. Cimwenizve, iyena anoziva kuti mu nyika muve no runyararo, zviro zvinodikana kuva zvakarongeka. (1 VaKorinto 14:33) Paainga ecishanda na Jesu kuti asike nyezuru no pasi, Jehovha wakakhombija uzivi no kusengerera ngokuti wakaita nyika padoko ngo padoko acito wasika vandhu. Ngo kudaro, Jesu anozoteveja muezaniso wa Baba wake paanozoshanda no vandhu vanopona pa Armagedhoni kuti vanasirire nyika kuitira vandhu vanozomuswa.

6. Mukuzwirana no Maitiro o Vapostori 24:15, mbhani nani vanozobatanijwa pa kumuswa?

⁶ Vanozopona pa Armagedhoni vanozodikana kuita ciro cinosisira maningi: Kujijisa vaya vanozomuswa ngo pamusoro po Umambo hwa Mwari no ndhungamiro jake. Ngenyi zvinozodikana?  Ngokuti vazinji vanozomuswa vanonga vari divi ro vandhu “vacikanasi.” (Verenganyi Maitiro o Vapostori 24:15.) Vandhu ava “vacikanasi” vanozodikana kuita cinjo huru mu upenyu hwavo kuti vakwanise kubesereka ngo muripo wa Kristu. Ecimborangariranyi ngo basa rese rinobatanijwa pa kujijisa cokwadi ku zviuru no zviuru zvo vandhu vacikazivi Jehovha. Kunanga kuti umwe nga umwe wovanozomukaro vanozova no mujijisi wavo wo Bhaibheri inga zvinoitikari nyamasi uno? Kunanga kuti vanozomuswaro vanozogajwa kwenda ku ungano iri yese no kujijiswa kuti vanozokwanise kubesera vamweni vanozomuswavo? Ngativetere kuti tizvivone. Catinoziva nga ici, pakupera ko Ciuru co Makore co Kutonga ka Kristu, “nyika inozozara ngo kuziva Tenji.” (Isaia 11:9) Tinozova no basa guru maningi pa ciuru co makore asi rinozova rinodakajisa!

7. Ngenyi vashandiri va Mwari vanozodikana kuva vandhu vanozwisisa pavanonga vacijijisa vapera kumuswa?

⁷ Pa Utongi wo Ciuru Co Makore ca Kristu, vashandiri vese va Jehovha pa nyika vanozodikana kwenderera mberi veciita cinjo mu upenyu kuti vadakajise Jehovha. Ngokudaro, ivona vanodikana kuva vandhu vanozwisisa pavanonga vacijijisa vanonga vamuswa, ngokuti ivona vanozviziva kuti zvinoda kuvangisira kuti vakwanise kusiya zviro zvakashata no kuteveja ndhungamiro ja Jehovha. (1 Pedru 3:8) Pacina kukana-kana, vanongaya vamuswa vanozoda kuita divi ro vandhu vanojidodokesa va Jehovha, avo vanonga vacivangisira kuti ‘vabatire ruponeso hwavo.’—VaFilipi 2:12.

8. Ngozvapi zvinotikhohwesa kuti tinozokwanisa kuziva ukama hwedu no shamwari jinonga jamuswa?

⁸ Ngo mathangwe akasiyana-siyana, tingananga kuti tinozokwanisa kuziva ukama hwedu no shamwari jedu vanozomuswa kumbejiyo. Inga muezaniso, tikarangarira ngo vandhu vakambomuswa kareko, zvinovoneka inga kuti Jehovha anozomusa vandhu manera ovainga vacito vafa, kana kuti, vano mavonekero ondhoo no manera ondhoo o kuvereketa no o kurangarira. Ceujanyi kuti Jesu wakaezanisa rufu no kuvata zve rumuko no kumuka kuvha mu hope. (Mateu 9:18, 24; Johani 11:11-13) Mundhu paanomuka, anonga ari ondhoo kamare, manera aaingaya acito avata. Anonga ano mavonekero ondhoo no murangarijo jondhojo. Amborangariranyi ngo muezaniso wa Razaro. Painga papera njiku murongomuna naafa, ngokudaro, muviri wake wainga wotanga kuvora. Asi Jesu paakamumusa, hambzaji jake jakakwanisa kumuziva zve iyenavo wakakwanisa kuvaziva.—Johani 11:38-44; 12:1, 2.

9. Ngenyi vanozomuswaya, avazomuswi no murangariro no muviri jakakwana?

⁹ Jehovha anogondesa kuti mu paradhiso akuna mundhu anozoti: “Ndiri kuhwaja.” (Isaia 33:24; VaRoma 6:7) Ngo kudaro, vanozomuswaro, vanonga vano muviri waushoni ucikahwaji. Asi, ivona vanonga vacito vaavandhu vakakwana. Novaimuswa vakakwana, shamwari no ukama hwavo avacaizovazivepi. Zvinovoneka inga kuti pa Utongi wo Ciuru co Makore hwa Kristu, vandhu avadogumi pa kukwana ngo kukasika, zvinozoitika padoko ngo padoko. Jesu anozohwirija Umambo kuna Baba wake pakupera ko ciuru co makore. Ngaiwona mukuvo wo kuti Umambo hwa Mwari unozokwanirisa mukuperera cinangwa cawo, co kuita kuti vandhu vese vave vakakwana.—1 VaKorinto 15:24-28; Apokalipsi 20:1-3.

10. Rumuko unomuita kuti mujizwe kudini?

¹⁰ Amborangariranyi mazwiro amunova nawo pamunozoashira ukama kana shamwari yamunoda maningi pakumuswa ko vakafa. Kunanga kuti munozorira kana munozodakara? Munozodakara zvokuti munozoda kuimba kuti mukuje  Jehovha here? Kunasa kunanga, tino cokwadi ngo pamusoro po ciro cimwe: Rumuko unozoengejera maningi rudo watinawo na Jehovha pamwepo na Jesu. Itusu tiri kuashira zvese izvi ngo ndava yo rudo hwavo no kunaka kwavo mwoyo.

11. Mukuzwirana no zvakananga Jesu pana Johani 5:28, 29 zvicinyi zvinozoitika na vaya vanotevera ndhungamiro jakarungama ja Mwari?

¹¹ Amborangariranyi mudakaro unova no vaya vanovha kumuswa pavanonga vecisiya padoko ngo padoko undhu hwo kare votanga kutevejera ndhungamiro jakarungama ja Mwari. Vaya vanoita cinjo jinodikana vanozova no rumuko wo upenyu. Kuveni vaya vanopandukira Mwari avazokwanisizve kuphingaija runyararo unodikana kuwanika mu Paradhiso.—Isaia 65:20; verenganyi Johani 5:28, 29.

12. Jehovha anozokomboreresa kudini vaya vanozorarama pasi pano?

¹² Umambo hwa Mwari paunonga wecitonga, vandhu vese va Mwari vanozowirirana kamare no magama anonangwa pana Mazwi Akangwara 10:22 okuti: “Rukomborero hwa Tenji Mwari unokhupusa; kuthimwa-thimwa no kucamwa akuxandi ciro.” No besero ro mujimu mucena, vashandiri va Mwari vanozova vandhu vakavanga ku mujimu, kana kuti vanozoezana kamare na Kristu zve vova vandhu vakakwana. (Johani 13:15-17; VaEfeso 4:23, 24) Njiku imwe nga imwe, muviri javo jinozova jakavanga zve vanozova vandhu vaushoni kamare. Upenyu unozova unodakajisa maningi! (Jobe 33:25) Waro kunanga kuti kurangarijisisa ngo pamusoro po rumuko kungatibesera wari uno kamare?

13. Mukuzwirana na Nduyo 139:1-4, rumuko unokhombijisa kudini kuti Jehovha anonasa kutiziva?

¹³ Inga zvapera kunangwa Jehovha paanozomusa mundhu, iyena anozovisa murangarijo jake no mugariro jake, iyena anozoita inga manera aainga acito afa. Amborangariranyi kuti izvi zvinorevenyi. Jehovha anomuda maningi zvokuti anonasa kuziva zvese zvamunorangarira, zvamunozwa, zvamunovereketa no zvamunoita zve iyena anokwanisa kuzviceukija zvese. Kudari Jehovha akada kumumusa, zvinozomurerukira maningi kumusijira murangariro wenyu, mugariro wenyu no undhu hwenyu hwese. Mambo Dhavhidhi waiziva kuti Jehovha anodakarira umwe nga umwe wedu. (Verenganyi Nduyo 139:1-4.) Tinojijenyi ngo kuziva kuti Jehovha anonasa kutiziva kamare?

14. Ngenyi zvinodakajisa kuziva kuti Jehovha anonasa kutiziva?

¹⁴ Patinozwisisa kuti Jehovha anonasa kutiziva, zvinotibesera kuti titame kuthimwa-thimwa. Kuitisa kudini? Ceujanyi kuti Jehovha anomutaja maningi. Iyena anodakarira ciro cimwe nga cimwe cinomuita kuti musiyane no vandhu vamweni. Iyena anovona zvese zvinotiitikira mu upenyu hwedu no zvinotiita kuti tive vandhu vatiriari nyamasi. Amuvonivo kuti zvinodakajisa kuziva izvi? Ngo kudaro amudikani kujizwa muri mwega. Jehovha anaimwimwi mukuvo wese womuupenyu hwenyu ecipsaka manera okumubesera.—2 Kronike 16:9.

15. Kuitisa kudini vetero yo rumuko inokhombija uzivi hwa Jehovha?

¹⁵ Kuthya kufa kungava muejo wakakura maningi. Vandhu vanotongwa ndi Sathana vanoshandisa kuthya kufa, kuti vavangirije vamweni kuti vaite zviro zvavanoziva kuti azvizivi kunaka. Asi kuthyisijihwa uku akuna simba riri rese kwatiri. Tinozviziva kuti kudari vavengi vedu vakavhisa upenyu hwedu, Jehovha anozouvisazve. (Apokalipsi 2:10) Tino cokwadi cokuti ivona na kamwe avazokwanisi kuti vhisa kuna Jehovha. (VaRoma 8:35-39) Zvinodakajisa kuti Jehovha wakava mundhu wakangwara ngo kutipekeja vetero yokuzomuka. Ngo pamusoro po rumuko Jehovha, anovhisa nvuti jakavanga  jinoshandiswa ndi Sathana. Pa nguva yondhoyo anotipekeja cicunge kuti tirambe takagondeka kuna Jehovha.

16. Muvhunjo japi jamunodikana kujiita? Mupinguro jakona jinomubesera kudini kuti muzive kuti munothemba Jehovha?

¹⁶ Kudari vavengi va Jehovha vakaeja kumuuraya, zvicinyi zvamaizoita? Munozothemba Jehovha no cigondiso cake cokuzomumusa here? Mecida kuziva kuti kuthemba kwenyu Jehovha kwakavanga, jivhunjisenyi kudari: ‘Kunanga kuti zvisungo zvandinotema zvidoko kana zvikuru zvinokhombija kuti ndinothemba Jehovha here?’ (Luka 16:10) Muvhunjo umweni ungava uwu: ‘Maponero andinoita anokhombija kuti ndinothemba kuti kudari ndikapsaka Umambo hwa Mwari pakutanga Jehovha anozondipa zvimweni zvandinoda? (Mateu 6:31-33) Kudari madavira kuti ‘hina’ ku muvhunjo iji, zvinovonesa kuti imwimwi munothemba Jehovha nokuti makanasiririka kuitira muejo unozoviya.—Mazwi Akangwara 3:5, 6.

17. (a) Rumuko unokhombijisa kudini kuti Jehovha anosengerera? (b) Tingakhombijisa kudini kumbongesera kwedu ngo kusengerera ka Jehovha?

¹⁷ Jehovha waano njiku no nguva yaakatema kuti apeje nyika ino yakashata. (Mateu 24:36) Jehovha aazovisi mugumo njiku yaakatema icito yaguma. Pikija ecida maningi kumusa vandhu vakafa, iyena anondoenderera mberi ecisengerera. (Jobe 14:14, 15) Iyena ari kuvetera mukuvo kwawo kuti avamuse. (Johani 5:28) Pacina kukanakana, kusengerera ka Jehovha kunotijijisa zviro zvakawanda. Amborangariranyi izvi basi: Jehovha ngo kuva anosengerera, vandhu vazinji vakapeja nguva yakatikuti “vaphinduke mwoyo,” kubatanija na itusu. (2 Pedru 3:9) Jehovha anoda kuti vandhu vazinji vawane upenyu ucingaperi. Ngo kudaro, tinodikana kubongesera ngokusengerera kwake. Kuitisa kudini? Ngo kuita zvese zvatinokwanisa pakupsaka vaya vano ‘cido cakanaka cokuva no upenyu ucikaperi’ no kuvabesera kuti vade no kushandira Jehovha. (Maitiro o Vapostori 13:48, Shanduro yeNyika Itsva) Ngokuita kudaro, ivona vanozobesereka ngo kusengerera ka Jehovha, inga manera otakabesereka itisu.

18. Ngenyi tinodikana kuva vanosengerera ku vamweni?

¹⁸ Jehovha anozviziva kuti tinozova vandhu vakakwana basi pakupera ko ciuru co makore. Mbhera khondono, iyena anozova anosengerera nokutiregerera zvatinoposa. Iro ithangwe rakanaka rinotiita kuti itisu tipsake zvaushoni ku vamweni nokuva tinosengerera. Vonanyi muezaniso wo hambzaji imweni. Mwamuna  wayo vakatanga kuthimwa-thimwa maningi zvovaita kuti vatame kwenda kumusongano. Hambzaji iyi yakati: “Ici cakava cineso cikuru maningi kwandiri. Zvese zvatakaronga kuitira mbhuri yedu azvizivizve kukwanirisika.” Pikija zvakadaro, hambzaji iyi yakava inosengerera kuno mwamuna wayo. Iyona yakathemba Jehovha zve aizivi kuremba. Inga ndi Jehovha, kusiyapo kusotesesa zvineso zvayo, iyona yakaenda ko sotesesa zviya zvinokwaniswa kuithwa ngo mwamuna wayo. Iyona yakati: “Mwamunangu vanomugariro jaushoni maningi zve vakuita zvese zvavanokwanisa kuti vaite nane padoko ngo padoko.” Muezaniso uwu, unovonesa kusisira kokuva vandhu vanosengerera no vo pa mbhuri pedu no hama jo mu ungano jiri kusongana no zvineso.

19. Tinodikana kutema civaringo cokuitenyi?

¹⁹ Jesu no ngirozi vakadakara maningi ngo kusikwa ko nyika. Wari ecimborangariranyi mudakaro wavanozova nawo, ngo kuvona nyika yakazara ngo vandhu vakakwana vanoda kushandira Jehovha. Rangariranyizve mudakaro unozova no vokuzojwa kudenga, vecitonga na Kristu pavanozovona muviyo wo basa ravo ku vandhu pasi pano. (Apokalipsi 4:4, 9-11; 5:9, 10) Amborangariranyi kupona munyika yokuti kucema ngo pamusoro po matambujiko kunozofakeiwa ngo kucema ngo mudakaro zvokuti ndhendha, kusuruvara no kufa akuzoviyozve. (Apokalipsi 21:4) Mbhera njiku iyi igume, temanyi civaringo cokutevejera rudo, uzivi no kusengerera ka Jehovha. Mukaita kudaro, amuzoruzi mudakaro, azvinenyi no zvineso zvinozobudirira. (Jakobo 1:2-4) Zvokadi kamare, tinodikana kubonga maningi Jehovha ngo kutigondesa kuti ‘kunozova no rumuko.’—Maitiro o Vapostori 24:15.