1. Dhavhidhi wakanangenyi ngo kujidodokesa ka Jehovha?

TINGANANGADI kamare kuti Jehovha anojidodokesa here? Hina. Dhavhidhi wakati: ‘Munondipa muthavo wenyu unoponesa, kujidodokesa kwenyu kunondiita kuti ndive mukuru.’ (2 Samueli 22:36, Shanduro yeNyika Itsva; Nduyo 18:35) Dhavhidhi paakananga magama aya, kangaije wainga ecirangarira ngo muporofita Samueri paakaenda kumuzi wa babake kuti amuzoje inga mambo wo Iziraeri. Dhavhidhi pa hama jake sere ndiyena wainga mudoko, pikija zvakadaro, Jehovha wakamusana kuti afakeye Mambo Sauri.—1 Samueli 16:1, 10-13.

2. Tinozovonenyi pa jijo iyi?

² Tingatonanga kuti Dhavhidhi wainga no mazwiro akafanana no o mutari wo nduyo 113, uwo wakananga kudari ngo pamusoro pa Jehovha: “Anoderuka kuti avone denga no nyika. Yena anomusa murembi mu bukuta . . . anomugajika pakati po madoda.” (Nduyo 113:6-8) Pajijo iyi, tinozovona zviitiko zvimweni zvakaita kuti Jehovha akhombije kujidodokesa. No kuvonazve kuti tingajijenyi ngo muezaniso wake. Perapo, tinozojijazve padoko ngo pamusoro po kujibata ngo muezaniso wa Mambo Sauri, muporofita Dhaniyeri na Jesu.

3. Jehovha anotitajisa kudini zve izvi zvinokhombijenyi?

³ Tingajija zvizinji ngo kuvona matajiro anoita Jehovha vanamati vake vacizivi kukwana. Jehovha aatendi basi kuti tive vanamati vake, asi anototivona inga shamwari jake. (Nduyo 25:14) Asi kuti tive no ushamwari nae, Jehovha wakaita kuti mwana wake atifire kuti akwanise kutisujunura mu zvishaishi zvedu.  Zvokadi, izvo zvinovonesa unyasha no usizi hwa Jehovha. Kuvonesa kamare kuti Jehovha ndi Mwari anojidodokesa.

4. Jehovha wakatipenyi zve ngenyi?

⁴ Vonanyi zviro zvimweni zvinovonesa kuti Jehovha anojidodokesa. Inga musiki, Jehovha waizova no citendehwa co kusana manera atinodikana kupona. Asi iyena aazivi kuita zvondhozvo. Iyena wakatisika ngo muezaniso wake no kutipa rusujunuko hwo kujikhetera pikija ecizviziva kuti tiri vadoko mukuezanisira na iyena. Iyena wakaita zvondhozvo ngokuti aadi kuti timushandire ngo kuvangirijwa asi ngo rudo no kuziva makomborero atinozova nao kudari tikamuzwira. (Deuteronòmio 10:12; Isaia 48:17, 18) Zvinodakajisa maningi kushandira Mwari anojidodokesa.

5. Jehovha anotijijisa kudini kuti tive vandhu vanojidodokesa? (Vonanyi pikica yo pa kapa.)

⁵ Matajire anoita Jehovha vamweni, anotijijisavo kuti tive vanojidodokesa. Akunazve mudenga no pasi mundhu ano uzivi inga ndi Jehovha. Pikija zvakadaro, iyena anoda kuzwa mavonero o vamweni. Inga muezaniso, Jehovha wakatendera kuti mwana wake amubesere kusika zviro zvese. (Mazwi Akangwara 8:27-30; VaKolosi 1:15, 16) Pikija ngo wo masimba ese, Jehovha anopavo vamweni mabasa. Iyena wakagaja Jesu kuti ave Mambo wo Umambo hwake, wopavo simba cikwata co 144.000 vanozotonga na Jesu. (Luka 12:32) Jehovha wakajijisa Jesu kuti ave Mambo no Mupiri Mukuru. (Vaheberi 5:8, 9) Iyena wakajijisavo vanozotonga na Jesu. Asi Jehovha, aandogari acisota zvese zvavanoita kuti vakwanirise basa ravo. Iyena anothemba kuti ivona vanokwanisa kuita kuda kwake.—Apokalipsi 5:10.

6-7. Muezaniso wapi wakatipa Jehovha ngo pamusoro po kupa mabasa?

⁶ Jehovha aadi besero ro mundhu pa kuita basa, pikija zvakadaro, anotendera vamweni kuti vamubesere. Imwimwi muri musoro wo  mbhuri kana munoshanda inga mukuru wo ungano here? Kana zvakadaro, itanyi inga ndi Jehovha, ipanyi vamweni mabasa zve mucaeja kusotesesa zvese zvavanoita pa basa iri. Kudari mukatevejera muezaniso wa Jehovha, amuzodakari ngo kuvona basa iri rapera kuitwa, asi munozojijisa vamweni no kuvabesera kuti vave vandhu vanojithemba. (Isaia 41:10) Ngozvapi zvimweni zvingajija vaya vano mutoro kuvhira ku muezaniso wa Jehovha?

⁷ Bhaibheri rinokhombija kuti Jehovha, anodakarira mavonero o ngirozi. (1 Majimambo 22:19-22) Waro imwimwi vabari, mungatevejeresa kudini muezaniso wa Jehovha? Kudari zvecikwanisika, kumbiranyi mavonero o vana venyu ngo pamusoro po ciri cese. Kudari mavonero avo akava aushoni, itanyi inga zvovanangaro.

8. Jehovha wakakhombijisa kudini kusengerera paakataja Abhirahama na Sara?

⁸ Jehovha anokhombija kuva anojidodokesa ngo kuva mundhu anosengerera. Inga muezaniso, Jehovha anosengerera apo vashandiri vake vanovonesa kukana-kana ko vanako ngo pamusoro po zvisungo zvake. Abhirahama wakakana-kana ngo pamusoro po cisungo ca Jehovha co kuparaja Sodhoma no Gomora zve wakabhuya nae ngo pamusoro po zvaimuthwimwathwimwisa, Jehovha wakamupurukira. (Genesi 18:22-33) Sara wakaseka cigondiso ca Jehovha cokuti iyena waizova no mimba pikija waamusharuka, asi Jehovha aazivi kunyangajwa. (Genesi 18:10-14) Kusiapo izvo, Jehovha wakataja Sara ngo nderemejo.

9. Majibaba no vakuru vangatevejeresa kudini muezaniso wa Jehovha?

⁹ Imwimwi muri baba kana mukuru here? Mungatevejeresa kudini Jehovha? Amborangariranyi zvamunoita kudari vana venyu kana hama jo mu ungano pavanobhuya mazwiro avo ngo civaringo camunonga makatema. Munokasika kuvavhunja kuti zvavanorangariraro andizvopi here? Kana munoeja kuzwisisa mavonero avo? Kudari vanotungamirira vakajidodokesa inga ndi Jehovha, mbhuri javo no ungano jinobesereka. Mbhera wari, takwanisa kuvona kuti tingatevejeresa kudini kujidodokesa ka Jehovha. Wari, ngatijije kuti tingavisa kudini vandhu vanojibata ngo kushandisa muezaniso jinowanika mu Bhaibheri.

10. Jehovha anoshandisa kudini muezaniso jo vamweni kuti atijijise?

¹⁰ Jehovha “Mujijisi [wedu Mukuru],” wakasiya muezaniso mu Bhaibheri jinotijijisa zvizinji. (Isaia 30:20, 21) Mondhomo, tinowana muezaniso jo vandhu vakakhombija mugariro jinoda Jehovha, jakadari inga kujibata. Asi Bhaibheri rinavo muezaniso jo vandhu vacikazivi kukhombija mugariro iji no muviyo wovakava nawo. Patinovona muezaniso iji no kujirangarijisisa, tingajija zvizinji.—Nduyo 37:37; 1 VaKorinto 10:11.

11. Zvicinyi zvatingajija ngo muezaniso wakashata wa Sauri?

¹¹ Amborangariranyi zvakamboitikira Mambo Sauri. Pakutanga iyena wainga mujaha waijibata. Waizviziva kuti zviripo zvaacaikwanisa kuita, ate wakatothimwa-thimwa kuti aashire mabasa amweni. (1 Samueli 9:21; 10:20-22) Asi pakufamba ko nguva, Sauri wakatanga kujikuja. Izvo zvakatanga kuvoneka paakandopera kugajwa inga mambo. Vhaza imweni, Sauri wakakhombija kutama kuva anosengerera zvokuti aazivi kuvetera muporofita Samueri. Kusiyapo kujibata no kuthemba Jehovha kuti waizobesa vandhu vake, Sauri wakaita zviro zvokuti aacaitendehwa kuzviita, kuita mupiro kuna Jehovha. Ngowapi wakava muviyo? Sauri wakaruza unyasha hwa Jehovha zve wakarambiwa inga mambo. (1 Samueli 13:8-14)  Zvokadi kamare, tinojija zvizinji ngo muezaniso uu, zvokuti narini atidikani kujikuja inga ndi Sauri.

12. Dhaniyeri wakakhombijisa kudini kuti waijibata?

¹² Mukusiyana no muezaniso wakashata wa Sauri, vonanyi muezaniso waushoni wo muporofita Dhaniyeri. Mu upenyu hwake hwese, Dhaniyeri, wakaenderera mberi ecijidodokesa no kujibata paaishandira Mwari, nguva jese waipsaka ndhungamiro ja Jehovha. Paakashandiswa ndi Jehovha kuti adurujire hope ja Nebhukadhinezari, Dhaniyeri aazivi kutora rukujo hwese kuti huite hwake. (Danieli 2:26-28) Tinojijenyi? Kudari tikasimbwa ngo kuita hurukuro yaushoni, kana kukwanisa ushoni kucumaera, tinodikana kupa rukujo hwese kuna Jehovha. Tinodikana kujibata toziva kuti aticaizokwanisa kuita izvo pacina besero ra Jehovha. (VaFilipi 4:13) Patinoita kudaro, tinonga tecitevejera muezaniso wa Dhaniyeri no wa Jesu. Kuitisa kudini?

13. Tinojijenyi ngo pamusoro pa Jesu ngo magama anowanika pana Johani 5:19, 30?

¹³ Pikija wainga mwana wakakwana wa Mwari, Jesu waithemba besero ra Jehovha. (Verenganyi Johani 5:19, 30.) Iyena aazivi kumbovonesa kuti waida cigaro ca baba wake. Pana VaFilipi 2:6, panonanga kuti Jesu, pikija wainga “no ciimo ca Mwari, aazivi kuvangirira kuezana na Mwari.” Inga mwana anozwira, Jesu waizwisisa kuti wainga no zviro zvimweni zvokuti aacaikwanisa kuzviita. Zve waireremeja cigaro ca babake.

14. Jesu paakakumbihwa kuita ciro caacikakwanisi, zvicinyi zvaakaita?

¹⁴ Ceujanyi zvakaita Jesu apo vajiji vake Jakobo na Johani na mai wavo, povakakumbira ciro cokuti Jesu aacaikwanisa kuvapa. Pacina kukana-kana, Jesu wakavonesa pambhene kuti babake vo kudenga ndivona vaizotema civaringo cokuti ndiyani waizogara mukono muho wake no mukono boshwe mu umambo. (Mateu 20:20-23) Jesu waiziva kuti pano zvaacikakwanisi kuita. Iyena wakajibata, wakaita zvese mukuzwirana no ndhungamiro jaakapuwa ndi Jehovha. (Johani 12:49) Tingatevejeresa kudini muezaniso wake wakanaka?

15-16. Tingashandisa kudini mbhangiro yatinowana pana 1 VaKorinto 4:6?

¹⁵ Tingatevejera kujibata kwakaita Jesu, ngo kushandisa mbhangiro inowanika pana 1 VaKorinto 4:6, inoti: “Mucapindirija bzatahwa.” Waro kudari ariwese akatikumbira zano, atidikani kunanga zvatinorangarira, ngo kubhuya  ciri cese cinokasika kuguma mu murangariro mwedu. Kusiyapo zvondhozvo, tinodikana kumuvhunja zvinonanga Bhaibheri no mabhuku edu. Tikaita kudaro, tinokhombija kuti tinoziva patinogumira. Kujibata kunotiita kuti tive no ghwinyiso rokuti “matongero . . . akarurama” a Mwari wo masimba ese, nguva jese akarurama kupinda zano ratingapa.—Apokalipsi 15:3, 4.

¹⁶ Patinojibata, tinokuja Jehovha. Asi pano mathangwe amweni anotiita kuti tikhombije mugariro uu. Ngatende tivone kuti kujidodokesa no kujibata zvingatibesera kuti tive no mudakaro no kuva no ushamwari waushoni no vamweni.

17. Ngenyi vandhu vanojidodokesa no kujibata vano mudakaro?

¹⁷ Patinojidodokesa no kujibata tinova vandhu vakadakara. Ngenyi tingananga kudaro? Ngokuti patinonga teciziva patinogumira, tinonga tecibongesera no kudakara ngo besero rese ratinopuwa ngo vamweni. Inga muezaniso, kunanga kuti mucaceuja Jesu paakarapaya gumi ro vanyamapere? Umwe basi ndiyena wakaenda kobongesera Jesu ngo kumurapa kwake. Iyena aacaizokwanisa kujirapa ega pacina besero ra Jesu. Kujidodokesa no kujibata ko mwanarume wiya, ndikona kwakamuita kuti ade kubongesera no kukuja Mwari ngo besero raakaashira. —Luka 17:11-19.

18. Kuitisa kudini kujidodokesa no kujibata kunotibesera kuti tive no shamwari jaushoni? (VaRoma 12:10)

¹⁸ Mundhu anojidodokesa no kujibata, anokwanisa ushoni kuzwana no vamweni no kuva no shamwari jipsa. Ngenyi? Ngokuti vandhu vakadaro, vanokwanisa kuvona mugariro jaushoni jo vamweni no kuvathemba. Vandhu vanojidodokesa no kujibata vanodakara vamweni pavanobudirira mu mabasa avo azvinenyi kuti ngovapi. Ivona avaiti nyowa jo kusimba  no kureremeja vamweni. —Verenganyi VaRoma 12:10.

19. Ngenyi tinodikana kuhwisana no kujikuja?

¹⁹ Asi mundhu anojikuja wakasiyana kamare. Vandhu vakadari vanozvivona zvecinesa kusimba vamweni, ivona vanoda kusimbwa. Vano mukhuva wo kujiezanisa no vamweni zve vano mujimu wokuphikizana. Kusiyapo kujijisa vamweni no kuvapekeja mabasa, ivona vanocijikira pa kurangarira kuti: “Kudari wakada kuti zviro zvibude ushoni zviitei wega kamare.” Shwiro ngo yokuti, ku vandhu vondhovo, zviro kuti zvinase kubuda ushoni, zvese zvinodikana kuitwa ngo njira yavanonanga. Kusiyapo zvondhozvo, vandhu vanojikuja, vanoda kuvoniwa inga vanosisira maningi kupinda vamweni zve vano thima pavanovona vamweni vacinasa kuita zviro kupinda ivona. (VaGalàsia 5:26) Vandhu vakadari, ushamwari hwavo augari kwenda no kwenda. Kudari tikavona kuti tino mujimu wokuda kujikuja, tinodikana kufunungura mwoyo wedu kuna Jehovha, tokumbira kuti iyena atibesere ‘kuphinduja no kutenderuja murangariro wedu.’ Ngokudaro, mbeu yo kujikuja aizomeri miji mu mwoyo mwedu.—VaRoma 12:2.

20. Ngenyi tinodikana kuva vandhu vanojidodokesa no kujibata?

²⁰ Tinobonga maningi ngo muezaniso wa Jehovha. Tinovona kujidodokesa kwake ngo manera aanotaja vashandiri vake zve itusu tinoda kumutevejera. Tinodazve kutevejera muezaniso jatinowana mu Bhaibheri jo vandhu vanojibata vakafamba na Jehovha. Kudari tikaita izvonazvo, tinozopa nderemejo Jehovha no rukujo hwaanofanera. (Apokalipsi 4:11) Ngokudaro, mukuvo wese tinozofamba na baba wedu vo kudenga, avo vanoda vandhu vanojidodokesa no kujibata.