1, 2. (a) Nyika iyi yakashatari yakaezana kudini no cigevenga catongehwa kuurawa? (Vonanyi pikica yokutanga.) (b) Pasure po kuparajwa ko nyika ino yakashata, vese vo mugore no pasi pano vanozozwa kudini?

NGATITI cigevenga cinothyisa ciri kudarika ngo mukoredhori mo jeri, vangwariri vari kuciperekeja, vecikhuwa kuti: “Mundhu wokufa ari kufamba!” Ngenyi vanonga vecikhuya kudaro? Ngo kuti pikija cigevenga ici cinonga ciri penye, cicikahwaji, icona capera kutongehwa rufu zve ciri kuda kuuraya. Ngo kudaro, cinonga cecitovoniwa inga kuti catofa. *—Vonanyi masoko opasi.

² Nyika yakashata yatiri kuraramari, iri pa mugariro wakaezana no wo cigevenga canangwari, iri kuda kuparajwa. Bhaibheri rinonanga kudari: ‘Nyika . . . inopera.’ (1 Johani 2:17) Jehovha wakatema civaringo co kuparaja nyika ino yakashata sambiri pano, zve atikakaniji kuti iyona inozopera kamare. Asi pano musiyano uripo wo maparajihwe o nyika ino no maparajihwe o cigevenga canangwaya. Vamweni vangananga kuti matongehwe  ocaizwaya andiopi, votovonesa kuti avatenderani nao, vecivetera kuti dangani acidourawi. Asi, Jehovha ndi mutongi wakakwana, zve matongero ake o kuti nyika iyi inodikana kuparajwa, akakwana. (Deuteronòmio 32:4) Kuparajwa ko nyika ino akudocinjwi kwenda kumbeji. Pasure po kuparajwa kwayo, vese mugore no pasi pano vanozotendera kuti civaringo ca Jehovha cainga cakarungama. Kunozova no rusujunuko hukuru!

3. Matambujiko api marongomuna anozopera pa kuviya ko Umambo hwa Mwari?

³ “Nyika” iri kudari ‘kupera’ inobatanijenyi? Inobatanija zviro zvakashata zviri kuitikari njiku ngo njiku. Zvese izvo sambiri pano zvicapera. Wari uno, awo ndi masoko akanaka o “Umambo.” (Mateu 24:14) Pa musoro uno, ticabhuya ngo matambujiko marongomuna anozopera pa kuviya ko Umambo hwa Mwari: vashati, zvikwata zvinoita mabasa o umbau, zviito zvakashata, zve mugariro jakashata. Pa dambujiko rimwe nga rimwe tinozozwa (1) riri kutipsasisa kudini nyamasi uno, (2) Jehovha anozoriitenyi, zve (3) pa ndau paro anozodirenyi?

4. Vashati vari kutipsasisa kudini nyamasi uno?

⁴ Vashati vari kutipsasisa kudini nyamasi uno? Mupostori Pauro wakananga kuti mu njiku jo kupejisira, “kunozowanika mukuvo wokunesa.” Perepo woengejera eciti: “Vakaxata no vanyepi vanozoenda mberi no uxaixi.” (2 Timoti 3:1-5, 13) Muri kuzvivonavo here? Vandhu vakawanda vari kutambujika ngo ndava yo vandhu vanoshupha, vano mukheto unocamwisa zve zvigevenga zvinothyisa. Vamweni avacina no nyowa jo kuita zvakashata. Vamweni vanocengejera inga vari kuda kubesera, kuveni vari kuda kukhuvaza. Kangaije atito tatokhuvazwa ngo zvingevenga, asi ngo maitiro ari ese, tinopsaswa ngo vashati. Tinozizimuka ngo kuzwa mashuphire avanoizwa vana vadoko, vasharuka no vamweni vacikakwanisi kujijivirira. Vanozviitaro vanotodari inga zvinyama kana madhimoni, veciziitaya. (Jakobo 3:15) Asi zvinodakajisa kuziva kuti Soko ra Jehovha rinotipa vetero.

5. (a) Mukana wapi uciri no vashati wari? (b) Zvicinyi zvinozoitika no vanoramba kucinja?

⁵ Jehovha acazoitenyi? Wari uno, Jehovha ari kupa mukana vandhu vakashata kuti vacinje. (Isaia 55:7) Pikija hazvo, nyika ino yakashata iri kuda kuparajwa sambiri pano, vandhu vakashata avato vatongwa. Waro zvicinyi zvinozoitika kuno vaya vacikadi kucinja no vanobesera mugariro uno wo zviro mbhera pa damujiko guru? Jehovha wakagondisa kuti waizobvisa vandhu vese vakashata pasi pano. (Verenganyi Nduyo 37:10.) Nyamasi uno, vazinji vari kukwanisa maningi kuviga zviito zvavo zvakashata, ngo kuita kudaro, kazinji avapanicwi ndizvona. (Jobe 21:7, 9) Asi Bhaibheri rinoticeukija kudari: “Ngokuti majiso [a Mwari] anovona maitiro o vandhu vese; anorindira kufamba kwavo kwese. Akuna cidima nokuti bvute rakapsipa po vangakwanisa kufindara vaxaixi.” (Jobe 34:21, 22) Ngo kudaro akuna manera o kuvanda kana kufindara pamberi pa Jehovha. Iyena anovona zvese zviri kuita vashati. Armagedhoni ikapera, tinozosota pavaianja kugara, asi atizovavoni. Vanonga vaparajwa mbhera narini!—Nduyo 37:12-15.

6. Vashati vakapera kuparajwa, mbhaani vanozosara zve ngenyi awo i masoko akanaka?

 ⁶ Mbhaani vanozosara vashati vakapera kuparajwa? Jehovha wakagondesa kudari: ‘Vakapfava vanozogara ndhaka yo nyika; vanozodakara ngo kuwanda ko runyararo.’ Tevere tinoverengazve kudari pa nduyo imweyo: ‘Vakarurama vanozogara ndhaka yo nyika, vogaremo mbhera narini.’ (Nduyo 37:11, 29, Baiberi Mazwi Akacena aMwari) ‘Vakapfava’ no ‘vakarurama’ mbhaani? Vakapfava ndi vaya vanojidodokesa zve vanojijira ngo zva Jehovha perepo vomuzwira. Vakarurama ndi vaya vanodisisira kuita zvinonangaya Mwari kuva zvakarungama. Mu nyika ino nyamasi, vandhu vakashata ngovakawanda kupinda vakarungama. Asi, mu nyika imbza, munozova basi no vandhu vakapfava no vakarungama, zve vanozoita pasi pano kuti pave paradhiso!

7. Zvikwata zvinoita mabasa o umbau zviri kutipsasisa kudini nyamasi uno?

⁷ Zvikwata zvinoita mabasa o umbau zvinotipsasisa kudini nyamasi uno? Uzinji hwo ushati hwuri kuitikari, huri kuitwa ngo vo zvikwata izvi. Zwikwata zvo zviara, zviri kucengeja zviuru zvo vandhu. Inga muezaniso, zvinonyepa ngo pamusoro po magariro a Mwari, zvinonanga kuti Bhaibheri aridikani kuthembiwa, zve zvinonanga zviciripi izvona ngo pamusoro po kumbeji ko pasi pano no po vandhu vese. Mautongi o umbau anoitisa hondo, ugevenga ngo ndava yo mukheto zve anobzinyirira varombo no vacina vabvikiri. Mautongi awo, ari kukhupuka no kuva no simba, ngo kubesera basi vandhu vavanoda zve ngo kutendera kudyekehwa. Koponi jinodisisa upfumi jiri kusvipisa nyika, kuparaja zvisikwa no kubira vandhu vazinji, jecikhupusa vashoma. Zvakajeka kuti zvikwata zvinoita mabasa o umbau ndizvona zviri kuviisa uzinji hwo matambujiko mu nyika, nyamasi uno.

8. Mukuzwirana no Bhaibheri, zvicinyi zvinozoitika no zvikwata zvinovoniwaya nyamasi uno kuva zvakavanga?

⁸ Jehovha acazoitenyi? Dambujiko guru ricatanga vo zvomatongehwe o nyika pavanomukira masangano o zviara zvo manyepo, anonangwaya mu Bhaibheri kuti i hure ino zina rokuti Bhabhironi Guru. (Apokalipsi 17:1, 2, 16; 18:1-4) Masangano ao anozoparajwa mukuperera kamare. Asi zvicinyi zvinozoitika no zvikwata zvimweni zvese zvinoita mabasa o umbau? Bhaibheri rinozviezanisa no matundhu no zvirundu ngokuti izvona wari zviri kuvoneka inga zvakavanga no kucijikira. (Verenganyi Apokalipsi 6:14.) Asi rinonangazve kuti mautongi pomwe no zvikwata zvese zvicikabeseri Umambo hwa Mwari zvinoparajwa. Izvi zvinozoitika pa divi ro kupejisira ro dambujiko guru. (Jeremia 25:31-33, BMAA) Pasure pa izvi, akuzovizve no cikwata cimwe haco cinoita mabasa o umbau!

9. Ngenyi tingava no gwinyiso ro kuti pasi pano panozonasa kurongeka?

⁹ Zvicinyi zvinozova pa ndau yo zvikwata zvinoita mabasa o umbau? Pasure po Armagedhoni, kunozova no cikwata ciri cese here? Bhaibheri rinonanga kudari: “Tinovetera gore ripsa no nyika ipsa po hunozogara rugarisiko.” (2 Pedru 3:13) Gore kana matenga no nyika kana pasi zvokare, ndi mautongi o umbau no vandhu vanovonerehwa  ndiona. Pasure po kuparajwa kwayo, zvicinyi zvinozoveyo? Matenga mapsa no “nyika ipsa.” Matenga mapsa anonangira utongi hupsa, Umambo hunoumbwa ndi Jesu Kristu no 144.000 zvo vanozotonga naye. Pasi papsa panonangira vandhu vanozotongwa ngo Umambo hwa Mwari. Jesu no vanozotonga nae vanotevejera Jehovha Mwari, Mwari wakarongeka. (1 VaKorinto 14:33, BMAA) Ngo kudaro, pasi papsa panozova pakarongeka. Panozova no vanarume vakanaka vecivonerera zviro. (Nduyo 45:16) Vanarume vondhovo vanonga vecitungamirihwa ndi Kristu no 144.000. Rangariranyi basi mukuvo uwo, wokuti zvikwata zvese zvo umbau zvinonga zvafakeiwa ngo sangano rimwe basi, rakabatana ro kuti narini arizombovizve no ciri cese co umbau!

10. Zviito zvapi zvakashata zvinonyanya maningi kuvoneka kwamunogararo, zve imwimwi no mbhuri yenyu muri kupsasiswa kudini ndizvona?

¹⁰ Zviito zvakashata zviri kutipsasisa kudini nyamasi uno? Tiri kurarama mu nyika yo kuti uhure, kutama kugondeka, no ugevenga hunozizimusa, zviri kwese. Mabungaijo o mu nyika ino anoita kuti zviro izvo zviemuje kuveni zvinorerusa ndhungamiriro ja Jehovha ngo pamusoro po zvakanaka no zvakashata. (Isaia 5:20) Vabari vanodikana kuhwa hondo maningi kuti vabvikirire vana vavo kuti vatame kukwevejehwa ngo zviito izvi zvakashata. Zvokadi, maKristu ese anodikana kushanda ngo simba kuti angwarire ushamwari hwao na Jehovha, mu nyika icikareremeji mupango jake.

11. Tinojijenyi ngo pamusoro po kutonga kwakaita Jehovha madhorobha o Sodhoma no Gomora?

¹¹ Jehovha anozoitenyi no zviito zvakashata? Rangariranyi ngo zvakaita Jehovha no zviro zvakashata zvaaitika ku madhorobha o Sodhoma no Gomora. (Verenganyi 2 Pedru 2:6-8.) Roti wainga mundhu wakarungama, zve iyena no mbhuri yake vaitambujika maningi ngo zviro zvakashata zvaiizwa ngo vandhu mu mutundhu mwake. Jehovha wakaparaja mutundhu jese jo madhorobha maviri aya kuti apeje zviro zvakashata zvaaitikemo. Asi iyena “wakavonesa vaxaixi bzo vanozoitihwa.” Kudari inga Jehovha wakapeja zviito zvese vakashata mu nguva yondhoyo, iyena anozoparajavo mugariro uno wakashata.

12. Zviito zvapi zvamuri kuvetera kuzoita mu nyika imbza?

¹² Jehovha anozodirenyi pa ndau po zviito zvakashata? Mu nyika imbza, tinozova takabatikana ngo zviito zvinodakajisa. Inga muezaniso, tinozocinja pasi pano kuva paradhiso no kuvaka nyumba jedu no jo vadiwa vedu. Tinozoashira zviuru no zvuiru zvo vanozomuswa no kuvajijisa ngo pamusoro pa Jehovha no zvese zvaakaitira vandhu. (Isaia 65:21, 22; Maitiro o Vapostori 24:15) Pa nguva yondhoyo, tinozova takabatikana ngo zviito zvinotidakajisa no zvinoviisa rukujo kuna Jehovha!

13. Zvicinyi zvakaviiswa ngo kupandukira kwakaitika mu munda wo Edheni?

¹³ Mugariro jakashata jiri kutipsasisa kudini? Nyika ino yakazarari ngo vashati, zvikwata zvinoita mabasa o umbau, no zviito zvakashata, zvinoviisa mugariro jakashata. Tese tiri kupsaswa ngo zviro zvakadari inga hondo, urombo, kukhetana ngo ndava yo kusiyana ko ganda, ndhendha no rufu. Mugariro jese iji jakashata, jakatanga apo  Sathana, Adhamu na Evha vakapandukira Jehovha. Zve tese tiri kupsaswa ngo kupandukira kwavo.

14. Jehovha anozoitenyi no mugariro jakashata?

¹⁴ Jehovha anozoitenyi no mugariro jakashata? Ngativone muezaniso munganani. Jehovha wakagondisa kupeja hondo jese. (Verenganyi Nduyo 46:8, 9.) Iyena anozopeja ndhendha. (Isaia 33:24) Anozongarangaja rufu mbhera narini. (Isaia 25:8) Anozopeja urombo. (Nduyo 72:12-16) Zve Jehovha anozopeja mugariro jese jimweni jakashata jinoita kuti upenyu uve unosuruvarisa. Anozoparajavo kukwevejera ka Sathana no madhimoni ake!—VaEfeso 2:2.

15. Ngo zvapi zvimweni zvinopejwa mbhera narini pasure po Armagedhoni?

¹⁵ Rangariranyi basi kudakaja kwazvinozoita kurarama kucina, hondo, ndhendha nee rufu! Akucazovi no masoca, nvuti, nee akuzorangarihwi zvo hondo. Akucazovi no ugevenga, ngo kudaro akuzovi no dikano yo kuva no maporisia, zvinginde-nginde zvokungwaja vandhu, kangaije nee fishadura, kandiado kana zvavhi. Mugariro jese iji jakashata jinotiviisirari kuthimwa-thimwa jinonga japera mbhera narini.

16, 17. (a) Mazwiro api anozova no vanozoponeswa pa Armagedhoni? Ipanyi muezaniso. (b) Tingaitenyi kuti tive no cokwadi co kuti tinozoponeswa nyika ino yakashata ikaparajwa?

¹⁶ Upenyu hunozova hwakadini pasure po kupejwa ko mugariro jakashata? Azvizivi kureruka kurangarira. Tiri kurarama no mugariro jakashata kubvira kare maningi zvokuti aticakwanisi kuvona makurire o dambujiko ratinaro. Tingazviezanisa kudari: Vandhu vanogara phedo no panodarika komboyo nguva jimweni avatozwi baruyu rainoitaya. Zve vanogara phedo no panosvejehwa rishu, kangaije avacatozwi kunuha kwayo. Asi Jehovha akapeja mugariro jakashata, tinozozwa kusujunuka kukuru!

¹⁷ Kuneseka kwese kwatinako wari, kunozofakeiwa ngenyi? Nduyo 37:11 inoti: ‘Vanozodakara ngo kuwanda ko runyararo.’ Zvinotondhoja maningi kuziva kuti izvi ngozviri kuda Jehovha! Mukati mo mukuvo uno unonesa, itanyi zvese zvamunokwanisa kuti murambe muri phedo na Jehovha pomwe no sangano rake. Vetero yenyu yo kumbeji inosisira maningi, ngo kudaro nasanyi kuirangarira, ngaive yokadi kamare kwamuri zve isumurirenyivo vamweni. (1 Timoti 4:15, 16; 1 Pedru 3:15) Ngo kuita kudaro, mungava no cokwadi co kuti nyika ino ikaparajwa, munozoramba mecipona, makadakara kwenda no kwenda!