1, 2. (a) Ngenyi zvatinovetera zvakasiyana no zvinovetera vamweni? (b) Tinozojijenyi pa musoro uno?

JEHOVHA wakatipa vetero yakanaka maningi. Wakagondisa kucenesa zina rake no kuita kuti kuda kwake kuzoitike pasi no mugore. (Mateu 6:9, 10) Izvo ngo zviro zvinosisira maningi zvatiri kuvetera kuti zviitike. Jehovha wakatigondisazve kutipfupa ngo upenyu hucikaperi, zvecida mugore kana pasi pano. Kudakaja kwazvinozoita hai! (Johani 10:16; 2 Pedru 3:13) Tiri kuramba tecivetera kuti tivone kuti Jehovha acarambisa kudini ecitungamirira no kubesera vandhu vake mu njiku jino jo kupejisira.

² Bhaibheri rinonanga kuti rutendo “ndihwona hwokadi hwokuti tino bziro bzo tinovetera.” Izvi zvinoreva kuti vaya vano rutendo vano gwinyiso rokuti zviro zvakagondesa Jehovha zvinozokwanirisikadi kamare. (Vaheberi 11:1) Ngo divi rimweni, vandhu vazinji nyamasi uno vanovetera zve vanodisisa zviro zvovacikazivi kuti zvinozokwanirisikadi. Inga muezaniso, vamweni vanotamba cabutha vecivetera kuwina. Pa musoro uno, tinozovona kuti tingavangisa kuti rutendo hwedu ku zvipikihwa zva  Mwari. Tinozobhuyavo ngo pamusoro po kuti tinobeseka kudini ngo kuva no gonda rakavanga.

3. Ngenyi tinothemba kuti zvigondiso zva Mwari zvinozokwanirikadi kamare?

³ Akuna no umwe anobahwa ano rutendo. Kuti tive no rutendo, tinodikana kutendera kuti mujimu wa Mwari utungamirire mwoyo jedu. (VaGalàsia 5:22) Mujimu mucena ungatibesera kuguma pa kuziva Jehovha. Patinozwisisa kuti iyena ndi wo masimba ese zve ano uzivi, tinothemba kuti anokwanisa kuita zvese zvaakapikira. Jehovha pacake anovona inga kuti zvigondiso zvake zvatokwanirisika kamare, eciti: ‘Zvaitika!’ (Verenganyi Apokalipsi 21:3-6, Shanduro yeNyika Itsva.) Tinoziva kuti Jehovha nguva jese anoita zvaanogondesa. Iyena ndi “Mwari wakagondeka.” Ngo iyo ndava tinothemba zvese zvaanotibvunja ngo pamusoro po kumbeji.—Deuteronòmio 7:9.

4. Vashandiri va Mwari vo kare vainga no rutendo ngo pamusoro penyi?

⁴ Vaheberi cipauko 11 inotibvunja ngo pamusoro po vanarume no vanakaji 16 vainga no gonda rakavanga no zvipikihwa zva Jehovha. Inonangazve ngo pamusoro po vazinji vamweni vakadakajisa Jehovha “ngo ndava yo rutendo hwavo.” (Vaheberi 11:39) Vese vaivetera ‘mubarihwana’ wainga wakagondiswa ndi Jehovha. Ivona vaiziva kuti ‘mubarihwana’ uwu waizoparaja vavengi va Mwari vese no kuviisazve paradhiso. (Genesi 3:15, BMAA) Zve vashandiri va Mwari avo, vainga no gonda rakavanga ro kuti Jehovha waizovamusa mu kufa. Zvokadi, ivona avacaivetera kumuswa kuti vararame mugore zvecivoneka kuti Jesu wainga acito aita kuti zvikwanisike. VaGalàsia 3:16) Kusiyapo izvo, ivona vaivetera kurarama kwenda no kwenda pasi pano mu paradhiso yakaseja.—Nduyo 37:11; Isaia 26:19; Hoseya 13:14.

5, 6. Zvicinyi zvaivetehwa ndi Abhirahama no mbhuri yake? Vakaitisa kudini kuti varambe vano rutendo hwakavanga? (Vonanyi pikica yo kutanga.)

⁵ Vaheberi 11:13 inonanga kudari ngo pamusoro po vashandiri va Jehovha ava: ‘Vandhu vese ava vakafa vecitenda, vacikazivi kuaxira bzo vainga vakagondeswa ndi Mwari. Vakabzivona ngo ndhambo, vodakara ndibzona.’ Ivona vakasota kumbeji mu nyika imbza zve vaitovona inga kuti vatori modhomo. Umwe wavo wainga Abhirahama. Jesu wakananga kuti Abhirahama ‘wakadakara ecivetera kuvona’ nguva yondhoyo. (Johani 8:56) Sara, Izaki, Jakobe no vamweni vazinji vaiveteravo nguva yo kuti Umambo, ‘hwakarangarihwa no kuvakwa ndi Mwari,’ hwaizotonga nyika yese.—Vaheberi 11:8-11.

⁶ Abhirahama no ukama hwake wakaramba kudini vano gonda rakavanga? Ivona vakaramba vecijijira ngo pamusoro pa Jehovha. Nguva jimweni, Mwari wakavereketa navo ecishandisa ngirozi, zvivoniso, kana kuvarotesa. Kangaije vakajijirazve kubvira ku madhodha o kare ainga akagondeka kana kubva ku matahwa o kare. Abhirahama no mbhuri yake avazivi kumbokanganwa zvigondiso zva Mwari, zve ivona vaida kurangarijisisa ngo pamusoro po zvipikihwa zvondhozvo. Inga muviyo, ivona avacaimbokana-kana kuti Jehovha waizokwanirisa zvipikihwa zvake. Ngo kudaro ivona vakaramba vakagondeka kwaari pikija pavaitambujika kana kuteverehwa.

7. Jehovha ari kutipenyi kuti tivangise rutendo hwedu, zve tinodikana kuitenyi?

⁷ Zvicinyi zvingatibesera kuramba tino gonda rakavanga? Jehovha wakatipa Bhaibheri  kuti ritijijise ngo pamusoro po zvigondiso zvake kuitira kumbeji. Mu Bhaibheri, iyena anotikhombija zvicinyi zvatinodikana kuita kuti tive vakadakara. Ngo iyo ndava tinodikana kuverenga Bhaibheri njiku ngo njiku zve toteveja ndhungamiriro jaro. (Nduyo 1:1-3; verenganyi Maitiro o Vapostori 17:11.) Jehovha anotipazve “bzokuha ngo nguva kwayo” ecishandisa “muranda wakagondeka no wakangwara.” (Mateu 24:45) Mukufanana kamare no vandhu va Mwari vo kare, tinodikana kuverenga ngo pamusoro po zvipikihwa zva Mwari perepo torangarijisisa ngo pamusoro pazvo. Izvi zvinozotibesera kuramba takagondeka kuna Mwari no kuramba tecivetera nguva yo kuti Umambo hwa Mwari hunozotonga pasi pese.

8. Kuita mukumbiro kungavangisa kudini gonda redu?

⁸ Zvicinyizve zvakabesera vandhu va Jehovha kareko, kuti varambe vano gonda ravo rakavanga? Ivona vaiita mukumbiro kuna Jehovha kuitira kubesehwa, zve mukumbiro javo pajaidavihwa, rutendo hwavo hwaivanga kamare. (Neemia 1:4, 11; Nduyo 34:5, 16, 18; Danieli 9:19-21) Ngo maitiro ondhowo, patinovona kuti Jehovha wapurutana mukumbiro jedu zve ari kutipa pa nguva kwayo kamare zvatiri kuda, rutendo hwedu kwaari hunovanga. (Verenganyi 1 Johani 5:14, 15.) Tinodikana ‘kuramba tecikumbira’ Jehovha kuti atipe mujimu mucena wake kuitira kuengejera rutendo hwedu.—Luka 11:9, 13, Shanduro yeNyika Itsva.

9. Ngo zvapi zviro zvimweni zvatinodikana kukumbira?

⁹ Patinoita mukumbiro kuna Jehovha, tinodikana haiwa basi kumukumbira kuti atipekeje zvatinoda. Tinodikana kumubonga no kumukuja njiku jese. Pa musoro pa zvese, iyena wakaita zviro zvizinji zvinoshamaisa! (Nduyo 40:6) Vandhu va Mwari vanoitavo mukumbiro kuitira hama javo pasi pese. Inga muezaniso, ‘tinorangariravo vakasungwa.’ Tinodikanavo ‘kuceukija vatungamiriri vedu.’ Patinovona madavirire anoita Jehovha mukumbiro jedu, rutendo hwedu hunovanga zve tinokhwedera phedo naye.—Vaheberi 13:3, 7.

10. Zvicinyi zvakabesera vazinji kuva vakacunga zve kuramba vakagondeka kuna Jehovha?

¹⁰ Pa Vaheberi cipauko 11, mupostori Pauro wakananga kudari: ‘Vanakaji vamweni vakaashira vokufa vavo pavakamuswa, asi vanarume vamweni vakatambujwa ngokuti vakaramba kusununguhwa ngo thangwe rimweni, kuti vawane kumuswa kuri nani.’ (Vaheberi 11:35, Shanduro yeNyika Itsva) Vazinji vakacungirira pa muejo zve vakaramba vakagondeka kuna Mwari ngokuti vaitenda kamare kuti Mwari waizomusa inga zvaakapikira. Ivona vaiziva kuti kumbejiyo, Jehovha waizovaviisazve ku upenyu zve vorarama no kucingaperi pasi pano. Rangariranyi ngo pamusoro pa Nabhoti na Zakaria. Ivona vakafuhwa ngo mapuwe mbhera vofa ngo ndava yo kuzwira Mwari. (1 Majimambo 21:3, 15; 2 Kronike 24:20, 21) Dhanyeri wakakhandihwa mu gomba rainga no mbhondoro jainga no njara, zve shamwari jake jakakhandihwa mu gomba ro muriro. Vese vainga vakasunga kuti zviri nani  kufa kusiyapo kutama kugondeka kuna Jehovha. Vanarume ava vaitenda kuti Jehovha waizovapa mujimu wake mucena no kuvabesera kuti kucungirira pa zvineso zvese izvo.—Danieli 3:16-18, 20, 95; 6:14, 17, 22-24; Vaheberi 11:33, 34.

11. Muejo japi jakacungirihwa ngo vaphorofita vamweni ngo kuva no rutendo?

¹¹ Vaphorofita vazinji, vakadari inga ndi Mika na Jeremia, vaishohwa kana kusungwa. Vamweni, vakadari inga ndi Erija, “vaifamba vecitiza mu matundhu no mu mapani, vecigara mu mabambha no mu maguru.” Vese vakacungirira zvineso no kuramba vakagondeka kuna Mwari ngokuti ‘zvokadi vainga no zviro zvovaivetera.’—Vaheberi 11:1, 36-38; 1 Majimambo 18:13; 22:24-27; Jeremia 20:1, 2; 28:10, 11; 32:2.

12. Ngo wapi muezaniso wakanaka maningi watingatevejera? Zvicinyi zvakavabesera kucungirira muejo?

¹² Jesu Kristu wakacungirira muejo wainesa maningi kupinda uri wese hao zve voramba wakagondeka kuna Jehovha. Zvicinyi zvakamubesera kucungirira? Pauro wakatara kudari: “Eciziva rudakaro hwaizomuviira, wakadavira kufa pa [“danda ro kutambujikira,” Shanduro yeNyika Itsva], acikanyoejeki. Wogara pa mukono muho wo dendemaro ra Mwari.” (Vaheberi 12:2) Pauro wakavangisa maKristu kuti ‘nasanyi kurangarijisisa’ ngo pamusoro po muezaniso wa Jesu. (Verenganyi Vaheberi 12:3.) Mukufanana na Jesu, maKristu mazinji o muzana ro kutanga ro makore akafa ngo kuti vaida kuramba vakagondeka kuna Jehovha. Umwe wavo wainga Antipa. (Apokalipsi 2:13) MaKristu awo akatopera kuashira mupfupo wao, mukusiyana no vashandiri va Mwari vamweni vakararama mukuvo wo kare kamare, vano vetero yo kurarama pasi pano. (Vaheberi 11:35) Nguva shomani Jesu naapera kugajwa inga Mambo mu gore ro 1914, maKristu akazojwa ainga akafaya, akamusihwa kwenda upenyu hucikafi mu gore, zve iwona anozotonga pamwepo naye.—Apokalipsi 20:4.

13, 14. Muejo japi jakacungirihwa ndi Rudolf Graichen, zve zvicinyi zvakamubesera kuramba wakagondeka kuna Mwari?

¹³ Zviuru zvo vashandiri va Mwari vanotevera muezaniso wa Jesu. Ivona vanorangarijisisa mu zvigondiso zva Mwari zve vanoramba vakagondeka kwaari pavanosongana no zvineso. Vonanyi Rudolf Graichen, wakabahwa ku Aremanya mu gore ro 1925. Paainga ari mujaha, vabari vake vainga vakapakaika mapikica o zviitiko zvo Bhaibheri mu mapiravira o nyumba yavo. Iyena wakananga kudari: ‘Pikica imwe yaikhombija bumbhi riri pamwepo no bvuta, cimbuji pamwepo no khamba, thoyo kana buru pamwepo no mbhondoro—zvese mu runyararo, zvecihaviswa ngo cimwana.’ (Isaia 11:6-9) Izvi zvakabesera Rodolf kuti arangarire maningi ngo pamusoro po paradhiso pasi pano zve zvakavangisa rutendo hwake. Inga muviyo, iyena wakaramba wakagondeka kuna Jehovha pikija wakateverehwa maningi ko makore akawanda ngo vo  Nazi Gestapo (vainga vo imwe partidhu yo ku Aremanya), perepo wakazoteverehwa ngo Comunist Stasi yo Aremanya Orientari.

¹⁴ Rodolf wakavangirira muejo muzinji jimweni. Mai wake vakafa ngo ndhendha yaizwi tifu ku ndau yaigara vasungwi yaidanijwa Ravensbrück. Baba wake vakasaina phepha rainanga kuti ivona vainga vacikadizve kuva Capupu ca Jehovha. Asi Rodolf wakaramba ano gonda rakavanga. Paakabudiswa mu karaboso, iyena wakashanda inga muvonereri wo ndharaundha. Pasure pazvo wakakokwa kwenda ku Cikora co Giriadhi zve wakagajwa kooshandira ku Shire, iyo kwaashandirazve inga muvonereri wo ndharaundha. Kondhoyo iyena wakarovorana no imwe hambzaji yainga misionario yaidanijwa, Patsy. Zvinosuruvarisa ngo zvo kuti, papera gore rimwe, mwana wavo wokaji, wakatamika. Papera mukuvo, Patsy wakatamikavo. Iyena wainga no 43 basi o makore o kubahwa. Pikija no zvineso zvese izvi, Rudolf wakaramba ecishandira Jehovha. Pikija hazvo painga waamusharuka zve ecineseka-neseka, iyena waishanda inga  piyona wo nguva jese zve mukuru wo ungano. Tingaverenga ndhorondho yo upenyu hwake mu mujeura wo Murindiri wo 1 ya Katutu wo gore ro 1997 wa, mapheji 20-25, mu ciShona. ^[1] (Vonanyi masoko o kupejisira.)

15. Pekejanyi muezaniso munganani jo hama no hambzaji jiri kushandira Jehovha nyamasi uno pikija jiri kuteverehwa.

¹⁵ Nyamasi uno, uzinji hwo hama no hambzaji jedu jiri kushandira Jehovha no mudakaro pikija jiri kuteverehwa maningi. Mazana o hama no hambzaji iji jiri mu majere ku Eritrea, Singapore, zve Koreya dhu Suri ngo kuramba ‘kubata banga.’ (Mateu 26:52) Inga muezaniso hama Isaak, Negede, na Paulos vari mujere ku rimwe jere ro ku Eritrea ko makore 20! Ivona vari kutambujwa maningi. Zve mukati mo makore ese aya avaripi kukwanisa kuwana mukana wo kurovora kana kukorondha ukama hwavo. Pikija zvakadaro ivona vakagondeka kuna Jehovha zve rutendo hwavo hwakavanga. Pikija vangwariri vo majere o vari waro vaakuvareremeja. Mungakwanisa kuvona mupikica javo mu saite jw.org. Vari kunyemwerera, pikija vari pa nyatwa.

16. Rutendo hwakavanga ungamubesera kuitenyi?

¹⁶ Uzinji hwo Zvapupu zva Jehovha ahuripi kudihwa mu jere kana kutambujwa inga hama jedu jotanangaya pakutanga. Asi vazinji vari kutambujika ngo urombo, ngozi jinoitika jega kana hondo. Vamweni vari kutevejera muezaniso wa Abhirahama, Izaki, Jakobe na Mosi zve ngo kudaro vari kusiya kupsaka nduma kana upfumi ngo kuda kushandira Jehovha. Zvicinyi zviri kubesera hama jedu kuramba jakadakara jecishandira Jehovha? Rudo hwajo kwaari no kuva no rutendo hwakavanga ku zvigondiso zvake. Ijona jinoziva kuti Jehovha anozopfupa vashandiri vake vakagondeka ngo upenyu hucikaperi mu nyika imbza icina kutama kurungama.—Verenganyi Nduyo 37:5, 7, 9, 29.

17. Mungaitisa kudini kuti murambe muno rutendo hwakavanga, zve tinozobhuyenyi pa musoro unotevera?

¹⁷ Pa musoro uno, tavona kuti kuitisa kudini rutendo “ndihwona hwokadi hwokuti tino bziro bzo tinovetera.” Kuti tive no rutendo hwakadaro, tinodikana kuita mukumbiro kuna Jehovha zve toramba tecirangarijisisa zvigondiso zvake. Perepo tinozokwanisa kucungirira pa muejo uri wese. Pa musoro unozotevera tinozobhuya maningi ngo pamusoro po kuti zvinoda kurevenyi kuva no rutendo.