Kubhuisana no vana venyu zvinoreva kuvavhunja zvamuri kurangarira no mazwiro enyu, ivona vonangavo zvavari kurangarira.

Vana pavanotanga kukura vanonesehwa maningi kubhuya no vabari vavo. Bhuku rinozwi Decifrando o Código, rinoti: “Vana pavanonga vaciri vadoko, vanonga vakasujunuka kuti vabhuye no vabari vavo ngo pamusoro po zvese. Pavanokura, vanonga vacikadizve kubhuya no vabari vavo.” Asi pa nguva iyi, vabari ndipona pavanodikana kubhuya maningi navo.

Garanyi makanasiririka kuti mubhuye no mwana wenyu. Bhuyanyi no mwana wenyu paanonga wakasujunuka, azvinenyi dangani kwaausiku kamare.

“Nguva jimweni mungarangarira kuvhunja mwana wenyu kudari: ‘Unoda kubhuya nainini wari kamare? Cingo kwaejaya tainga tese pano’! Asi amuzomuvhunji henyu, ngokuti inga mubari munoda maningi kuti mwana wenyu amuvhunje zvaari kurangarira.”—Risa.

“Ndinodakarira maningi kuvata sedho. Asi mabhuyo anodakajisa maningi ondakaita no vana vangu, ndakamaita pakati po usiku.”—Herberto.

BHAIBHERI RINOTI: “Umwe nga umwe anodikana kuenderera mberi ecipsaka zvinobesera vamweni. Aadikani kupsaka zvinomubesera basi.”—1 Vakorinte 10:24.

Mucatendera kuti ciri cese cimuphingaije pamunonga mecibhuya no mwana wenyu. Baba vamweni vakati: “Nguva jimweni, pandinonga ndecibhuya no vana vangu, ndinonga ndecirangarira zvimweni. Ivona vanokwanisa kuzvivona kuti nditori ndhambo hangu.”

Kudari munophingaijika ngo ndava yo terevhisori kana foni, zvijimenyi. Nasanyi kuteya njeve mwana wenyu paanonga ecivereketa, vonesanyi kuti munoda kamare kuzwa zvaari kunangaro, pikija zvicikanasi kuzika hazvo.

“Tinodikana kukhombija kuti tinoreremeja maningi mazwiro no zviya zvinonangwa ngo vana vedu. Kudari ivona vakazwisisa kuti ativareremeji, avazotivhunji zviri kuvanesa kana kuti vanotopsaka mundhu umweni kuti avabesere.”—Maranda.

“Mucadokasika kunyangajwa, pikija zviri kunangaro mwana wenyu asipi zvokadi.”—António.

BHAIBHERI RINOTI: “Nasanyi kupurukira mazwiro amunoita.”—Ruka 8:18.

Bhuyanyi no vana venyu pamunonga meciita zviro zvimweni. Nguva jimweni, vana vanojizwa vakasujunuka kuti vabhuye nemwi pamunonga meciita zvimweni.

“Tinobhuya no vana vedu patinonga tiri mu karu tecienda kuri kwese. Tinoshandisa mukana uwu kuti tibhuye navo. Manera atinonga takagara mu karu anobesera kuti tive no mabhuyo anodakajisa.”—Nicore.

Vabari vangakwanisavo kubhuya no vana vavo pavanonga veciha.

“Pa nguva yo kurarira, umwe nga umwe wedu anonanga zviro zvaushoni no zvakashata zvamuitikira pa njiku yese. Izvi zvinoita kuti tive takabana no kutipa cokwadi co kuti apana anodikana kuhwisana no zvineso zvake naari ega.”—Robini.

BHAIBHERI RINOTI: “Mundhu wese anodikana kukasika kuzwa, wononoka kuvereketa.”—Jakobo 1:19.