CIPAUKO 1
Uku Ndikona “Kudisa Mwari”
“Ngokuti, kudisa Mwari ndikona kuteveja mupango yake. Mupango yake airemi.”—1 JOHANI 5:3.
1, 2. Cicinyi cakamundunda kuti mude Jehovha Mwari?
IMWIMWI munomuda Mwari here? Kudari makajipira mu ushamwari na Jehovha zvokadi kamare mupinguro wenyu unozova hina! Ngo zvokadi kamare kuti tinodikana kuda Jehovha. Rudo hwedu kuna Jehovha i mupinguro wo rudo hwake kuna itusu. Bhaibheri rinozvinanga kudari: “Itusu ngatimude, ngo kuti ndiyena [Jehovha] wakatanga kutidisa.”—1 Johani 4:19.
2 Jehovha wakatanga kukhombija rudo kwatiri. Iyena wakatipa nyika yo pasi iyo iri muzi wedu wakaseja. Iyena anotipa zvinodiwa zvedu zvo kunyama. (Mateu 5:43-48) Zvinosisira maningi ngo zvokuti anotipa zvinodiwa zvedu zvo kumujimu. Wakatipa Soko rake, Bhaibheri. Kuengejera pa izvi, Jehovha anotikoka kuti tiite mukumbiro kwaari no gwinyiso ro kuti iyena anozopurutana zve anozotipa mujimu mucena wake kuti utibesere. (Nduyo 65:2; Luka 11:13) Pamusoro po zvese, iyena wakatumira Mwana wake anosisira maningi, kuti ave Muponesi wedu kuitira kuti tibviswe mucishaishi no mu rufu. Rudo hwakakura zvakadini wakakhombija Jehovha kwatiri!—Verenganyi Johani 3:16; VaRoma 5:8.
3. (a) Zvicinyi zvinodiwa kwatiri kuti tirambe tiri mu rudo hwa Mwari? (b) Mubvunjo wapi unosisira maningi watinodikana kuita, zve mupinguro wao unowanika kwapi?
3 Jehovha anoda kuti tibesereke ngo rudo hwake, kwenda no kwenda. Asi, kuramba teciashira kana kuti haiwa, besero ro rudo hwake zvinofira kwatiri. Soko ra Mwari rinotipangira kudari: “Vanganyi [kana kuti rambanyi] mu rudo hwa Mwari, mucivetera unyaxa hwa Tenji wedu Jesu Kristu, hunozomupa uhomi hucingaperi.” (Juda 21) Masoko okuti “Vanganyi [kana kuti rambanyi] mu” anovonesa kuti, tinodikana kuita ciito, kuti tirambe tiri mu rudo hwa Mwari. Tinodikana kuhwirijira rudo hwaanotikhombija ngo maitiro anovoneka kamare. Ngo kudaro, mubvunjo unosisira maningi kwatiri nga uu: ‘Ndingakhombijisa kudini rudo hwangu kuna Mwari?’ Mupinguro unowanika pa masoko aya akafemehwa o mupostori Johani okuti: “Ngokuti, kudisa Mwari ndikona kuteveja mupango yake. Mupango yake airemi.” (1 Johani 5:3) Tinodikana kunasa kupopora ushoni zvinoda kureva magama aya, ngokuti tinoda kukhombija Mwari wedu kuti tinomuda maningi.
UKU NDIKONA “KUDISA MWARI”
4, 5. (a) Masoko okuti “Kudisa Mwari” anoda kurevenyi? (b) Sananguranyi kuti rudo hwenyu kuna Jehovha hwakatangisa kudini kukura mu mwoyo mwenyu.
4 “Kudisa Mwari”—zvicinyi zvainga mu murangariro mo mupostori Johani paakatara masoko aya? Masoko aya aanangiri rudo hwa Mwari kwatiri, asi anonangira rudo hwedu kuna iyena. Munoceukija rudo hwenyu kuna Jehovha pahwakatanga kukura mu mwoyo mwenyu here?
Kuzvipira zve kubhabhatijwa kunotatija matangiro o upenyu wo kuzwira ko rudo kuna Jehovha
5 Toranyi cimukuvo kuti murangarire pamakatanga kujijira cokwadi ngo pamusoro pa Jehovha, no cidisiso cake zve motanga kuva no gonda. Mwakaguma pakuzwisisa kuti pikija mwakabahwa muri mushaishi wakaparajana na Mwari, Jehovha ecishandisa Kristu, wakafunungura gwanja kwamuri kuti mukwanise kuwana kukwana kwakaruza Adhamu no kuwana upenyu hucikaperi. (Mateu 20:28; VaRoma 5:12, 18) Mwakatanga kuzwisisa makurire o cibairo cakaita Jehovha ngo kutumira Mwana wake anosisira maningi kuti avie kuzomufira. Zvakamutora mwoyo, motanga kuva no rudo kuna Mwari, uwo wakakhombija rudo hukuru kamare kwamuri.—Verenganyi 1 Johani 4: 9, 10.
6. Rudo hwokadi-kadi unokhombijiswa kudini, zve rudo hwenyu kuna Mwari hwakamundunda kuti muitenyi?
6 Apo, mwainga mucitotanga kuva no rudo hwokadi-kadi kuna Jehovha. Rudo, asipi mazwirovo hao basi; nee asipi ciro cinonangwa ngo muromo basi. Rudo hwo kadi-kadi kuna Mwari hunopinda kunanga basi kuti: “Inini ndinoda Jehovha.” Mukufanana no gonda, rudo hwokadi-kadi unovoneka ngo zviito. (Jakobo 2:26) Zviitozvo tinozviitira wiya watinodaya maningi. Ngo kudaro, rudo hwenyu kuna Jehovha pahunocira muji mu mwoyo mwenyu, imwimwi munova no cido co kurarama mukuzwirana mu maitiro anodakajisa Baba wedu vo mugore. Muri Capupu cakabhabhatijwa here? Kana zvakadaro, rudo uhu no kutendeseka ndizvona zvakamundundira kuti muite cisungo ici cinosisira maningi mu upenyu hwenyu. Mwakajipira pacenyu kuti muite kuda kwake, zve mwakakhombija kuzvipira kondhoko ngo kubhabhatijwa. (Verenganyi VaRoma 14: 7, 8.) Kukwanirisa cigondiso ici cinoreremejwa maningi kuna Jehovha, zvinobatanija zvakazonanga mupostori Johani.
“KUTEVEJA MUPANGO YAKE”
7. Ngo yapi mupango imweni ya Mwari, zve kuizwira zvinobatanijenyi?
7 Johani wakasanangura kuti kuda Mwari zvinoreva: “Kuteveja mupango yake.” Ngo yapi mupango ya Mwari? Jehovha wakatipa mupango muzinji jakanasa kunangwa kamare ecishandisa Soko rake, Bhaibheri. Inga muezaniso, iyena anorambisa zviito zvakadari inga kudhakwa, mufambiro wakashata wo vatano, kunamata zvithombi, kuba no kunyepa. (1 VaKorinto 5:11; 6:18; 10:14; VaEfeso 4: 28; VaKolosi 3:9) Kuzwira mupango ya Mwari zvinobatanija kurarama mukuzwirana no mutemo jakajeka jo mu Bhaibheri ngo pamusoro po mufambiro.
8, 9. Tingazvizivisa kudini zvinoda Jehovha pikija pa mugariro jicina mutemo kamare jakajeka jo mu Bhaibheri? Ipanyi muezaniso.
8 Asi, kuti tidakajise Jehovha, atidikani kuzwira basi mupango yake. Jehovha aatibzinyiriri ngo kutipa mutemo jinonanga zvese zvatinodikana kuita pa njiku ngo njiku. Ngo kudaro, pa mararamiro edu o njiku ngo njiku, tingasongana no mugariro jicikazivi kunangwa zvakajeka pa mupango yo mu Bhaibheri. Mu mugariro jakadaro, tingazvizivisa kudini zvinodakajisa Jehovha? Bhaibheri rino murangariro jakajeka ja Jehovha. Patinonga tecijija Bhaibheri, tinozwa kuti ngo zvapi zvinoda Jehovha zve ngo zvapi zvaanozonda. (Verenganyi Nduyo 97:10; Mazwi Akangwara 6:16-19) Tinoguma pakuzwisisa murangariro pomwe no zviito zvaanoreremeja. Patinonga tecienderera mberi mukujija ngo pamusoro po undhu hwa Jehovha pomwe no makwanja ake, tinozoendereravo mberi tecikwanisa kusia kuti murangariro jake jiumbe zvivaringo zvatinotema, zvopsasa zviito zvedu. Ngo kudaro, pikija pa mugariro jicina mutemo jakanangwa kamare mu Bhaibheri, itusu tingakwanisa kuzwisisa “kuda ka [Jehovha].”—VaEfeso 5:17.
9 Inga muezaniso, Bhaibheri arina mutemo unorambisa kamare kuvona mavhidhio kana zvirongwa zvo mu Terevhizau zvinovonesa zvo ugevenga kana zvo uhure. Asi kureva kuti tinodikana kuva no mutemo unorambisa kuvona zvirongwa izvi kuti titame kuzvivona here? Itusu tinoziva kuti ngoapi mavonero a Jehovha ngo pamusoro po kuvona zviro izvi. Soko rake rinotibvunja zvakajeka kudari: “[Jehovha] anonyenya vaya vanodisa kujipa [ kana ugevenga].” (Nduyo 11:5) Bhaibheri rinotibvunjazve kudari: “Vaya vanohura no kupombora vanozotongwa ndi Mwari.” (Vaheberi 13:4) Tikarangarira ngo pamusoro po masoko aya akafemehwa, tingakwanisa kuzwisisa zvakajeka kuti ngo kwapi kuda ka Jehovha. Ngo kudaro, itusu atibungaiji ngo kuvona zviito zvinozonda Mwari wedu. Tinoziva kuti Jehovha anodakajihwa patinotiza mufambiro wakashata unovoniwa mu nyika inga ucikakhuvazi. *
10, 11. Ngenyi tinokheta gwanja ro kuzwira Jehovha, zve kuzwira kwakadini kwatinodikana kuva nako kwaari?
10 Ngo rapi thangwe guru rinotiitisa kuti tizwire mupango ya Mwari? Ngenyi njiku jese tinoda kurarama mukuzwirana no murangariro ja Mwari? Itusu atikheti gwanja rondhoro basi kuti timbzenge kupanicwa kana kuti titize muvio jakashata jinoviira vaya vanoreja-reja zvinoda Mwari. (VaGalàsia 6:7) Pa ndau pazvo, kuzwira kwedu Jehovha tinokuvona inga mukana unosisira wo kukhombija rudo hwedu kwaari. Mukufanana no mwana anoda kuvona baba vecimusekera ngo kuti wavadakajisa, itusuvo tinodavo kudakajisa Jehovha. (Nduyo 5:12) Iyena ndi Baba wedu, zve itusu tinomuda. Apana cinoviisa mudakaro mukuru kwatiri kupinda kuziva kuti tiri kurarama mu mugariro unotiita kuti tiwane “unyaxa hwa [Jehovha] Mwari.”—Mazwi Akangwara 12:2.
11 Ngo kudaro, kuzwira kwedu akudikani kuva inga ngo kokuvangirijwa; nee kuita ngo kukheta ngo wapi mutemo watinoda kuzwira, ngo wapi waticikadi kuzwira. * Itusu atipsaki zve kukheta kuzwira basi patinovonaya kuti zvakareruka, pana zvineso zvishoma kana kuti pacitona zvineso kamare. Kusiapo izvi, itusu ‘tinozwira ngo mwoyo wese.’ (VaRoma 6:17, Shanduro yeNyika Itsva) Tina mazwiro akadari inga o muimbi wo nduyo jo mu Bhaibheri wakatara kudari: “Kudakara kwangu kuri mu mupango yenyu: ndinoida.” (Nduyo 119:47) Hina, itusu tinodisisa kuzwira Jehovha. Tinozviziva kuti iyena anofanera—zve anoda—kuzwira kwedu kwakaperera kamare. (Deuteronòmio 12:32) Tinoda kuti Jehovha anange ngo pamusoro pedu inga zvinonanga Soko rake ngo pamusoro pa Nowa. Ngo pamusoro pa teteguru Nowa, vaigondeka, avo vakakhombija rudo kuna Mwari ngo kumuzwira ko makore akawanda, Bhaibheri rinoti: “Noa wakaita kudaro; wakaita bzese bzaakabvunjwa ndi Mwari.”—Genesi 6:22.
12. Kuzwira ko mukhaindinyi kunodakajisa mwoyo wa Jehovha?
12 Jehovha anozwa kudini patinomuzwira ngo kuda kamare? Soko Rake rinonanga kuti izvi ‘zvinodakajisa mwoyo’ wake. (Mazwi Akangwara 27:11) Ndizvonadi here kuti kuzwira kwedu kunodakajisadi kamare Tenji wedu Mukurukuru wo mudenga no pasi? Hina, kunomudakajisa kamare—zve iyena ana thangwe rakanaka kuti adakajihwe! Jehovha wakatisika no rusujunuko wo kujikhetera. Izvi zvinoreva kuti tino rusujunuko wo kukheta; tingakheta kuzwira Mwari kana kutama kumuzwira. (Deuteronòmio 30:15, 16, 19, 20) Patinokheta kuzwira Jehovha ngo kuda kwedu kamare, zve patinoita cisungo co kumuzwira ngo kundundhwa ngo mwoyo wakazara ngo rudo na Mwari, izvo zvinoviisa mudakaro mukuru kuna Baba wedu vo mugore. (Mazwi Akangwara 11:20) Itusuvo tinonga tecikheta gwanja rakanaka ro upenyu.
“MUPANGO YAKE AIREMI”
13, 14. Ngenyi tingananga kuti mupango ya Mwari “airemi,” zve tingazviezanisira kudini?
13 Mupostori Johani anotibvunja ciro cimweni cinovangisa maningi ngo pamusoro po zvinoda Jehovha kwatiri, cokuti: “Mupango yake airemi.” Sandujo imweni yo Bhaibheri inonanga kudari: “Mupango yake aitibzinyiriri”pa 1 Johani 5:3, Nova Versão Internacional. * Mutemo ja Jehovha ajipindiriji mudida kana kuti ajiremi. Mutemo jake ajinesi kuteveja kuna vandhu vacikazivi kukwana.
14 Tingazviezanisira kudari: Shamwari yenyu yo phedo yomukumbira besero painonga icida kuthutha kwenda ku nyumba imweni. Pana mabhokiso mazinji anodikana kuthwahwa. Mabhokiso amweni akareruka zvokuti mundhu anokwanisa kumathwara ega, asi amweni anorema zvokuti angatoda kuthwahwa ngo vandhu vaviri. Shamwari yenyu yomukhetera mabhokiso amunodikana kuthwara. Kureva kuti yaizomukumbira kuti muthware mabhokiso ainoziva kuti aizomuremera maningi here? Haiwa. Iyona aicaizoda kuti mukhuvazike ngo kueja kumathwara mwega. Mukuezana, Mwari wedu wakanaka mwoyo zve ana rudo, aatikumbiri kuti tizwire mupango jaanoziva kuti jinonesa maningi kwatiri. (Deuteronòmio 30:11-14) Iyena aacaizotikumbira kuti tithware mutoro unorema kudaro. Jehovha anoziva zvaticikakwanisi, ngo kuti “yena anoziva kuruhwa kwedu, anocereceja kuti tiri bukuta.”—Nduyo 103:14.
15. Tingathembesa kudini kuti mupango ya Jehovha iripo kuitira kugarisika kwedu?
15 Mupango ya Jehovha airemi nee padoko; iyona iripo kuitira kutibesera. (Verenganyi Isaia 48:17.) Mosi wakabvunja Iziraeri yo kare kudari: “[Jehovha] Mwari wedu wakatibvunja kuti titeveje matongero aya ese, tecithya Jehovha Mwari, kuti bzese bzifambe uxoni kotiri, njiku jese, kuti atiponese, inga bzinovoneka nyamasi.” (Deuteronòmio 6:24) Itusu tingava no cokwadi co kuti Jehovha paanonga ecitipa mutemo jake, mu mwoyo mwake anonga ecida kugarisika kwedu ko kwenda no kwenda. Zvokadi kamare, andizvopi zvataizovetera kwaari here? Jehovha ndi Mwari ana ruzivo ucikapimiki. (VaRoma 11:33) Ngo kudaro anoziva ngo zvapi zvakanaka kwatiri. Iyenazve i muezaniso mukuru wo rudo. (1 Johani 4:8) Rudo, mugariro mukuru wake, unobatanijwa pa zvese zvaanonanga no kuita. Pa rudo ndipona pakacijikira mupango yese yaanopekeja vashandiri vake.
16. Pikija no kuvangirijwa ko nyika yakashata pomwe no nyama yedu icikazivi kukwana, ngenyi zvingakwanisika kuzwira Mwari?
16 Izvi azvirevi kuti kuzwira Mwari i gwanja rakareruka kufamba. Tinodikana kuhwisana no kuvangirijwa ko nyika ino yakashata, iyo “iri mu nyara ya Sathana.” (1 Johani 5:19) Tinodikanazve kuhwisana no kutama kukwana ko nyama, iyo yakapeamira ku kuda kuphwanya mutemo ja Mwari. (VaRoma 7:21-25) Asi, rudo hwedu kuna Mwari hungabudirira. Jehovha anokomborera vaya vanoda kukhombija rudo hwavo kwaari ngo kumuzwira. Iyena anopa mujimu wake mucena kuna ‘vese vanomuzwira inga mutongi.’ (Maitiro o Vapostori 5:32, Shanduro yeNyika Itsva) Mujimu wondhowo unobara mucero jakanakisisa kwatiri—mugariro jinosisira jingatibesera kuti timuzwire.—VaGalàsia 5:22, 23.
17, 18. (a) Zvicinyi zvaticazopopora mu bhuku rino, zve patinonga tecizviita, zvicinyi zvatinodikana kuceukija? (b) Zvicinyi zvinozobhuiwa pa cipauko cinotevera?
17 Mu bhuku rino, ticazopopora zviambi no mutemo ja Jehovha ngo pamusoro po mufambiro no zvimweni zvinokhombija kuda kwake. Patinonga tecizviita, kuna zviro zvinosisira zvatinodikana kuceukija. Ngaticeukije kuti Jehovha aativangiriji kuzwira mutemo no zviambi zvake; iyena anoda kuti timuzwire zvecibva mu mwoyo mwedu kamare. Ticadokanganwa kuti Jehovha anotikumbira kuti tirarame mumaitiro anozoviisa makomborero mazinji wari zve anozotitungamirira ku upenyu ucikaperi kumbejiyo. Ngativone kuzwira kwedu ngo mwoyo wese inga mukana unosisira wo kukhombija Jehovha kuti tinomuda maningi.
18 Kuitira kutibesera kuziva cakanaka no cakashata Jehovha ngo rudo wakatipa hana. Asi, kuti hana ive mutungamiriri anogondeka, iyona inodikana kurovejwa, inga zvinozobhuiwa ngo cipauko cinotevera.
^ ndim. 9 Vonanyi cipauko co 6 co bhuku rino muzwe kuti tingakhetesa kudini mabungaijo akanaka.
^ ndim. 11 Pikija mujimu jakashata, jingazwira ngo kuvangirijwa. Jesu paakajibvunja kuti jibude pa umwe mundhu, ijona ngo kujizwa kuvangirijwa, jakatendera utongi hwake, pikija jicikazvidi.—Marco 1:27; 5:7-13.
^ ndim. 13 Pa Mateu 23:4, panoshandisa gama rokuti “mithwaro yokurema” kuitira kudurujira mutemo no muthetho jo cicete jaithigwa vandhu njiku jese ngo Vatari no vaFarisi. Gama rakaezana rakasandujwa kuti “kubzinyirira” pa Maitiro o Vapostori 20:29, 30, Shanduro yeNyika Itsva, kunangira muthwaro wo shupho yo vapanduki avo ‘vaizovereketa zviro zvicikazivi kururama’ no kupausa vamweni.
