Jesu no mbabva mbiri vanoendeswa ku ndau iri phedo no dhorobha kuti vauraihweyo. Ndau iyi inodanwa kuti Gorgota kana Ndau yo Dendhenya zve inovoneka “ngo ndhambo.”—Marco 15:40.

Vandhu vatatu vatongehwari kufa, vanobvisihwa nguvo javo. Perepo vanopuwa vhinyu yakabvengwa no mira no zvinoshasha. Zvingaita kuti doro rinoitisari kuti mundhu acadozwa kuhwajihwa, rakaitwa ngo vanakaji vo Jerusarema zve vaRoma avarambisi kuti ripuwe vandhu vari kuurawa. Asi Jesu paanoriravira, anoramba kurimwa. Ngenyi? Aadi kuti murangariro jake jiphingaijwe pa kuejwa kukuru uku; anoda kuziva zvese zviri kuitika no kuva wakagondeka mbhera kufa kwake.

Jesu anorajikwa pa zimiti. (Marco 15:25) Masoca anokohomera peregu mu nyara no musoka jake, vecibovora ganda rake no makarungihwa maphondo, zvecihwaja maningi. Zimiti iri porinomuswa, kuhwajihwa kwake kunoengejereka ngokuti kurema ko muviri wake kunocacura pakohomehwaya. Pikija zvakadaro, Jesu aatuki masoca aya. Iyena anokumbira aciti: “Baba! Vakungurirenyi ngokuti avabzizivi bzo vanoita.”—Luka 23:34.

VaRoma vano cirovejeso co kudira citatijo cinonanga cashaishwa ngo mundhu watongehwaro kufa. Pa mukuvo uu, Pirato anoita kuti padihwe citatijo cinoti: “Jesu MuNazareta, mambo wo vaJuda.” Icona cinotahwa ngo Cihebheru, Ciratini no Cigiriki, kuitira kuti vese vakwanise kucireri. Ciito ca Pirato ici, cinovonesa kunyenya kwaanoita vaJudha vaingaya vecida kuti Jesu aurawe. Ngo kunyangajwa ndizvona, vapiri vakuru vanoti: “Mucatara ‘Mambo wo vaJuda.’” Zvecivoneka kuti Pirato aadi kushandiswazve ndivona, anoti: “Bzondakatara, bzatahwa.”—Johani 19:19-22.

No vakanyangajwa, vapiri vakuru vanonangazve ucapupu hwo kunyepa hwovaitaya paitongwa ndhango ku Sinedriyo. Azvikahamarisi kuti vanopinda ndipona vanojunguja musoro veciseka no kutuka Jesu, veciti: ‘Ha! Iwewe waiti ndinophwanya Nyumba ya Mwari no kuivakabze mu njiku ndhatu, waro jiponesei, no kuderuka’ pa zimiti. Mukufananavo, vapiri vakuru no vatari vanobvunjana ngocavo kuti: “Kristu! Mambo wo vaIsraeli! Ngaaderuke wari . . . kuti tivone no kumutenda.” (Marco 15:29-32) Mbabva iri ku mukono muho no iri ku mukono boshwe, inomutukavo, kasike ndivona vatori no ndava.

Masoca marongomuna o Roma anoshoravo Jesu. Kangaije vamwa vhinyu inovava, ngokudaro, wari vari kushora Jesu vaciita inga vari kuda kumupa doro iri, vacizviziva kuti aakwanisi kuriashira. VaRoma vanotangavo kuseka Jesu ngo zvakatahwa panyezuru pake, veciti: “Kudari uri mambo wo vaJuda jiponesei wega.” (Luka 23:36, 37) Rangariranyi basi! Mundhu wakakhombijaya kuva gwanja, cokwadi no upenyu wari ari kushaisha kutajwa no kushohwa pacina caaita. Pikija zvakadaro, anoitihwa zvese izvi acikatuki vaJudha  varipo wari, masoca o Roma ari kumushorari kana kuti mbabva mbiri jakapakaikwarivo pa mativi ake.

Masoca marongomuna anotora nguvo ja Jesu jo kunja, ojikovanisa kuita mativi marongomuna. Iwona anoringijira zembe kuda kuvona kuti ndiani anotora divi rimwe na rimwe. Asi nguvo yo mukati ya Jesu, kana gemezi, ndhaushoni maningi, “aricaingepi no mukono, rairukwa rese rese kubva nyezuru mbhera pasi.” Masoca anoti: “Ticarigura. Ngatiringijire zembe, tivone kuti ndhaani.” Masoca aya anokwanirisa matahwa anoti: “Vanokovanisana bzokusimira bzangu; gemezi rangu rinoringijihwa ngo zembe.”—Johani 19:23, 24; Nduyo 22:19.

Pa kufamba ko nguva, umwe wo vashaishi anovona kuti Jesu anofaneradi kuva mambo. Iyena anovereketera mudoni wake ngo magama okuti: “Iwewe, pa dambujiko rondhoro ro unaro wari, authyi Mwari, kani? Itisu tinofanera kutambujika, tiri mu nyatwa inofanera mabasa edu; kaveta uu aazivi kuita ciro.” Iyena anokumbira Jesu kuti: “Ceukijanyi inini mukaguma ku umambo hwenyu.”—Luka 23:40-42.

Jesu anodavira kudari: “Zvokadi inini ndinokubvunja nyamasi kuti, iwewe unozova na inini,” kuciripi mu Umambo, asi “mu Paradhiso.” (Luka 23:43, Shanduro yeNyika Itsva) Cipikihwa ici cakasiyana no caakabvunjaya vapostori vake, cokuti, vanozogara nae pa zvigaro inga vatongi mu Umambo. (Mateu 19:28; Luka 22:29, 30) Asi, zvingaita kuti mbabva yo ciJudha iyi yakazwa ngo pamusoro po Paradhiso pasi pano, yakanasirihwaya ndi Jehovha pa kutanga kuti ive muzi wa Adhamu, Evha no mubarihwana javo. Wari mbabva iyi inofa no vetero iyi.