Hwaausiku maningi zvokuti macongwe oda kurira. Vapiri vanotenderana kupagari Judha ngo 30 o macereni o sirivha kuti atengese Jesu. Ngo kudaro Judha anotungamirira cikwata cakakura maningi co vapiri vakuru no vaFarisi kuti vawane Jesu. Pakati pavo, pano masoca o vaRoma akabatira zvikhai no mukuru-kuru umweni wo masoca.

Paagogomehwa ndi Jesu mumba mavahira Phasika, zvinoita inga kuti Judha wamukira kubata gwanja woenda ku vapiri vakuru. (Johani 13:27) Ivona vaunganija varindiri vavo no cikwata cimwe co masoca. Kangaije Judha watanga ngo kuvatora kwenda navo ku nyumba yo mudenga yainga yecihihwa Phasika ndi Jesu no vajiji vake. Wari varhwi vanodarika bani ro Kedroni vakarungama ku munda wo Getsemani. Vakati ini kuno zvikhai ini kuno mwenje wo kubveneka ndiwona, vecida kamare kusunga Jesu.

Judha paanotungamirira vandhu ava ku Dundhu ro Maorivhe, anozviziva kuti Jesu vanondomuwaneyo basi. Jesu no vapostori vake, kazinji vanoita maningi hwendo hwo kubva ku Bhetania kwenda ku Jerusarema. Mu hwendo iji, ivona vaidakarira maningi kuzorora padoko mu munda wo Getsemani. Asi wari hwaausiku, kangaije Jesu ari pa ndau ino cidima maningi yo mumunda pakati po muti jo Maorivhe. Waro masoca ainga acizivi kumbovona Jesu, aizomuzivisa kudini kuti Jesu nga uwu? Kuti avabesere, Judha anozovapekeja citatijo. Iyena anoti: “Uwo wondinompsompsa, ndi yena. Musungenyi mende naye mecimungwarira uxoni.”—Marco 14:44.

Paanonga ecitungamirira cikwata ici mumunda, Judha anovona Jesu no vapostori zve iyena anomukira kurungama kuna Jesu. Judha wonanga kuti: “Tamuvona, mujijisi!” Perepo omupsompsa kamare. Jesu womubvunjisa kuti: “Xamwari, waza koitenyi?” (Mateu 26:49, 50) Ecipingura ega mubvunjo waaita, Jesu anoti: “Juda, ngo mumpsompso unopa Mwana wo mundhu?” (Luka 22:48) Jesu watopejerana na Judha!

Jesu anokhwedera kwakaeja kuno mwenje, zve wobvunjisa kuti: “Munopsanga ani?” Izwanyi mupinguro wo masoca: “Jesu wo Nazareta.” Jesu anodavira no cicunge cese kuti: “Ndini.” (Johani 18:4, 5) Masoca anowa pasi ngo kukahamara ngo kuti andizvopi zvavaivetera.

Kunja ko kutotizira mucidima, Jesu anovabvunjisazve kuti muri kupsaka ani. Ivona vonangazve kuti, “Jesu wo Nazareta.” Zve iyena anovabvunja akathiva kamare kuti: “Ndamubvunja kare kuti ndini. Kudari mecindipsaka bzokadi, regeranyi ava kuti vapinde.” Pikija pa mukuvo uwu unonesa, Jesu aakanganwi zvaakananga kuti aazoruzi nee mujiji umwe hake. (Johani 6:39; 17:12) Iyena wakangwarira vapostori vake apana na umwe wakarasika “kuciripi mwana wo” kuparajwa—Judha. (Johani 18:7-9) Ngo kudaro, wari Jesu anokumbira kuti masoca aregere vajiji vake vakagondeka kuti vapinde.

Masoca paanoenda kuna Jesu, vapostori vanotanga kuvona kuti zviro zvotanga kushata. Ivona vanobvunjisa kuti: “Tenji, tovamukira ngo mapanga?” (Luka 22:49) Jesu acito adavira, Pedhru anotora rimwe ro mapanga avainga vaviya nao. Iyena anoceka njeve yo mukono muho wa Malko, umwe wo vashandi vo mupiri kukuru.

Jesu anobata njeve ya Malko woinamikijira, civonje cotooma. Perepo anopekeja cijijo cinosisira maningi kuna Pedhru eciti: “Dirai banga, mu ndau yaro; ngokuti ariwese anobata banga anozofa ngo banga.” Jesu aarambi kusungwa ngo kuti iyena anoti: “Angazotevejwa kudini Matahwa anonanga kuti bzinodika kuitika kudaro?” (Mateu 26:52, 54) Iyena anoengejera eciti: “Ndinozotama kumwa mukheyo wo ndakapuwa ndi Baba, kani?” (Johani 18:11) Jesu anotendera zvinoda Mwari kwaari, nee zvecidiwa kuti afe anotendera kufa.

 Iyena anobvunjisa masoca ayani kuti: “Maza kondisunga inga ndiri mbava, no mapanga no nduku. Njiku jese ndaigara pasi ndecijijisa mu Nyumba ya Mwari, amuzivi kundisunga. Kaveta bzese ibzi bzaitika kuti atevejwe Matahwa o vaporofeti.”—Mateu 26:55, 56.

Masoca, mutungamiriri wo masoca no varindiri vakatumihwa ngo vaJudha, vanobata Jesu vomusunga. Pavanovona izvi, vapostori vanokonehwa kuzvicijikira, votiza. Asi “mujaha umwe” kangaije mujiji Marko, anonghwina pakati po mbungano kuti aende kunoendaro Jesu. (Marco 14:51) Asi vandhu pavanoziva mujaha uwu vanoeja kumusungavo, ndipona paanozotiza kamare wotosia nguvo yake yo ruji hwo sava.