Ngo Mudimingu dhiya 16 ya Nisani, vajiji vakasuruvara maningi. Ivona avazwisisi kuti ngenyi guva aricina mundhu. (Mateu 28:9, 10; Luka 24:11) Pa kufamba ko nguva mu dhiya iyi, Kreopa no mujiji umweni vanobva Jerusarema kuenda Emausi, pa mumango wo makirometro anokwana kuita 11.

Povanoita hwendo, vanobhuya ngo pamusoro po zvakaitika. Mundhu umweni wo vacikazivi anobatana navo. Iyena anobvunjisa kudari: “Mabuyonyi ao o munobuyaro pa hwendo?” Kreopa anoti: “Ndiwe wega munyikanja, kani, mu Jerusalema, kuti aubzizivi bzakaitika njiku iji?” Iyena anobvunjisa kuti: “Kwakaitikenyi?”—Luka 24:17-19.

Ivona vanoti: “Bza Jesu wo Nazareta. . . . Itisu taivetera kuti yena angazoita muponesi wo vaIsraeli.”—Luka 24:19-21.

Kreopa no mudoni wake vanoenderera mberi vacisumura zvakaitika pa dhiya iyi. Ivona vanonanga kuti vanakaji vamweni vakaenda ku guva rakavigwa Jesu vorikhanda ricina mundhu. Vanakaji ava vakavona ngirozi ngo meso avo, jovabvunja kuti Jesu ari kupona. Vajiji ava vanonangazve kuti vamweni vakaendavo ku guva, “vowana bzese kudari ngo bzakanangwa ngo vanakaji.”—Luka 24:24.

Zvakajeka kuti vajiji vaviri ava, vakabararika hwiru ngo zviitiko izvi. Mundhu wo vacikazivi weya anorungamisa murangariro wakashata wovanawo, unoita kuti mwoyo yavo ineseke, eciti: “Vandhu vokutama hwiru no vokunonoka kutenda mu mwoyo mwenyu bzakatokoteswa ngo Vaporofeti! Abzicaifanerepi kani kuti Kristu atambujike ngo bzese kudaro, kuti anghwine mu goja?” (Luka 24:25, 26) Mundhu uu anoenderera mberi ecivadurujira mativi o mu Matahwa anobhuya ngo pamusoro pa Kristu.

Pakupejisira vanoguma phedo no Emausi. Zvecivoneka kuti vajiji vaviri ava vari kuda kuzwa zvizinji, vanobvunja mundhu wovacikazivi weya kuti: “Garai na itisu, ngokuti aa madeko, zuva ravira.” Iyena anotendera kugara navo, zve vanoha vese. Mundhu wo vacikazivi uu paanoita mukumbiro no kugura mukate, wovapa, ivona vanozomuziva, perapo wongara-ngara. (Luka 24:29-31) Wari vokhohwa kuti Jesu ari kupona!

Vajiji vaviri ava vacidakajihwa, vanobhuya ngocavo ngo pamusoro po zvavaitikira, vaciti: “Mwoyo wedu aucaibwakepi, kani, mu gwanja, powaibuya nesu, ecitidurujira Matahwa?” (Luka 24:32) Ivona vanokasika kuhwirira Jerusarema, kovanowana vapostori no vandhu vamweni. Kreopa no mudoni wake vacito vabhuya zvavaitikira, vanozwa vamweni vaciti: “Tenji wamuka bzokadi, wovoneka kuna Simoni.” (Luka 24:34) Perepo vovaviri vanosumura kuti Jesu wavabudirisa kudini. Ivona vamuvonavo ngo meso avo.

Wari vese vanokahamara—Jesu anovabudira vari mumba. Zvinoita inga kuti azvidaviriki ngokuti vafunga musuvo jese ngo kuthya vaJudha. Pikija zvakadaro, Jesu anoima pakati pavo kamare. Naakathiva, Jesu anoti: “Kunyarara komuri!” Ivona vari kuthya. Inga zvovakaitayazve, vanorangarira kuti vari “kuvona gira” kana mujimu.—Luka 24:36, 37; Mateu 14:25-27.

Kuitira kuvonesa kuti iyena aaripi gira kana ciricese co vangarangarira, asi ari mundhu wo muviri wo kunyama, Jesu anovatatija nyara no mukumbo jake, woti: “Munocamwa ngenyi? Munoganagana ngenyi mu mwoyo menyu? Vonanyi nyara no murenje yangu. Ndini kamare! Ndibatenyi, muvone! Gira arina muviri no maphondo kudari inga bzo ndinabzari.” (Luka 24:36-39) Ivona vanodakara maningi no kukahamara, asi zvicavanesa kuzvitenda.

 Ecieja kuvabesera kuvona kuti iyena i mundhu kamare, anovabvunjisa kuti: “Ciripo cokuha ciricese pano?” Anopuwa hove yo kukocwa, woiha. Perapo anoti: “Ndibzona bzondaimubvunja ndicakagara na imwimwi [ndicito ndafa]: Bzinodikana kuti bzitevejwe bzese bzakatahwa mu buku ra Mosi no ro Vaporofeti no ro Ndumbo, ngo njio yangu.”—Luka 24:41-44.

Jesu wabesera Kreopa no mudoni wake kuzwisisa Matahwa, zve ngo zvaanoitazve kuna vese varipo wari, eciti: “Bzakatahwa kudaro: kuti Kristu anozotambujika no kuzomuka ko vakafa mu njiku yocitatu; no kuti kwaizotokoteswa kutenderuka no kukungurihwa ko bzixaixi, mu zina rake, ku nyika jese, kubvira Jerusalema. Imwimwi ndimwi masadombo a ibzo.”—Luka 24:46-48.

Mupostori Tomasi aapo ngo thangwe ririrese. Pa dhiya jinotevera, vamweni vanomusumurira ngo kudakara kuti: “Tavona Tenji!” Tomasi anodavira kuti: “Kudari ndikatama kuvona mbanga jo mu nyara jake, ndodira cikunwe pa mbanga, ndodira nyara pa cifuva cake, andizotendi.”—Johani 20:25.

Pa dhiya sere jakazotevera, vajiji vakaunganazve vofunga musuvo, asi pa mukuvo uu Tomasi aripovo. Jesu anobuda pakati pavo ano muviri wo kunyama, wovacungamija eciti: “Kunyarara komuri!” Jesu anosikira ka Tomasi, woti: “Nghwinisai cikunwe cako apa, vonai nyara jangu, khwedejai nyara yako, uidire pa cifuva cangu: Ucadoita acikatendi, kaveta mutendi!” Tomasi anoti: “Tenji wangu, na Mwari wangu!” (Johani 20:26-28) Wari aacakanakanizve kuti Jesu ari kupona inga cisikwa co kumujimu cinoimirira Jehovha Mwari.

Jesu anomubvunja kudari: “Watenda ngokuti wavona. Vanomucena vaya vanotenda vacikavoni!”—Johani 20:29.