Jesu wakavangisa vandhu ngo njira jakawanda kuti varangarire ngo pamusoro po ushamwari hwavo na Mwari. Anowana mukana umweni paanopera kubhuya no vandhu ngo kunja ko nyumba yo muFarisi umweni.

Vandhu vamweni vanonanga ciitiko cinosuruvarisa. Ivona vanobhuya ngo pamusoro po “vaGalileya vamweni yakavenganijwa no ngazi yo mbhamba jo vaiita, ndi [Mutongi wo Roma anozwi Pontio] Pilato.” (Luka 13:1) Vari kuda kurevenyi?

Kangaije vaGarireya ava vakauraiwa pamukuvo wakaitihwa Pirato citereka ngo zviuru zvo vaJudha ngokuti wakashandisa mare yo muupfumi hwo themberi kuti avake mugeri unoviisa kumwa mu Jerusarema. Kangaije Pirato wakawana mare iyi ecibesehwa ngo vakuru-kuru vo muthemberi. Vari kusumurirari Jesu ciitiko ici vanorangarira kuti vaGarireya vakatamba nyatwa iyi ngondava yo zviito zvavo zvakashata. Asi Jesu aatenderani nazvo.

Jesu anobvunjisa kudari: “Munorangarira kuti vaGalileya avo vainga vakaxata kupinda vaGalileya vamweni, ngokuti vakaurawa kudaro?” Mupinguro wake ngo wokuti, andizvopi. Asi anoshandisa ciitiko ici kuitira kungwaja vaJudha, eciti: “Imwimwivo mukatama kutenderuka, munozofavo ngo maitiro ondhoo.” (Luka 13:2, 3) Jesu anonangazve ciitiko cimweni cokuti kangaije cabva kuitika sasambi zve cakabatana no kuvakwa ko mugeri wiya, ecibvunjisa kudari:

“Gumi no vasere vaya vakawihwa ngo rusingo hwo Siloe, vofa, munorangarira kuti vainga no ndava kupinda vagari vamweni vo Jerusalema?” (Luka 13:4) Kangaije mbungano inovona kuti vandhu ava vafa ngondava yo zvishaishi zvovakaita. Jesu atenderani nazvo. Iyena anozviziva kuti “bzakanaka no bzakaxata” zvinoitika, kangaije ngo zvakaitisa ngozi iyi. (Mucumaeri 9:11) Asi vandhu vanodikana kuwana cijijo ngo ciitiko ici. Jesu anoti: “Imwimwivo mukatama kutenderuka, munozofavo ngo maitiro ondhoo.” (Luka 13:5) Waro ngenyi ari kukohomejera cijijo ici wari; waitama ngenyi kuzviita kare?

Anozviita ngo kuvona mukuvo waaiita mushando wake. Iyena anozofananijira kudari: “Mundhu wainga no mukuyu wakasimwa mu munda make. Wakaenda kopsanga makuyu, aazivi kumawana. Ngo ndava yabzo wakabvunja muranda kuti: ‘Ndapera makore matatu ndecivia kopsanga micero yo mukuyu uu, andiiwani. Utemei! Uri kupamba ndau ucikabari.’ Kaveta yena wakapingura kuti: ‘Uregerei gore rinobze. Inini ndinoca rindi ro kuutendeneja, ndinodira [ndimo], tivone dangani unozobara micero. Ukatama kubara, tinozoutema.’”—Luka 13:6-9.

Jesu ari kueja kuita kuti vaJudha vave no gonda ko makore anodarika matatu. Asi vashoma basi ngo vatendera kuva vajiji vake zve ivona vangavoniwa kuva mucero kana muviyo wo kushanda kwake ngo simba. Raagore rocirongomuna ro mushando wake, wari waakuvangisira maningi. Ngo kucumaira no kujijisa mu Judheya no mu Pereya, zvinoita inga kuti waica no kudira ndimo mukuyu wo vaJudha. Ngowapi muviyo wakona? VaJudha vashoma basi ngo vanotendera. Jinja rese ro vaJudha rinoramba kukhauya, vari kuvetera kuparajwa basi.

 Kutama gonda ko vandhu kunobuda pambhene pa mukuvo mushoma unotevera. Jesu ari kujijisa mu sinagoga imweni ngo Musabudu. Iyena anovona mwanakaji anofamba wakakotama ko makore 18, ngokuti waitambujwa ngo dhimoni. Jesu anomuzwira pena, woti kwaari: “Mwanakaji! Warapika ndhenda yako.” (Luka 13:12) Jesu anomupsasa, iyena anomuka ngo kukasika wotanga kukuja Mwari.

Izvo zvinonyangaja maningi mukuru anotungamirira mu sinagoga, wonanga kudari: ‘Mazuva matandhatu anotendehwa kuita basa. Vianyi korapwa mu mazuvewo, kuciripi mu zuva ro Sabudu.’ (Luka 13:14) Mukuru uwo aaripi kuramba kuti Jesu ano simba ro kurapa, asi ari kuvereketera vandhu ngo kuviya kwavo kuzorapwa mu dhiya yo Sabudu. Jesu anovadavira ngo njira yakajeka, eciti: “Vajiitisi! Imwimwi mwese amusununguri here n’ombe, nokuti mbongoyo, mu Sabudu, kuti muimwise? Mwana wa Abrahama uu, wainga akasungwa ndi Sathana kubvira gumi na masere o makore, aacaisisirepi kusununguhwa mu njiku yo Sabudu?”—Luka 13:15, 16.

Vavengi ava vanonyoejeka, asi mbungano inodakara ngo kuvona zviro zvino simba zviri kuitwa ndi Jesu. Ari mu Judheya muno, Jesu anophinda mufananijo muviri jo uphorofita ngo pamusoro po Umambo, jaakabhuya paaingaya mu ngarava, ari mu Jombe ro Garireya.—Mateu 13:31-33; Luka 13:18-21.