Jesu paanonga ari Judheya, anotendera mukoka wo kuenda koha no muFarisi umweni. Zvingaita kuti ainga masikati. (Luka 11:37, 38; ezanisanyi na Luka 14:12.) VaFarisi vanoita cirovejeso cavo co kusamba nyara mbhera ku zvikokora. Asi Jesu aazviiti. (Mateu 15:1, 2) Kusamba nyara kudaroko akuphwanyi Mutemo wa Mwari, asi andizvopi zvaanokumbira Mwari ku vandhu.

MuFarisi uu anokahamara ngokuti Jesu aateveji cirovejeso ici. Jesu anozvivona, woti: “Imwimwi vaFarisi munosuka kunja ko mukheyo no ndiro, kaveta mukati menyu makazara ngo umbava no kuxata kwese. Mapenji! Umwewo wakaita kunja, asi umwewo wakaita mukati?”—Luka 11:39, 40.

Kusamba nyara ucito waha azvizivi kushata, asi ujiitisi hwo zviara ngo hwakashata. VaFarisi no vamweni vari kutevejari mutango-mutango jo kusamba nyara, avaripi kucenesa mwoyo yavo pa kuita zvakashata. Ngokudaro, Jesu anovapangira eciti: “Ipanyi vamasikini bziri mukati, bzese bzinozoceneswa komuri.” (Luka 11:41) Izvo ndizvonadi. Mundhu anodikana kupa zvicibva mu mwoyo, kuciripi kuitira kuti vanozvivona vamunange kuti wakarurama.

Jesu aaripi kunanga kuti vandhu ava avakovi. Iyena anoti: “Munopa cogumi co murivo unozwi ‘ortelã,’ ‘aruda,’ no mbeu jese, kuperapo munonyenya urungami no rudo hwa Mwari. Bziro ibzi ngo bzomaidika kuita, mucingaregeri ibzo.” (Luka 11:42) Mutemo wa Mwari unonanga kuti zvinodikana kubudisa cogumi (divi rocigumi) co zvirimwa. (Deuteronòmio 14:22) Izvo zvinobatanija zvirimwa zvinoita usavi, zvimiti zvinoita ndhwiro no zvimweni hazvo zvinonakisa zvokuha. VaFarisi vanopa zvogumi zvo zvirimwa. Waro tingati kudini ngo zvinosisira maningi zvinodiwa ngo Mutemo, zvakadari inga kuita ururami no kuva vakapfava pambeji pa Mwari?—MIKEYA 6:8.

Jesu anoenderera mberi aciti: “Nyatwa komuri, vaFarisi, ngokuti munodisisa ndau jokutungamira mu masinagoga, no kucungamijwa mu makwanja. Nyatwa komuri, ngokuti makaita inga makuva acikavoneki, vandhu vanokhirira ndipona vacingabzizivi.” (Luka 11:43, 44) Vandhu vangakhugunyika pa makuva aya, vova vacizivi kucena mukuzwirana no Mutemo. Jesu anoshandisa murangariro uu kuitira kujekesa kuti kutama kucena ko vaFarisi akuvoneki.—Mateu 23:27.

Mwanarume umweni anoziva ushoni Mutemo wa Mwari anon’gun’uta aciti: “Mujijisi, mecinanga ibzi, munotukavo na itisu.” Asi mwanarume uu anodikana kuziva kuti vari kukonehwa kubesera vandhu. Jesu anoti: “Nyatwa komurivo, vazivi vo Mupango. Munothwaja vandhu mithwaro inorema, kaveta imwimwi amuvabesi kuvathika, pikija ngo cikunwe. Nyatwa komuri, munovaka makuva o vaporofeti, vaya vakaurawa ngo vabari venyu!”—Luka 11:45-47.

Mutoro iri kunangari Jesu i zvirovejeso zvo vaFarisi no kusanangura kovanoita Mutemo. Izvo azviripi kurerusa upenyu hwo vandhu. Vandhu ava vanovangirira vaciti vamweni vanodikana kundoita zvovanonanga, zvotova mutoro unovaremera. Majibaba avo akuraya vaphorofita va Mwari, kutanga ndi Abheri. Ivona wari vari kuita zvivoneke inga kuti vanokuja vaphorofita, ngo kuvavakira makuva, kuveni vari kutevejera mugariro no zviito zvo majibaba avo. Ivona vari kutodazve kuuraya Muphorofita mukuru wa Mwari. Jesu anonanga kuti mubarihwana uu unozopuwa ndava ndi Mwari yo kuuraya vaphorofita. Izvo zvinozoitika pa 38 o makore anozotevera, mu gore ro 70 N.V.Y.

Jesu anoendere mberi aciti: “Nyatwa komuri vazivi vo Mupango! Mabvisa khiya ro uzivi. Imwimwi amuzivi kunghwina, makarambisiravo vaya vaida  kunghwina.” (Luka 11:52) Vanarume ava vaidikana kujijisa zvinoreva Soko ra Mwari, asi vari kuitisa kuti vandhu vatame mukana wo kurizwisisa.

Waro vaFarisi no vatari vanoitenyi? Jesu paanobuda, ivona vanotanga kuphikizana nae no vakanyangajwa, vacimuitira mubvunjo jakawandisisa. Avaripi kumubvunjisa ngo kuda kuziva. Asi vari kuda kuitisa kuti Jesu anange zvovanozomusunga ndizvona.