Ngo divi ro kumabvazuva ko Jombe ro Garireya, Jesu wakapa zvokuha ku zviuru zvo vandhu ngo mushamaiso perepo wotiza povakada kumuita mambo. Pa usiku uhwo, wakafamba panyezuru po kumwa mujombe muna zibepo zve wakaponesa Pedhru. Iyena wakafambavo panyezuru po kumwa, asi wakazotanga kundondomera paakakana-kana. Jesu wakanyarajazve mbhepo, kangaije zvakaitisa kuti ngarava yo vajiji vake itame kundondomera.

Wari Jesu wahwirira ku divi ro kumavirira ko jombe, ku ndharaundha yo Kafarnaume. Vaakapa weya zvokuha ngo mushamaiso vanowanana nae vomumbvunjisa kuti: “Maguma rini kuno?” Ecivapangira, Jesu anonanga kuti vari kumupsaka ngokuti vari kuda kupuwazve zvokuha. Iyena anovabvunja kuti “mucapsanga bzokuha bzinopera, asi psanganyi bzokuha bzinogara mbhera uhomi hucingaperi.” Ngokudaro, ivona vanobvunjisa kudari: “Tinozoitenyi kuti tiite mabasa a Mwari?”—Johani 6:25-28.

Kangaije vanorangarira mabasa akatahwa mu Mutemo, asi Jesu ari kunanga basa rinosisira maningi: “Basa ra Mwari nga iri: kuti mutende wiya wakatumwa ndi yena.” Asi vandhu avatendi Jesu, pikija no zvese zvaari kuita. Ivona vanomubvunjisa kuti “Unoitenyi? Majibaba edu akaha ‘mana’ mu bani ro bzipare, ngokuteveja Matahwa anoti: ‘Vakapuwa kuha mukate wakabva mugore.’”—Johani 6:29-31; Nduyo 78:24.

Ecidavira cikumbiro cavo, Jesu anovatatija kuti Ndiani anopekeja zvokuha ngo mushamaiso, acinanga kudari: “Ndinomubvunja bzokadi kuti: asi Mosi Wakamupa mukate kubva mugore, kaveta Baba wangu vanomupa mukate wokadi-kadi kubva mugore; Ngokuti mukate wa Mwari ndi wiya anoderuka mugore no kupa uhomi nyika.” Ngokuti avazwisisi zviri kunanga Jesu, vanomukumbira kuti: “Tenji! Tipenyi mukatewo ngari yese.” (Johani 6:32-34) Waro Jesu ari kunangira “mukate” wapi?

Iyena anovaadurujira kudari: “Inini ndiri mukate wo uhomi: ndiani anoza kondiri, aazovibze no njara; ndiani anonditenda aazovibze no nyota mbhera narini. Ndamubvunja kuti makandivona, kaveta amutendi. . . . Andizivi kuderuka kubva mugore koita kuda kwangu, kaveta kuda kwa wiya wakandituma. Kuda kwa wiya wakandituma nga uku: kuti nditame kurasa na umwe wondakapuwa ndi yena; asi ndimumuse ko vakafa pa njiku yokupejisira. Kuda kwa Baba wangu nga uku: kuti wese anovona Mwana no kumutenda, ave no uhomi hucingaperi.”—Johani 6:35-40.

Izvi zvinonyangajisa vandhu, zve vanotanga kuvereketa-vereketa ngo pamusoro pake. Anganangisa kudini kuti “ndini mukate wakaderuka kubva mugore”? (Johani 6:41) Ivona vanomuziva basi kuva mwana wakabahwa ngo vandhu vari mu dhorobha ro Garireya rinozwi Nazareta. Vandhu vanobvunjisa kuti “andiepi here Jesu, mwana wa Josefa, mai na baba wake votinoziva?”—Johani 6:42.

Jesu anodavira kudari: “Mucangunguta ngocenyu. Akuna anoza kondiri acakakwevehwa ndi Baba vakandituma. Inini ndinozomumusa mu njiku yokupejisira. Mu buku ro vaporofeti bzakatahwa kuti vese vanozojijiswa ndi Mwari. Mundhu wese wakapurukira Baba no kuaxira bzijijo bzavo, ndiyena anoza kondiri. Akuna wakavona Baba, aciripi wiya anogara na Mwari: ndiyena basi wakavona Baba. Bzokadi ndinomubvunja kuti: Ndiani anotenda anova no uhomi hucingaperi.”—Johani 6:43-47; Isaia 54:13.

Jesu paakabhuya na Nikodhemo, wakananga ngo zvoupenyu hucikaperi, wohuzwiranisa no kuva no gonda ku mwana wo mundhu, aciti: ‘Vese vanotenda [Mwana umwe basi wa Mwari] vatame kufa, kaveta vave no uhomi hucingaperi.’ (Johani  3:15, 16) Asi wari ari kubuya no vandhu vakawanda maningi ngo pamusoro po basa raanoita kuti vawane upenyu hucikaperi, hovacikawani ngo kuha manaa kana pau jinowanika mu Garireya. Waro upenyu hucikaperi hunowaniswa kudini? Jesu anophindazve magama okuti: “Ndini mukate wo uhomi.”—Johani 6:48.

Jesu anoenderera mberi acibhuya ngo pamusoro po mukate unobva mugore zve anozoengejeka paanojijisa mu sinagoga mu Kafarnaume.