Jesu anopa vapostori vake ndhungamiriro jakanaka maningi jokuti vangaitisa kudini basa ro kucumaira povanobuda vaviri vaviri. Asi aaimiri apo basi. Anovangwaja ngo kunaka mwoyo ngo pamusoro po vazondi eciti: “Vonanyi kuti ndinomutuma inga mabvuta pakati po mapumphi . . . Ngwaranyi no vandhu: ngokuti vanozomupa ku Sinédrio, vozomupsaputa mu masinagoga. Ngo ndava yangu munozoendeswa kuno vatongi no majimambo.”—Mateu 10:16-18.

Izvokadi kuti vateveri va Jesu vangateverehwa maningi, asi iyena ari kuvagondesa zvinovatondhoja, eciti: “Vakazomupa mu nyara javo, mucathimwa-thimwa ngo bzo munoda kuvereketa dangani kureva; mukuvo wondhowo munozobvunjwa bzinodikana kuvereketa. Asipi imwimwi munozovereketa, kaveta Mujimu wa Baba wenyu ndi wona unozovereketa mukati menyu.” Jesu anoenderera mberi aciti: “Hama inozouraisa hama yayo, na baba mwana wake. Vana vanozomukira vabari vavo vecivauraya. Imwimwivo munozonyenywa ngo vese ngo ndava yo zina rangu. Wiya anovangirira mbhera kupejisira, anozoponeswa.”—Mateu 10:19-22.

Zvecivoneka kuti basa ro kucumaira rinosisira maningi, Jesu anokohomejera dikano yokuti vateveri vake vanodikana kuva vakangwara, kuitira kuti vagare vakasujunuka kuti vaite basa iri. Iyena anoti: “Kudari vakamuteverera ku guta rimwe, tiziranyi ku guta rimweni. Ndinomubvunja bzokadi kuti: amuzopeji maguta ese o vaIsraeli, Mwana wo mundhu acito aguma.”—Mateu 10:23.

Zvokadi kamare, Jesu ari kupa ndhungamiriro, ngwajo no vangiso inosisira maningi kamare ku vapostori vake 12! Asi Munokwanisa kuvona kuti masoko aya ari kubvunjwazve vaya vanozotoravo rutivi mu basa iri pasure po kufa no kumuswa ka Jesu. Izvi zvinokhombijwa ngo kubvunja kwake vajiji vake kuti “munozonyenywa ngo vese,” kuciripi basi ngo vanowanika kuri wari kutumihwa vapostori kocumaira. Kusiyapo izvo, apana potinoverenga kuti vapostori vakaendeswa pambeji po vatongi ngo majimambo pa fafanya yo kucumaira yovakaitari mu Garireya pa mukuvo mushomani, nee apatowaniki panoti vakauraiswa ngo vopaukama hwavo.

Zvakajeka kuti Jesu anorangarija zvo kumbeji paanobvunja vapostori vake zviro izvi. Vonanyi zvaanonanga ku vajiji vake kuti amuzopeji kucumaira maguta ese “Mwana wo mundhu acito aguma.” Jesu ari kunanga kuti vajiji vake avazopeji kucumaira ngo pamusoro po Umambo hwa Mwari, Mambo anokujwa, Jesu Kristu, acito aguma inga mutongi wakagajwa wa Mwari.

 Vapostori povanonga vacicumaira, avadikani kukahamara ngo kuwanana no kuteverehwa, ngokuti Jesu anoti: “Mujiji asipi mukuru kupinda mujijisi wake, nokuti muranda kupinda mambo wake.” Zvinonangari Jesu zvakajeka. Vanozoshaisha kutajwa no kuteverehwa ngokuti Jesu wakazviitihwavo. Asi iyena anovavangisa eciti: “Mucathya vanouraya muviri vacingakwanisi kuuraya mwiha. Ithyanyi wiya anokwanisa kuendesa mu Gehena mwiha no muviri.”—Mateu 10:24, 28.

Jesu wakagaja muezaniso pa shwiro iyi. Kusiyapo kuva acizivi kugondeka kuna Jehovha, ano simba rese, wakacungirira kufa acingathyi. Mwari wo Simba-rese ngaanokwanisa kuparaja “mwiha” wo mundhu (vetero yake yo kuzopona kumbejiyo) kana kumumusa kuti azobuse upenyu hucikapari. Izvi zvakavangisa maningi kamare vapostori!

Jesu wakafananijira makorondhere o rudo anoithwa ndi Mwari ku vateveri vake ngo njiri iyi: “Ajitengeswi xiri mbiri ngo kobiri rimwe, kani? Kaveta apana na imwe yajo inozowa pasi, Baba wenyu vacingabzizivi. . . . Ngokudaro, mucathya: muno mutengo kupinda xiri zinji.”—Mateu 10:29, 31.

Masoko anocumaihwa ngo vajiji va Jesu anoparajanisa ukama, ngokuti pambhuri imwe vamweni vanomatendera, vamweni avamatenderi. Jesu anodurujira kuti, “mucarangarira kuti ndaza no runyararo pasi pano.” Hina, zvinoda kucunga kuti umwe wo pambhuri atendere cokwadi co Bhaibheri. Asi Jesu anoenderera mberi aciti: “Ndiani anodisa baba dangani mai kupinda inini, aandinakiri. Ndiani anodisa mwana worume, dangani wokaji, kupinda inini, aafaneri kondiri.”—Mateu 10:34, 37.

Asi vamweni vanozoashira ushoni vajiji vake. Jesu anoti: “Ndiani anopa, pikija komeci imwe yo kumwa yokutondhora kwa umwe wo bzivana ibzi, ngokuti ndi yena mujiji wangu, ndinomubvunja bzokadi kuti aazotami mupocero wake.”—Mateu 10:42.

Vapostori povanopera kunasirihwa ngo ndhungamiriro, ngwajo no vangiso ya Jesu vanoenda mu “mutundhu ngo mutundhu, vecitokotesa masoko akanaka, vecirapa mu mativi ese.”—Luka 9:6.