Yaa dhiya yocitatu Natanaeri naava umwe wo vajiji vokutanga va Jesu. Jesu ano vajiji vake vanganani vokutanga, anoita hwendo kuenda ku dhistritu ro Garireya, kovakabarihwaya. Vanoenda Kanaa, ndhorobha rakabarihwa Natanaeri. Kanaa rinowanika ku ndharaundha ino matundhu yo Nazareta, kwakakuriraya Jesu. Ivona vakakokwa kwenda ku mabuso o mucadho ku Kanaa.

Mai wa Jesu vanoviyavo pa mucadho. Inga shamwari yo ukama hwo vari kucadha, zvinovoneka kuti Maria anobeseravo pa kusapota vakokwa. Ngokudaro, anokasika kuvona kuti pari kukaraira ciro. Wobvunja Jesu kudari: “Apacina doro.”—Johani 2:3.

Kunasa kunanga, Maria ari kubvunja Jesu kuti aite ciricese kuitira kuti vhinyu iwanike. Jesu acishandisa magama anokhomija kuramba, wakati: “Mwanakaji, tinenyi nabzo inini na imwimwi?” (Johani 2:4) Inga Mambo wakagajwa ndi Mwari, Jesu anodikana kubvunjwa kuti itai cakati ndi Babake, kuciripi ngo ukama hwake kana ngo shamwari. Maria anosiya ngo ungwaru shwiro iyi munyara mo mwanake, ngo kubvunja vaishanda kuti “itanyi bzaanomubvunja.”—Johani 2:5.

Pano zvijuvi zvitandhatu zvo mapuwe zvokudira kumwa, cimwe cazvo cinonghwina ritru jinodarika 40. Jesu anobvunja vaperekeri kudari: “Zajanyi majuvi ngo kumwa.” Perepo Jesu wakati: “Ceranyi, muende nabzo ku mukuru wo vaperekeri.”—Johani 2:7, 8.

Mukuru wo vaperekeri anodakara maningi ngo kunaka ko vhinyu asi aazvizivi kuti yaitwa ngo mushamaiso. Iyena anodanija murovori, womubvunja kudari: “Vandhu vese vanotungamira ngo kucera doro rauxoni; sure kwabzo, vandhu novarejera, vanozisa doro ricikanaki; kaveta iwewe waviga doro rauxoni mbhera wari.”—Johani 2:10.

Uu i mushamaiso wokutanga wa Jesu. Vajiji vake vapsa povanovona izvi, gonda ravo kwaari rinovangiswa. Pasure pa izvi, Jesu, make no hama jake vanoita hwendo kwenda ku dhorobha ro Kafarnaume, kupharamande ra njikazi ko mbhiripiri yo Jombe ro Garireya.