Ku nyika yo Siriya kwainga no cimusikane co ku Iziraeri cainga ndhambo no kanyi kwaco. Cimusikane condhoco cainga cakabiwa ngo masoca wo ku Siriya, asi cakava muranda wo mukaji wo musoca mukuru waidanwa Naamani. Cimusikane ico cainamata Jehovha, pikija kuti vandhu vo kondhoyo avacainamata Jehovha.

Naamani wakava no ndhendha yo mapere zve waisuruvara mukuvo wese. Musikane uu wakada kumubesera Naamani. Ngo kudaro wakabvunja mukaji wa Naamani kuti: ‘Pano mundhu wandinoziva angakwanisa kurapa mwamuna wenyu. Ku Iziraeri, kuno muporofita wa Jehovha anodanwa Erija. Iyena angarapa mwamuna wenyu.’

Mukaji wa Naamani wakabvunja mwamuna wake zvainga wakabvunjwa ngo musikane. Naamani waida kuita ciri cese, ngokudaro wakaenda ku Iziraeri ku nyumba ya Erija. Naamani warangarira kuti Erija waizomuashira inga mundhu anosisira maningi. Asi kusiapo kuvereketa naiyena, Erija wakatumira mushandiri wake kuti aende koomucungamija  no kumupa masoko okuti: ‘Endai kosamba runomwe mu murambo Jordhani. Perapo muviri wako unozorapika.’

Naamani wakacamwa nazvo. Iyena wakati: ‘Ndairangarira kuti, iyena anozobuda, woza ega kamare, wodana zina ra Mwari wake, ecindidira nyara pa panyezuru po musoro wangu. Kunja kwa izvo, anodibvunja kuti ndiende ku murambo uri ku Iziraeri. Itusu tina murambo waushoni maningi ku Siria. Ngenyi ndinodikana kuenda kondhoyo basi?’ Naamani wakasia nyumba ya Erija zve wopinda wakacamwa.

Vashandiri vake vakamubesera kuti acinje marangaririro. Vakati kwaari: ‘Nokwainga kuti muporofeti wakananga ciro cinonesa, amucaidepi kuciita here? Asi zvaamubvunja muporofita uu zvakareruka maningi. Waro zvinodini kuita zvaamubvunjaro?’ Naamani wakazwira. Iyena wakaenda ku murambo Jordhani zve wobira mufunji runomwe. Paakabira mufunji wo cinomwe, wakabuda warapika. Iyena wakadakara maningi zve wakahwirira kobongesera Erija. Naamani wakati: ‘Wari ndozviziva kuti Jehovha ndi Mwari wokadi-kadi.’ Unorangarira kuti cimusikane ciya co ku Iziraeri cakajizwa kudini Naamani paakaviya warapika?