Roti wairarama pamwepo na Abhirahama, bamudoko wake, mu nyika yo Kanani. Mu kufamba ko nguva, Abhirahama na Roti vakava no zvinyama zvizinji zvokuti nyika yainga icikakwanizve kuitira zvese. Abhirahama wakati kuna Roti: ‘Atingarambi tecirarama tese pa ndau yondhoyo. Ndapota sanai kwaunoda kwenda zve inini ndinoenda ku divi rimweni.’ Abhirahama waida kugara ushoni ko vamweni, andizvopi?

Roti wakasana divi rakaseja ro nyika. Irona rainga no zvakakwana zvakadari inga kumwa no ndhovhe. Ngokudaro iyena wakasana ndau yondhoyo zve woenda koogara kondhoyo no mbhuri yake, phedo no dhorobha ro Sodhoma.

Vandhu vo Sodhoma no vaigara phedo no dhorobha ro Gomora vainga vakashatisisa kamare. Zvokadi kamare, ivona vaita zvakashata zvokuti Jehovha wakasunga kuparaja madhorobha aya. Asi Mwari waida kuponesa Roti no mbhuri yake, ngokudaro wakatuma ngirozi kuti ivangwaje yeciti: ‘Kasikanyi! Bhundanyi kunja ko dhorobha iri! Jehovha anoda kuriparaja.’

Roti aazivi kusia dhorobha ngo kukasika. Wakaramba acinonoka. Ngokudaro ngirozi iyi yakabata mukono, Roti no mukaji wake pamwepo no vana vake vaviri yovabudisa mu dhorobha, yoti: ‘Gogomanyi! Ponesanyi upenyu hwenyu zve mucasota sure. Kudari mukasota sure, munozofa!’

Pavakaguma ku dhorobha rinozwi Zoari, Jehovha wakanisa muriro wo enxofri kuitira dhorobha ro Sodhoma no Gomora. Madhorobha aya  akamuka kuparajwa ese kamare. Mukaji wa Roti paakatama kuzwira Jehovha zve wosota sure, iyena wakava cituka co munyu! Asi Roti no vana vake vokaji vakaponesa upenyu hwavo ngokuti vakazwira Jehovha. Zvinovoneka inga kuti ivona vakanyakajwa maningi ngokuti mukaji wa Roti aazivi kuzwira. Asi ivona vanodakarazve maningi ngokuti vakazwira ndhungamiriro ja Jehovha.