Pavakapera kubuda mu munda wo Edheni, Adhamu na Evha vakava no vana vazinji. Kaini wakava mwana wavo wokutanga uwo wakazova murimi zve Abheri wocipiri, wakazova muhavisi.

Pa njiku imweni Kaini na Abheri vakaita mupiro kuna Jehovha. Unociziva kuti mupiro icinyi? Icipo cakanaka zve cinosisira maningi. Jehovha wakadakajihwa ngo cipo ca Abheri, asi aazivi kudakajihwa ngo ca Kaini. Izvo zvakaita kuti Kaini anyangajwe maningi. Jehovha wakangwaja Kaini kuti ushungu hwake hwaizomuita kuti aite ciro cakashata. Asi Kaini aazivi kuzwira.

Tevere Kaini wakati kuna Abheri: ‘Ngatende tese ku munda.’ Povakaguma ku munda vainga vari vega, Kaini wakataka hama yake womuuraya. Jehovha wakaitenyi  ngo ndhango iyi? Jehovha wakapangira Kaini ngo kumudira ndhambo no mbhuri yake. Kaini aazivi kutendehwa kuhwirirazve.

Ngozvapi zvatinojija kubva pa ciitiko ici? Kangaije tingatanga kugara no ushungu patinovona kuti zviro azviripi kuitika mu njira yataida. Kudari tikazwa kuti ushungu huri kukura mukati mwedu—kana vamweni vangatingwaja ngo ndava yo kunyangajwa kwedu—tinodikana kukasika kunasirira mugarirowo zve tongwarira mazwiro edu iwona acito atingwarira.

Zvecivoneka kuti Abheri waida Jehovha zve waiita zvakanaka, Jehovha aazomukanganwi. Mwari acazoita kuti Abheri awanezve upenyu paanozocinja nyika ino kuti ive paradhiso.