KURARAMA INGA MAKRISTU
Tingaitisa Kudini kuti Tive Mujiji wo Bhaibheri Anovangisira
Manoda kuva makagondeka pa muejo inga wainga na Dhanieri here? Dhanieri waivangisira pa kujija Soko ra Mwari, kubatanijavo no zviporofita zvakajika. (Dan 9:2) Kuvangisira pa kujija Bhaibheri kungamubesera kuti murambe makagondeka. Kuitisa kudini? Kungaengejera kugonda kwenyu kuti zvigondiso zva Jehovha zvinokwanirisikadi kamare. (Jox 23:14) Kunomubeserazve kuti muengejere rudo hwenyu kuna Mwari, izvo zvinozomuitisa kuti mude kuita zvakanaka. (Ndu 97:10) Asi mungatangira ngo kwapi? Vonanyi mazano anotevera.
-
Ndingajijenyi? Cirovejeso cakanaka co kujija cinobatanija kunasirira musongano jo ungano. Kuverengwa ko Bhaibheri ko sumana no sumana, kungamubesera maningi kudari mukatora cimukuvo co kupsakisisa vhesi jamucikanasi kuzwisisa ushoni. Mu kuengejera vamweni vanosana kujijira maningi zviporofita, mativi akasiana-siana o mucero wo mujimu mucena wa Mwari, hwendo hwa Pauro hwo umisionario, kana kutojija ngo zvisikwa zvinovoneka zva Jehovha. Kudari mukarangarira mubvunjo unocijikira mu Bhaibheri, utarirenyi kuti muzoupsakisire pa urongwa hwenyu hunotevera hwo kujija.
-
Masoko akona ndingamawana kwapi? Kuti muvone kwamungamawanira, vonanyi vhidhio inoti, Mathurusi o Kupsakisisa Kuitira Kufumbhura Upfumi hwo Kumujimu. Kuti mueje zivo yenyu, psakisiranyi kuti ndiyani simba ro utongi hwo nyika yese hunoimirihwa ngo cikara cakatahwa pa Dhanieri cipauko co 7.
-
Ndingatora nguva ngana ndecijija? Kujija nguva jese kunosisira maningi kuti muve makavanga kumujimu. Mungatanga ngo kujija pa nguva shomani kudari zvecidikana, zve engejeranyi padoko no padoko nguva jamunoda kupeja mecijija. Kujija Soko ra Mwari kwakatojana no kuca goridhe. Pamunowana maningi goridhe ndipona pamunowanavo maningi simba ro kuca! (Mazwi 2:3-6) Kudisisa Soko ra Mwari kunozoengejeka, zve kujija Bhaibheri njiku jese kunozova cirovejeso cenyu kwenda no kwenda.—1 Ped 2:2.
