Zakariya 3:1-10
3 Iyena wakanditatija mupiri mukuru Joshuwa wainga akaima pamberi po ngirozi ya Jehovha. Sathana wainga akaima ngo kumukono muho wa Joshuwa kuti amuhwise.
2 Ngirozi ya Jehovha yakati kuna Sathana: “Jehovha ngaakutonge iwewe Sathana, hina Jehovha wakasanaya Jerusarema, ngaakutonge! Mwanarume uwu, asipi cica co muriro cakavhiswa pa coto here?”
3 Ngo kudaro, Joshuwa wainga akaima pamberi po ngirozi akasimira nguvo jino svina.
4 Ngirozi yakavhunja ngirozi jimweni jaiima pamberi pa Joshuwa kudari: “Muvhurenyi nguvo jino svina.” Perapo yakati kwaari: “Vonai, ndavhisa kuposa kwako, iwewe unozosimijwa nguvo jakanaka.”
5 Ngo kudaro inini ndakati: “Ngaasungwe dhuku* rakacena mu musoro make.” Ivona vakamusunga dhuku rakacena mu musoro make, vomusimija nguvo; ngirozi ya Jehovha yainga ngo phedopo.
6 Ngirozi ya Jehovha yakavhunja Joshuwa kudari:
7 “Izvi ndizvona zvinonanga Jehovha wo hondo: ‘Kudari ukafamba mu makwanja angu no kuita basa rako pamberi pangu, unozova mutongi pa nyumba yangu no kuvonerera ruvanje jangu. Ndinozokutendera kuti ugume pamberi pa ava vakaimari na inini.’
8 “‘Izwai, ndapota Mupiri Mukuru Joshuwa, iwewe no vadoni vako vanogara pamberi pako, vanarume ava vanoshanda inga citatijo. Izwai, ndiri kuviisa mushandiri wangu anodaninjwa kuti Thobwe!
9 Vonanyi buwe randakadira pamberi pa Joshuwa! Pa buwe iri, pano majiso manomwe; ndinozotara masoko pa buwepo,’ izvi ndizvona zvinonanga Jehovha wo hondo, ‘pa njiku imwe basi ndinozovhisa kuposa ko nyika iyi.’
10 “‘Mu njikuyo,’ izvi ndizvona zvinonanga Jehovha wo hondo, ‘umwe na umwe wenyu anozodaninja mudoni wake kuti aviye kuzogara pasi po muuvha wake no pasi po mufigu wake.’”
Masoko o Pasi
^ Kana: “Ngaadihwe turbhanti.”
