Zakariya 12:1-14
12 Masoko anovha kuna Mwari:
“Aya ndiwona masoko a Jehovha ngo pamusoro po Iziraeri,” izvi ndizvona zvinonanga Jehovha,Wiya wakatambaraja matenga,Odira maambo panyika,Wopa mundhu mwiha wo upenyu.
2 “Ndiri kuita kuti Jerusarema ive kopo inorejeresa vandhu vakaritendeneja. Judha rinozotendenejwa, Jerusarema rinozotendenejwavo.
3 Pa njiku yondhoyo, ndinozoita kuti Jerusarema rive buwe rinorema ku vandhu vese. Zvokadi kamare, vese vanozoritakura, vanozokhuvazika maningi. Majinja ese o panyika anozoviya kuzorihwisa.
4 Pa njiku yondhoyo,” izvi ndizvona zvinonanga Jehovha, “Ndinozothyisa haci jese no vapakiri vajo. Majiso angu anozoenderera mberi ecisota nyumba ya Judha, asi ndinozoitisa mapofu haci jese jo vandhu.
5 Vatungamiriri vo Judha vanozonanga kudari ngo mu mwoyo mavo: ‘Vagari vo Jerusarema ndivona simba redu rinovha kuna Jehovha wo hondo Mwari wavo.’
6 Pa njiku yondhoyo, ndinozoita kuti vatungamiriri vo Judha, vaite inga murazvu wo muriro uri pakati po huni. Inga mwenje unobwaka uri* pakati po mutoro yo zvirimwa. Ivona vanozopeja majinja ese akavatendeneja ku mukono muho no ku mukono boshwe. Vagari vo mu Jerusarema vanozogarazve mu ndau yavo mu Jerusarememo kamare.
7 “Jehovha anozotanga kuponesa tende ja Judha, kuti kuseja* ko nyumba ya Dhavhidhi no kuseja ko vagari vo Jerusarema kucadonyanya maningi kupinda Judha.
8 Pa njiku yondhoyo, Jehovha anozojivirira vagari vo mu Jerusarema. Pa njiku yondhoyo, wiya anozokhugunyika pakati pavo, anozoita inga ndi Dhavhidhi, nyumba ya Dhavhidhi inozoita inga Mwari, inga zvinoithwa ngo ngirozi ya Jehovha yecivatungamirira.
9 Pa njiku yondhoyo, andizoregeri kuparaja majinja ese anozoviya kuzohwisa Jerusarema.
10 “Ndinozodururira mujimu wo unyasha no wokudeketera pa nyumba ya Dhavhidhi no vandhu vanogara mu Jerusarema, ivona vanozosota mundhu wo vakabaya ngo cipanga, vozocumba inga varikucumba mwana wavo umwe; vozocema maningi, inga vari kucema* mwana wavo wo dangwe.
11 Pa njiku yondhoyo, mu Jerusarema munozova no kucumba kwakakura maningi, inga kucumba ko Hadhadhirimoni mu Bani ro Megidho.
12 Nyika iyi inozocumba, ukama ngo ukama unozocumba wega; mbhuri yo nyumba ya Dhavhidhi inozocumba yega, vanakaji vayo, vanozocumba vega; mbhuri yo nyumba ya Natani inozocumba yega, vanakaji vayo vanozocumba vega;
13 mbhuri yo nyumba ya Revhi inozocumba yega, vanakaji vayo vanozocumba vega; mbhuri yo nyumba ya Shimei inozocumba yega, vanakaji vayo vanozocumba vega;
14 ukama hwese hunonga hwasara, mbhuri imwe nga imwe inozocumba yega, vanakaji vajo vanozocumbavo vega.
Masoko o Pasi
^ Kana: “masasira anobwaka ari.”
^ Kana: “kunyara.”
^ Kana: “vozorira maningi, inga vari kurira.”
