Varoma 12:1-21
12 Ngo kudaro hama, ndinomudeketerera ngo unyasha hwa Mwari, kuti muite mupiro yo muviri wenyu no upenyu hwenyu kuna Mwari. Mupiro iyi ngaive yakacena no inotendehwa pamberi pa Mwari, meciita basa rakacena mecishandisa murangariro wenyu wese.*
2 Regeranyi kuumbwa ngo nyika* ino, motendera kuti Mwari acinje murangariro wenyu, kuti muzive zvaanoda kuti muite, zviro zvakanaka, zvakakwana no zvinomudakajisa.
3 Ngo unyasha hucikaezaniswi hwondakaitihwa, ndinovhunja mundhu wese pakati penyu kuti atame kurangarira maningi ngo pamusoro pake kupinda zvaanofanera kurangarira, asi ngaarangarire ngo njira inotatija kuti ano murangariro wakanaka, mukuzwirana no mutengo wo rutendo hwakapuwa mundhu umwe nga umwe ndi Mwari.
4 Ngokuti muviri uno mativi akawanda, asi mativi aya aaiti basa rakaezana.
5 Mu njira yakaezana, pikija kuti itusu takawanda, tiri muviri umwe mukuzwirana na Kristu. Asi inga mativi o muviri, itusu takabatana pamwepo.
6 Tino zvipo zvakasiyana mukuzwirana no unyasha hucikaezaniswi hwatakaashira. Ngo kudaro, kudari zvipo izvi zviri zvo ciporofeti, ngatiporofete mukuzwirana no rutendo hwedu.
7 Kudari zviri zvipo zvo kushandira vamweni, ngatishandire. Wiya wakapuwa cipo co kujijisa, ngaajijise.
8 Wiya wakapuwa cipo co kuvangisa vamweni, ngaavangise. Wiya wakapuwa cipo co kukovanisa, ngaazviite ngo mwoyo wese. Wiya wakapuwa cipo co kutungamirira, ngaazviite ngo simba rese. Wiya wakapuwa cipo co kuitira vamweni unyasha, ngaazviite no mudakaro.
9 Mucava no rudo hwo kucengejera. Nyenyanyi zvakashata; batisisanyi zvakanaka.
10 Disananyi maningi ngocenyu ngo rudo hwo ukama. Tanganyi kureremejana ngocenyu.
11 Shandanyi ngo simba, mucaita nungo. Mujimu mucena ngaumupe simba. Shandiranyi Jehovha* ngo mwoyo wese.
12 Dakaranyi ngo vetero yenyu. Cungiriranyi pamunotambujika. Itanyi mukumbiro mukuvo wese.
13 Ipanyivo vandhu va Mwari zvamunazvo, mukuzwirana no zvavanotama. Ivanyi no cirovejeso co kuashira varendo mukuvo wese.
14 Kumbiranyi Mwari kuti akomborere vaya vanomuteverera; mucavatuka.
15 Dakaranyi no vanodakara. Cemanyi* no vanocema.*
16 Vonanyi vamweni inga mavonero amunojiita; mucagara mecirangarira maningi zviro zvikuru, asi tungamirihwanyi ngo zviro zvidoko. Mucajivona kuti makangwara kupinda vamweni.
17 Mucahwirijira ari wese cakashata ngo cakashata. Psakanyi kuitira zvakanaka vandhu vese.
18 Kudari zvecikwanisika, ivanyi no runyararo no vandhu vese mbhera pamunokwanisa.
19 Hama jangu, mucahwirijirana ngocenyu, asi regeranyi kuti Mwari avonese ushungu hwake ngo zviro zvakashata zvinoitwa; ngokuti zvakatahwa kudari: “Jehovha* wakati: ‘kuhwirijira ngo kwangu; ndini ndinozohwirijira.’”
20 Asi “kudari muvengi wako ano njara, mupei zvokuha; kudari ano nyota, mupei kumwa; ngokuti ukaita kudaro, unozounganija masimbe ano muriro pa musoro pake.”
21 Ucadonyiswa ngo ushaishi, asi nyisai ushaishi ngo zvakanaka mukuvo wese.
Masoko o Pasi
^ Kana: “mecishandisa simba renyu ro kurangarira.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “riranyi.”
^ Kana: “vanorira.”
^ Vonanyi Kudurujihwa ko Magama.
