Vakorose 1:1-29
1 Inini Pauro, mupostori wa Kristu Jesu ngo kuda ka Mwari, na Timoti hama yedu,
2 ndiri kutarira vatendi doni pamwepo no hama jakagondeka mu kuzwirana na Kristu, jiri ku Korose:
Ivanyi no unyasha hucikaezaniswi no runyararo hunovha ka Mwari Baba wedu.
3 Mukuvo wese tinobonga Mwari, Baba wa Mambo wedu Jesu Kristu, patinomuitira mukumbiro,
4 kuvhira patakazwa ngo pamusoro po rutendo hwenyu kuna Kristu Jesu no rudo hwamunahwo ku vatendi doni vese
5 ngo ndava yo vetero yamakavigihwa kumatenga. Imwimwi makaizwa ngo pamusoro po kucumaihwa ko cokwadi co masoko akanaka
6 akamugumira. Zvecivoneka kuti masoko akanaka ari kubara mucero no kuengejeka mu nyika yese, ngo zviri kuitikavo kwamuri, kuvhira njiku yamakazwa no kunasa kuziva unyasha hucikaezaniswi hwa Mwari mu cokwadi.
7 Izvo ngo zvamakajijiswa ndi Epafra, muranda doni wedu anodiwa, wiya ari mushandiri wakagondeka wa Kristu, ari kushanda pa ndau yedu.
8 Iyena wakatizivisazve rudo hwamunahwo ngo njira yo kumujimu.
9 Ngo zvinotiitisazve kuti kuvhira pa njiku yatakazvizwa, atizivi kuregera kumuitira mukumbiro no kukumbira kuti muzare ngo zivo yakarungama yo kuda kwake mu ungwaru hwese no zwisiso yo kumujimu,
10 mufambe ngo manera anokuja Jehovha,* kuti munase kumudakajisa, pamunoramba mecibara mucero mu mabasa ese akanaka, meciengejera mu zivo yakarungama ya Mwari;
11 tinokumbirazve kuti muvangiswe ngo simba rese, mukuzwirana no simba rake guru kuti munase kucungirira no kusengerera no mudakaro,
12 pamunobonga Baba, vakatiita kuti tikwanise kuvavo mu utaka hwo vatendi doni, vari mu ruvheneko.
13 Iyena wakativhisa mu* cidima, wotiendesa mu umambo hwo Mwana wake anodiwa,
14 ngo pamusoro pake takaponeswa ngo muripo, hina, kuregerehwa ko zvishaishi zvedu.
15 Ndiyena muezaniso wa Mwari acikavoneki, dangwe ro zvisikwa zvese;
16 ngo ndava yake, zviro zvese zvakasikwa, zviri kumatenga no zviri pasi pano, zvinovoneka no zvicikavoneki, zvigaro zvo umambo, utongi no vano masimba. Ngokuti ndiyena wakashandiswa ndi Mwari pa kusika zviro zvese zvimweni, kuti zvimudakajise.
17 Iyenazve, wakavepo zviro zvese zvicito zvavepo, Mwari wakamushandisa kuti asike zviro zvese zvimweni,
18 ndiyena musoro wo muviri, kana kuti musoro wo ungano. Ndiyena wo kutanga, dangwe ro kumuswa ku vakafa, kuti ave wo kutanga pa zviro zvese;
19 ngokuti Mwari wakavona zvakanaka kuti kuperera kwese kugare mwaari,
20 kuti ngo kushandisa Kristu, aviiranise zviro zvese kwaari, zviro zvo pasi pano no zvo kudenga eciita runyararo ngo pamusoro po ngazi ya Kristu yakapopomejwa pa mutanda wokutambujikira.*
21 Zvokadi, imwimwi kare mainga makaparajana na Mwari, mainga vavengi vake, ngokuti murangariro yenyu yainga iri pa mabasa akashata,
22 iyena wakamuviiranisa kwaari ecishandisa muviri wo kunyama wo Mwana wake paakafa, kuti amuviise kwaari makacena, mucina vara, mucina ndava iri yese pamberi pake.
23 Asi munodikana kuramba muri mu rutendo, kuti muve no muji jakacihwa, makavanga, mucikaruzi vetero yo masoko akanaka o makazwa, akacumaihwa ku zvisikwa zvese zviri pasi po denga. Inini Pauro, ndakava mushandiri wo masoko akanaka aya.
24 Inini wari ndiri kudakara pa matambujiko andiri kusongana nawo ngo pamusoro penyu. Ndiri kutambujika inga zvakaita Kristu, asi ndiciri kudikana kukwanirisa kutambujika kwangu kuti kubesere muviri wake, uri ungano.
25 Ndakava mushandiri wo ungano iyi mukuzwirana no basa randakapuwa ndi Mwari ngo pamusoro penyu, kuti ndinase kucumaera soko ra Mwari,
26 cakafisika ca Mwari cainga cakavigika kuvhira pa mugariro wo zviro zvo mu nguva yokare no mubarihwana yokare. Asi wari ciri kukhombijwa pambhene ku vashandiri vake vakacena,
27 vakadakarihwa ndi Mwari kuti avazivise upfumi hunoshamaisa hwo cakafisika ici ca Mwari pakati po majinja. Cakafisika ici, ndi Kristu ari pamwepo na imwimwi, zvecireva kuti imwimwi munoimira kuzokujwa pamwepo na iyena.
28 Ndiyena watiri kuzivisa tecingwaja vandhu vese no kujijisa vandhu vese mu ungwaru hwese, kuti tiviise vandhu vese vakakwana kuna Mwari, vari pamwepo na Kristu.
29 Ndinoshanda ngo simba ngo pamusoro po cidisiso ici, ndecivangisira ngo simba rake riri kushanda maningi mandiri.
Masoko o Pasi
^ Vonanyi Kudurujihwa ko Magama.
^ Gama ngo Gama: “mu simba ro.”
^ Vonanyi Kudurujihwa ko Magama.
