Vafiripi 4:1-23
4 Ngo kudaro, hama jangu jandinoda maningi, ndakazara ngo cisuwo* na imwimwi, munondidakajisa, makaita inga junguja rangu; hama jangu jinodiwa, endereranyi mberi makaima mukuzwirana na Mambo.
2 Ndinokumbira Evhodhiya na Sintike kuti vave no murangariro umwewo mukuzwirana na Mambo.
3 Ndinokumbiravo iwewe, mushandi doni wokadi, kuti urambe wecibesera vanakaji ava vanovangisira* pamwepo na inini pa kucumaera masoko akanaka, pamwepo na Krementi no vashandi doni vedu vese, vano mazina akatahwa mu bhuku ro upenyu.
4 Dakaranyi nguva jese ngo pamusoro pa Mambo. Ndinomuvhunjazve kuti: Dakaranyi!
5 Kuzwisisa kwenyu nga kuzivike ngo vandhu vese. Mambo ari phedo.
6 Mucathimwa-thimwa ngo ndava iri yese, asi pa zvese itanyi mukumbiro mecideketera pamwepo no kubonga, itanyi kuti zvikumbiro zvenyu zvizivike kuna Mwari;
7 runyararo hwa Mwari hunopinda kurangarira kwese, ihwona hunozongwarira mwoyo no murangariro yenyu, pecishandiswa Kristu Jesu.
8 Pakupejisira hama, zviro zvese zvo cokwadi, zviro zvese zvinosisira, zviro zvese zvakarurama, zviro zvese zvakacena, zviro zvese zvinodiwa, zviro zvese zvinokujwa, zviro zvese zvakanaka, no zviro zvese zvinosimbhwa, rambanyi mecirangarira ngo zviro izvi.
9 Zviro zvamakajija no zvamakaashira no zvamakandizwa ndecinanga no zvamakavona ndeciita, zviitenyi. Mwari wo runyararo ngaave nemwi.
10 Ndinodakara maningi mu kuzwirana na Mambo ngokuti wari mamusijirazve cido cenyu kwandiri. Kunyange maikaya-kaya ngo pamusoro pangu, amucaingepi no mukana wo kuzvitatija.
11 Andiripi kuvereketa izvi ngo pamusoro po kuda besero, ngokuti ndakajijira kudakara ngo zvandinazvo pa mugariro uri wese.
12 Ndinokwanisa kurarama* ndino zvishoma no kurarama* ndino zvizinji. Mu zvese no pa mugariro uri wese, ndakajijira zvandingaita pandinonga ndino njara no pandinonga ndakaguta, pandinonga ndino zvakawanda no pandinotama.
13 Ku zviro zvese, ndino simba ngo pamusoro pa wiya anondipa simba.
14 Kunyange zvakadaro, imwimwi makaita zvakanaka ngo kutambujika pamwepo na inini.
15 Zvokadi, imwimwi Vafiripi munozvizivavo kuti pamakapera kuzwa masoko akanaka pa hwendo hwo kutanga pandakavha ku Masedhoniya, akuna ungano yakabatana na inini pa shwiro jo kupa no kuashira ciri cese. Ndimwi basi.
16 Pandainga ku Tesaronika, imwimwi makatumira zviro zvandaida kaviri kuciripi kamwe.
17 Andiripi kupsaka kuashira cipo, asi ndinoda kuti muite zvakanaka kuti muwane zvakawanda.
18 Waro ndino zvese zvandinoda, nditori no zvizinji. Wari ndakaashira zvese zvandaida, zvamakatumiraya na Epafrodhito: mupiro wakanaka unonuhira pamwepo no unodakajisa Mwari.
19 Mwari wangu, anozomupa zvese zvamunoda mukuzwirana no upfumi hwo rukujo hwake ecishandisa Kristu Jesu.
20 Mwari Baba wedu, ngavakujwe mbhera narini, kwenda no kwenda. Ameni.
21 Tambisanyi vatendi doni vese mukuzwirana na Kristu Jesu. Hama jese jiri kuno jiri kumutambisa.
22 Vatendi doni vese, maningi-ningi vo pamuzi pa Sezari vari kumutambisa.
23 Unyasha hucikaezaniswi hwa Mambo Jesu Kristu ngahuve mu maitiro amunotatijira.
Masoko o Pasi
^ Ndiri kumurangarira maningi.
^ Kana: “vakahwa ngo simba.”
^ Kana: “kupona.”
^ Kana: “kupona.”
