Ruka 23:1-56
23 Ngo kudaro, vandhu vese vakamuka, vomutora, voenda naye ka Pirato.
2 Ivona vakatanga kumupumbha veciti: “Tabata mundhu uwu ecicengeja vandhu vedu. Iyena waivarambisa kushabira Sezari, ecijidanija Kristu mambo.”
3 Pirato wakamuvhunjisa kuti: “Ndiwe Mambo wo Vajudha?” Iyena wakadavira kuti: “Ndimwi muri kutozvinanga.”
4 Perapo Pirato wakavhunja vapiri vakuru no mbungano kuti: “Andiripi kuvona ndava iri yese pa mundhu uwu.”
5 Asi ivona vaindovangirira veciti: “Zvaari kujijisa vandhu mu Judheya mwese, kuvhira Garireya mbhera kuno, zviri kuitisa kuti vandhu vatame kuzwira mutemo.”
6 Pirato paakazvizwa, wakavhunjisa kuti dangani Jesu wainga Mugarireya.
7 Naaziva kuti Jesu wainga pasi po utongi hwa Herodhi, wakamuendesa ka Herodhi, wainga Jerusarema mu njiku jondhojo.
8 Herodhi paakavona Jesu, wakadakara maningi. Ngokuti iyena waivetera kuvona Jesu pa mukuvo wakareba ngokuti waizwa zviro zvizinji ngo pamusoro pake. Iyena wainga ecida kumuvona eciita mushamaiso.
9 Ngo kudaro, iyena wakatanga kumuitira muvhunjo jakawanda maningi, asi Jesu aazivi kumudavira.
10 Asi vapiri vakuru no vatari vaimuka, vecimupumbha ngo simba.
11 Herodhi no masoca ake vaimurerusa no kumushora ngo kumusimija nguvo yakareba, inomonikira. Perapo wakamuhwirija ka Pirato.
12 Herodhi na Pirato vakava shamwari no shamwari pa njiku yondhoyo, kuveni ivona vaizondana.
13 Pirato wakadanija vapiri vakuru, vatongi no vandhu
14 wovavhunja kuti: “Maviya no mundhu uwu mecinanga kuti ari kucengeja vandhu. Inini ndamuvhunjisa pamberi penyu asi andizivi kuvona ndava jamuri kumupumbhari.
15 Pikija Herodhi, aazivi kuwana ndava yamuri kumupumbhari, ngo kudaro, wamuviisazve kuno. Inga zvamuri kuvona, aazivi kuita ciro caanofanera kuurawa ndicona.
16 Inini ndinozomutambuja, ndomusujunura.”
17 *—-—
18 Vandhu vese vakakhuwa veciti: “Urayanyi mundhu uwu, musujunure Bharabhasi!”
19 (Mwanarume uwu, wainga akadihwa mukadheya ngo ndava yo ku kukumijira vandhu kuti vapandukire utongi kwakaitika mu dhorobhemo no kuuraya mundhu.)
20 Pirato wakabhuyazve naivona, ngokuti waida kusujunura Jesu.
21 Ivona vaikhuwisisa veciti: “Ngaaende pa mutanda!* Ngaaende pa mutanda!”*
22 Pa nguva yocitatu, iyena wakati: “Ngenyi? Washaishenyi? Andizivi kuvona ndaya iri yese ingamuuraisa; inini ndinozomutambuja perapo ndinozomusujunura.”
23 Asi ivona vakavangirira, vecikumbira ngo izwi guru kuti auraiwe. Maizwi avo aikhuwisisa.
24 Ngo kudaro, Pirato wakatendera kuti zvavaidaro zviitwe.
25 Iyena wakasujunura mundhu wavakakumbira, wakadihwaya mu kadheya ngo ndava yo ku kukumijira vandhu kuti vapandukire utongi no kuuraya mundhu, asi wovapa Jesu kuti aurawe mukuzwirana no kuda kwavo.
26 Pavainga vecipinda naye, vakabata mwanarume umweni anodanijwa kuti Simoni wo Sirene, waivha kunja ko dhorobha, vomuthika mutanda wokutambujikira,* wotevera ngo sure ka Jesu.
27 Vandhu vakawanda vaimutevera, kubatanijavo vanakaji vaijitaka paditi vecimucumba no kumucema.*
28 Jesu wakasika wosota vanakaji vaya, wovavhunja kuti: “Vanakaji vo Jerusarema, mucandicema.* Cemanyi* ngo ndava yenyu no yovana venyu;
29 ngokuti jinozoguma njiku jokuti vandhu vanozonanga kudari: ‘Jinodakara shenje* no ndani jicizivi kumbobara pomwe no mazamu acizivi kumwisa!’
30 Perapo vandhu vanozotanga kuvhunja matundhu kuti: ‘Tiwirenyi!’ no zvimatundhu kuti: ‘Tifukijenyi!’
31 Kudari vakaita zviro izvi muti uciri muvishi, ukazooma unozoviya ngo kwapi?”
32 Vanarume vamweni vaviri, vashaishi, vaiendavo kourawa pamwepo naye.
33 Pavakaguma pa ndau inodanijwa kuti Dendhenya, vakamukohomera pa mutanda ngo pamutivi po vashaishi vaya, umwe ku mukono muho, umweni ku mukono boshwe.
34 Jesu wainga ecinanga kuti: “Baba, varegererenyi, ngokuti avazvizivi zvavari kuita.” Kusiyapo izvo, vakapsanga ngo sorti kuti vakovanisane nguvo jake.
35 Vandhu vaiima veciringisa. Asi vatongi vainga vecimuita jee, veciti: “Iyena wakaponesa vamweni; ngaajiponese ega kudari iyena ari Kristu, Wakasanwa ndi Mwari.”
36 Pikija masoca aimushoravo, ecikhwedera phedo naye, omupa vhinyu inoshasha
37 eciti: “Kudari iwewe uri Mambo wo Vajudha, jiponesei.”
38 Panyezuru pake vakatara kuti: “Uwu ndi Mambo wo Vajudha.”
39 Umwe wo vashaishi wainga akapakaikwa pa mutanda, wakatanga kuvereketa masoko anoshora, eciti: “Iwewe uri Kristu, andizvopi? Jiponesei, utiponesevo!”
40 Umweni wakona wakamukamisa eciti: “Iwewe authyi Mwari kani? Wari uri kuwana matambujiko akaezana no ake.
41 Itusu tinofanera kuwana dambujiko iri, ngokuti riri kuva muviyo wo zviro zvatakaita; asi mundhu uwu apana caakashaisha.”
42 Perapo, iyena wakati: “Jesu, ucandikanganwa paunozonghwina mu Umambo hwako.”
43 Jesu wakati kwaari: “Zvokadi, ndinokuvhunja nyamasi kuti: Iwewe unozova na inini mu Paradhiso.”
44 Jainga jookhwedera kuita nguva gumi na mbiri jo masikati,* asi kwakaita cidima cakafukija pasi pese mbhera pa nguva ndhatu jo madeko,*
45 ngokuti zuva rakajima; perapo, jira ro mu ndau yakacenesesa rakamweka ngo pakati.
46 Jesu wakakhuwa ngo izwi guru eciti: “Baba, ndinopa upenyu hwangu mu nyara jenyu.” Paakapera kunanga masoko aya, iyena wakafa.*
47 Paakavona zvaiitika, mutungamiriri wo masoca, wakatanga kukuja Mwari, eciti: “Zvokadi mundhu uwu, wainga akarurama.”
48 Vandhu vese vainga vakaungana pondhopo ngo ndava yo ciitiko ici, vakavona zvainga zveciitika, vakahwirira kanyi vecijitaka paditi.
49 Vese vaizivana naye, vaiima ngo ndhambo. Vanakaji vakamuperekeja kuvha Garireya, vaingavo pondhopo, vecizvivona.
50 Kwainga no mwanarume umweni anodanijwa Josefa, mundhu waireremejwa maningi mu Banje, wainga mundhu waushoni no wakarurama.
51 (Mwanarume uwu wainga acizivi kubesera mazano no zviito zvavo.) Iyena wainga wo Arimateya, dhorobha ro Judheya, waiimiravo Umambo hwa Mwari.
52 Iyena wakaenda pamberi pa Pirato, womukumbira muviri wa Jesu.
53 Wakaubzusa, woufukija ngo nguvo yo mutengo mukuru, wouviga mu guva* rainga rakaciwa pa buwe, ricito ravigwa mundhu.
54 Yainga njiku yo Kunasirira. Sabudu rainga roda kutanga.
55 Asi vanakaji vaakavhaya navo Garireya, vakatevera, vovona guva* riya no mavigihwe aakaithwa,
56 ivona vakahwirira koonasirira zvinonuhira no mafuta anonuhira. Asi ivona vakazorora njiku yo Sabudu, mukuzwirana no mupango.
Masoko o Pasi
^ Vonanyi masoko o pasi ari pana Mateu 17:2.
^ Kana: “ngaakohomehwe pa mutanda.”
^ Kana: “ngaakohomehwe pa mutanda.”
^ Vonanyi Kudurujihwa ko Magama.
^ Kana: “kumurira.”
^ Kana: “mucandirira.”
^ Kana: “riranyi.”
^ Kana: “ciumba; mwanakaji acikabari.”
^ Gama ngo Gama: “nguva yocitandhatu.”
^ Gama ngo Gama: “nguva yocipfumbamwe.”
^ Kana: “wakafema kokupejisira.”
^ Kana: “guva rinoceukijwa.”
^ Kana: “guva rinoceukijwa.”
