Nduyo 73:1-28
Nduyo ya Azafi.
73 Kunasa kunanga, Mwari wakanaka maningi kuno Vaiziraeri, kuno vaya vano mwoyo wakanaka.
2 Inini ndainga ndaaphedo kuti ndisvejeke;Inini ndainga ndaaphedo kuti ndiwe.
3 Ngokuti ndainga no thima no vandhu vanozvikujaPandaivona runyararo wo vandhu vakashata.
4 Ngokuti ivona avazwi kuhwajihwa pavanonga vecifa,Ivona vano uhomi hwakanaka.*
5 Ivona avaneseki inga vandhu vamweni,Nee avatambujiki inga vandhu vamweni.
6 Ngo kudaro, kuzvikuja kwavo kwakadari inga mudhariya mu musipa mavo;Ivona vakasimira uphanga inga nguvo.
7 Majiso avo akazvimba ngo ndava yo kupunda;Ivona vano zviro zvizinji kupinda zvairangarihwa ngo mwoyo wavo.
8 Ivona vanoshora vamweni no kubhuya zviro zvakashata.
Ngo kuzvikuja kwavo, ivona vanonesa vamweni.
9 Ivona vanovereketa inga vari kuvereketa vari kudenga,Ivona vanofamba panyika, rurumi hwavo wecivereketa zviro zvovanoda.
10 Ngo kudaro, vandhu vanohwirira kwavari,Vomwa kumwa yavo yakawanda.
11 Vanoti: “Mwari angazvizivisa kudini?
Kureva kuti Mwari Mukuru-Kuru anoziva zviri kuitika?”
12 Hina, ava ndi vandhu vakashata vacikaneseki ngo zviri zvese mukuvo wese.
Ivona vanoenderera mberi veciengejera upfumi hwavo.
13 Kunasa kunanga, kuvangisira kwese kwandakaita kuti ndive no mwoyo wakanaka kwakava kwa biresi.No kusamba kwandakaita nyara kuti nditame kuva no ndava kwakavazve kwa biresi.
14 Njiku jese inini ndaineseka;Njiku jese ndaitambujika comangwanani.
15 Asi kudari no ndainga ndakabhuya zviro izvi,Ndaizorembesa vandhu venyu.
16 Pandakaeja kuzwisisa zviro izvi,Ndakabararika hwiru.
17 Mbhera pandakanghwina mu ndau huru yakacena ya Mwari,Ndozwisisa zvinozoitikira vandhu vakashata.
18 Kunasa kunanga, imwimwi munovadira pa ndau inosejemuka.
Imwimwi munovaita kuti vawe, vofa.
19 Ivona vanozoparajwa ngo civhumbu!
Ivona vanosongana no matambujiko ngo civhumbu, vofa!
20 Jehovha, ivona vakaezana no hope jinokanganika ngo mundhu paanomuka,Imwimwi pamunomuka, munozovakanganwa.
21 Mwoyo wangu wainga wecihwaja,Inini ndaizwa kuhwajihwa mukati* mangu.
22 Inini ndainga ndicikanasi kurangarira ushoni no kutama kunasa kuzwisisa;Ndaiezana no cinyama cicikarangariri pamberi penyu.
23 Asi wari ndina imwimwi mukuvo wese;Makabata mukono wangu wo muho.
24 Imwimwi munonditungamirira ngo mupango jenyu,Pasure pazvo, munozonditungamirira kuti ndikujwe.
25 Ndiyani wandinae kumatenga?
Kunja kwa imwimwi, apana ciro candinodakarira pa nyika.
26 Muviri wangu no mwoyo zvingaremba,Asi Mwari anozovangisa mwoyo, ngokuti iyena anozova na inini kwenda no kwenda.
27 Zvokadi vandhu vese vanogara ndhambo na imwimwi vanozofa.
Munozopeja vandhu vese vanomusiya ngo kutama kugondeka.
28 Kwandiri kukhwedera phedo na Mwari kwakandinakira
Ndakaita kuti Mambo Mukuru-kuru Jehovha ave citiziro cangu,Kuti ndizivise zviito zvenyu zvese.
