Mucumaeri 8:1-17
8 Ndiyani wakaezana no muzivi? Ndiyani anokwanisa kutonga ndava? Uzivi hwo mundhu, hunovheneka kumeso kwake hwoita kuti kumeso kwake kuve kwakadakara.
2 Inini ndinoti: “Zwirai mutemo ya mambo ngokuti wakaita mbhiko pamberi pa Mwari.
3 Ucakasika kubuda pamberi pake. Ucainikira ciro cakashata, ngokuti mambo angaita zvaanoda.
4 Zvinovereketa mambo zvino simba; ndiyani angakwanisa kumuvhunjisa kudari: ‘Muri kuitenyi?’”
5 Apana ciro cinozotambuja mundhu anozwira mutemo. Mwoyo wo muzivi unoziva nguva yakanaka yokuita ciro no manera akanaka okuciita.
6 Zvecivoneka kuti vandhu vano zvineso zvakawanda, zviro zvese zvinotongwa ngo njira yakanaka pa mukuwo kwawo.
7 Ngokuti apana mundhu anoziva zvinozoitika kumbeji, ndiyani anokwanisa kumuvhunja zvinozoitika?
8 Zvecivoneka kuti akuna mundhu anokwanisa kutonga mwiha wake wo kufema, nee kukwanisa kuurambisa kuti utame kubuda, ngo njira yakaezana, akuna mundhu ano simba ro kutonga njiku yo kufa. Zvecivoneka kuti akuna mundhu anotendehwa kuhwirira kanyi pakati po hondo, ngo njira yakaezana, ushati auzosii vandhu vanouita kuti vatame kufa.
9 Zvese izvi ndakazvivona, ndonasa kurangarijisisa mabasa ese aiitwa pa nyika.* Mundhu ecitonga mundhu doni kuti amutambuje.*
10 Ndakavona vandhu vakashata vecienda kovigwa mu guva, vaya vainga no cirovejeso co kunghwina no kubuda mu ndau yakaceneswa. Asi ivona vaikanganika ngo kukasika mu dhorobha ro vaiitira zviro zvakashata. Izvivo azvina zvazvinobesera.
11 Mwoyo yo vandhu inocunga kuita zvakashata ngo kutama kukasika kutonga ciro cakashata.
12 Pikija mushaishi akaita zviro zvakashata mutengo unokwana kuita 100, woenderera mberi ecipona pa mukuwo wakareba, inini ndinoziva kuti vaya vanothya Mwari wo cokwadi vanozoitihwa zviro zvakanaka ngokuti ivona vanothya Mwari.
13 Asi mushati anozoitihwa zvakashata, iyena aazoengejeri mazuva ake okupona, ngokuti upenyu hwake hwakaita inga munvuriri, ngokuti aathyi Mwari.
14 Kuno ciro cicikabeseri* cinoitika pa nyika: Kuno vandhu vakarurama vari kutajwa inga vakaita zviro zvakashata, kuno vandhu vakashata vari kutajwa inga vakaita zviro zvakanaka. Inini ndinonanga kuti zviro izvivo azvina zvazvinobesera.
15 Ngo kudaro, inini ndakati zviri nane kudakara, ngokuti akuna ciro ciri nane ku mundhu panyika* kupinda kuha, kumwa, no kudakara. Izvi ndizvona zvaanodikana kuita, paanoshanda ngo simba panyika mukati mo njiku jo upenyu hwake jaanopuwa ndi Mwari wo cokwadi.
16 Ndakaita kuti mwoyo wangu uve no uzivi ndovona mabasa ese akaitwa pa nyika. Pikija inini andicaivata usiku no masikati.*
17 Ngo kudaro, ndakarangarijisisa ngo mabasa ese akaitwa ndi Mwari wo cokwadi, ndovona kuti vandhu avangakwanisi kuzwisisa zvinoitika pa nyika. Pikija vandhu vangaeja kuzvizwisisa, asi ivona avakwanisi kuzvizwisisa. Pikija vecinanga kuti tino uzivi hwakawanda maningi wo kuzvizwisisa, asi avangakwanisi kuzvizwisisa.
Masoko o Pasi
^ Gama ngo Gama: “pasi po zuva.”
^ Kana: “amuitire zvakashata.”
^ Kana: “cinonyangajisa.”
^ Gama ngo Gama: “pasi po zuva.”
^ Kangaije: “Vandhu avavati usiku no masikati.”
