Mazwi Akangwara 15:1-33
15 Mupinguro waushoni, unonyaraja ushungu,Asi kuvereketa ngo hasha,* kunobwakija ushungu.
2 Rurumi hwo vazivi, hunonasa kushandisa ushoni uzivi,Asi muromo wo mapenji, unoruca upenji.
3 Majiso a Jehovha ari kumativi ese,Ecivona vandhu vakashata no vandhu vakanaka.
4 Rurumi hwakanyararisa, imuti wo upenyu,Asi magama akashata, anonyagajisa maningi.
5 Benji arireremeji mbhangiro ya baba,Asi muzivi, anotendera kupangihwa.
6 Pa muzi po mundhu wakanaka, pano upfumi hwakawanda maningi,Asi mupocero wo mundhu wakashata, unomuviisira zvineso.
7 Muromo wo vazivi, unondhandhanisa uzivi,Asi mwoyo wo mapenji, auiti zvondhozvo.
8 Mupiro wo vandhu vakashata, unonyenywa ndi Jehovha,Asi mukumbiro wo vandhu vakanaka, unomudakajisa.
9 Jehovha anonyenya gwanja ro mundhu wakashata,Asi anoda mundhu anoda kuita zvakanaka.
10 Mbhangiro, inovoneka inga yakashata ku mundhu anosiya gwanja.Mundhu anonyenya kupangihwa, anozofa.
11 Kudari Jehovha ecikwanisa kuvona vari mu Guva* no vari mumatambujiko,
Kureva kuti Jehovha angakonehwa kuvona zviri mu mwoyo mo mundhu?
12 Mushori, aadi vanomupangira
Nee aakumbiri mazano vazivi.
13 Mwoyo wakadakara, unoitisa kuti mundhu atame kugara akasunga cisununu,Asi mundhu anogara akacamwa, zvondhozvo zvinomurembesa.
14 Mwoyo wakangwara unopsaka zivo,Asi muromo wo mapenji, unoha* zvo upenji.
15 Ku mundhu anozvineso, njiku jese jakashata,Asi mundhu ano mwoyo wakanaka, anobusa nguva jese.
16 Zviri nane kuva no zviro zvidoko wecithya Jehovha,Kupinda kuva mukhupuki, wogara wecithimwa-thimwa.
17 Zviri nane kuha no murivo* wo masakani, muno rudo,Kupinda kuha no nyama, makazara ngo kuzondana.
18 Mundhu anokasika kunyangajwa, anobara mapope,Asi mundhu anosengerera, anonyaraja mapope.
19 Gwanja ro mundhu wakaremba, rino muzwa jakawanda,Asi gwanja ro mundhu wakangwara, rakati setete.
20 Mwana wakangwara anodakajisa baba wake,Asi benji rinorerusa mai waro.
21 Upenji unodakajisa mundhu acina hwiru,*Asi mundhu ano ungwaru, anofamba akasota kwaanoenda.
22 Pacina kubhuisana, mazano aabudi ushoni,Asi pano vapangiri vakawanda, pano muviyo waushoni.
23 Mundhu, anodakara ngo kupa mupinguro waushoni.Masoko anobhuiwa pa nguva kwayo, akanaka maningi!
24 Gwanja ro upenyu, rinomusa mundhu wakanaka,Kuti rimuendese ndhambo no Guva* rakajika.
25 Jehovha anozophwanya nyumba yo vandhu vanojikuja,Asi anozojivirira mugano wo ndau yo noni.
26 Jehovha anonyenya mazano o vandhu vakashata,Asi masoko anodakajisa, akacena kwaari.
27 Mundhu anoda kuganya ngo njira yakashata,Anoviisa zvineso pamuzi pake,
Asi mundhu anonyenya kufidhihwa,* anogara aripo.
28 Mundhu wakanaka, anorangarira acito adavira,Asi muromo wo mundhu wakashata, unoruca zviro zvakashata.
29 Jehovha ari ndhambo no vandhu vakashata,Asi anozwa mukumbiro jinoizwa ngo vandhu vakanaka.
30 Kusothwa ngo mundhu wakadakara,*Kunodakajisa mwoyo,
Masoko akanaka anovangisa maphondo.
31 Anozwa mbhangiro inopa upenyu,Anogara no vazivi.
32 Anonyenya kupangihwa, aareremeji upenyu,Asi anozwa mbhangiro, anowana uzivi.
33 Kuthya Jehovha, kunojijisa mundhu kuti ave muzivi.Kujidodokesa kunotanga, kukujwa kotevera.
Masoko o Pasi
^ Kana: “maguro.”
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Kana: “unopsaka.”
^ Kana: “usavi.”
^ Gama ngo Gama: “acina mwoyo.”
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Kana: “kudhyekehwa.”
^ Gama ngo Gama: “kusothwa ngo majiso anon’ganikira.”
