Mateu 14:1-36
14 Pa mukuvo wondhowo, Herodhi, mutongi wo dhistiritu, wakazwa masoko ngo pamusoro pa Jesu
2 perapo wovhunja vashandi vake kuti: “Uwu ndi Johani Mubhabhatiji. Iyena wakamuswa ku vakafa, ndizvona zvinomuitisaro kuti aite mabasa anoshamaisa.”
3 Herodhi* wainga akabata Johani, womusunga, womudira mu kadheya, ngo ndava ya Herodhiya, mukaji wa Firipi nevanji wake.
4 Ngokuti Johani waimuvhunja kuti: “Amutendehwi kuva no mwanakaji uwu.”
5 Herodhi wainga ecida kumuuraya, asi waithya vandhu vaivona Johani Mubhabhatiji inga muporofeti.
6 Payakaguma njiku yo mabuso o kubahwa ka Herodhi, mwana wokaji wa Herodhiya wakatamba pamberi po vandhu vese, zvokuti Herodhi wakadakajihwa maningi.
7 Iyena wakamugondesa ngo mbhiko kuti waizomupa ciri cese caaizokumbira.
8 Iyena naavhunjwa ndi mai wake, wakati: “Ndipenyi musoro wa Johani Mubhabhatiji mu bandejha pamberi po vandhu vese.”
9 Mambo wakacamwa ngo ndava yazvo, asi wakatendera kuti aupuwe, ngo ndava yo mbhiko yake no yo vandhu vaaiha navo.
10 Ngo kudaro, iyena wakatuma vandhu kuti vaende kogura musoro wa Johani mu kadheya.
11 Musoro wake wakaviiswa mu bandejha wopuwa musikane, iyena woenda nawo ka mai wake.
12 Vajiji va Johani vakazoviya kotora mutembo wake, vouviga. Perapo vakaenda kovhunja Jesu.
13 Jesu naazvizwa, wakapakira ngarava, woenda ku ndau icina vandhu kuti agare ega. Asi mbungano payakazvizwa, yakamutevera ngo soka yecivha mu madhorobha.
14 Naabzuka mu ngarava, wakavona mbungano huru yo vandhu, wovazwira pena, perapo worapa vatenda vavo.
15 Zuva no ravira, vajiji vake vakaviya kwaari, vomuvhunja kuti: “Pano pakaita pa bani, nguva yapera; pindisanyi vandhu, kuti vaende kotenga zvokuha zvavo ku madhorobha.”
16 Asi Jesu wakati kwavari: “Avadikani kupinda. Imwimwi vapekejenyi zvokuha.”
17 Ivona vakadavira kuti: “Atina ciro pano. Asi tino pau shanu no hove mbiri basi.”
18 Iyena wakati: “Zviviisenyi kuno.”
19 Perapo, wakavhunja mbungano kuti igare pa ndhonve.* Wakatora pau shanu no hove mbiri, wosota kudenga, woita mukumbiro, perapo wakagura-gura pau jiya, wojiashija vajiji vake, vajiji vojipekeja mbungano.
20 Vese vakaha voguta, vounganija matimbu o pau akasara, vozaja zvitengu gumi na zviviri.
21 Vaya vakaha, vaikwana kuita zviuru zvishanu* zvo vanarume, kusiyapo vanakaji no vana vadoko.
22 Ngo kukasika, iyena wakavhunja vajiji kuti vapakire ngarava. Ngokuti iyena waida kuti vatungamire kuambuka mwombera, paainga ecieneka mbungano.
23 Paakapera kueneka mbungano, wakakhwira ega pa dundhu koita mukumbiro. Zuva porakavira, iyena wainga ari ega kondhoyo.
24 Pa mukuvo uwu, ngarava yainga yaandhambo* no mutundhu, yecitandhuswa ngo mavimbi ngokuti vaiyenda kwaivha mbhepo.
25 Mu maamba kueja,* Jesu wakaenda kwavari ecifamba ngo panyezuru po kumwa.
26 Vajiji vake povakamuvona ecifamba ngo panyezuru po kumwa, vakathya veciti: “Zicinyi iro?” Vecikhuwa ngo kuthya.
27 Asi Jesu wakavavhunja kuti: “Ndini, mucathya; cunganyi.”
28 Pedhru wakamudavira eciti: “Mambo, kudari ari imwimwi, ndivhunjenyi kuti ndiviye kwamuriwaro ndecifamba ngo panyezuru po kumwa.”
29 Iyena wakati: “Izai!” Ngo kudaro, Pedhru wakabzuka mu ngarava, wofamba ngo panyezuru po kumwa, ecienda kuna Jesu.
30 Asi paakaringisisa zibepo, Pedhru wakathya, wotanga kundondomera, ecikhuwa kuti: “Mambo, ndiponesenyi!”
31 Jesu wakatambanuja nyara yake ngo kukasika womubata, ecimuvhunja kuti: “Iwewe mundhu wo kutenda padoko, wakana-kana ngenyi?”
32 Povakapakira mu ngarava, mbhepo yakanyarara.
33 Vaya vainga mu ngarava vakamugwadamira, veciti: “Zvokadi kamare, imwimwi muri Mwana wa Mwari.”
34 Ivona vakaambuka, voceva ku Genezareti.
35 Vandhu vo mundauyo pavakamuziva, vakatokotesa masoko okuti Jesu ari kuviya mu ndharaundhemo, vandhu vemo vakamuviisira vandhu vese vaihwaja.
36 Ivona vecideketera, vakakumbira Jesu kuti vapsase basi ciuruji co nguvo yake. Vese vaipsasa ciuruji co nguvo yake, vaivanga.
Masoko o Pasi
^ Uwu, ndi Herodhi Antipa. Vonanyi Kudurujihwa ko Magama.
^ Zvimaushwa zvakamera.
^ 5.000.
^ Kana: “yainga yaano mumango wo mazana o metru.”
^ Kurevera pa nguva jinokhwedera kuita 3:00 mbhera 6:00 jo mangwanani.
