Mabasa o Vapostori 4:1-37
4 Vaviri ava pavainga vecibhuya no vandhu, vapiri no mukuru-kuru wo themberi no Vasadhusi, vakaviya kwavari.
2 Ivona vainga vakanyangajwa ngokuti vapostori vaijijisa vandhu no kutokotesa pambhene ngo pamusoro po kumuswa kwa Jesu.
3 Ngo kudaro, ivona vakavasunga vovadira mukadheya mbhera njiku yakazotevera, ngokuti zuva rainga ravira.
4 Asi vandhu vazinji pakati pa vaya vaipurutana zvavainanga, vakazvitenda. Mutengo wo vanarume wakazoguma pa kuita zviuru zvishanu.*
5 Pa njiku yakazotevera, vatongi vavo, vakuru no vatari vakaungana mu Jerusarema,
6 pamwepo na Anasi mutungamiriri wo vapiri, Khaifasi, Johani, Areshandre no ukama hwese hwo mutungamiriri wo vapiri.
7 Ivona vakadira Pedhru na Johani pakati pavo, votanga kuvavhunjisa kuti: “Ndiyani wakamupa simba ro kuita zviro izvi? Munozviita ngo zina raani?”
8 Pedhru naazara ngo mujimu mucena, wakavavhunja kuti:
“Vatungamiriri vo vandhu no vakuru,
9 kudari itusu tecitongwa nyamasi ngokuti taitira zvakanaka ku mwanarume wakaremara, imwimwi mecida kuziva kuti ndiyani wamurapa,
10 zivanyi mwese imwimwi no vandhu vese vo Iziraeri, kuti ngo zina ra Jesu Kristu wo Nazareta, wamakakohomeraya pa mutanda, asi Mwari womumusa ko vakafa, ndiyena waita kuti mwanarume wakaimari pamberi penyu, avange.
11 Jesu uwu ndiyena ‘buwe rakarambwa ndimwi vavaki, rakazova buwe guru ro pacikina.’
12 Kusiyapo izvo, akuna mundhu umweni angaponesa vandhu, ngokuti akuna zina rimweni rakapuwa vandhu pasi po denga kuti vaponeswe ndirona.”
13 Pavakavona kucunga ka Pedhru na Johani, veciziva kuti vainga vacizivi kujija, vacina nduma, izvi zvakavakahamarisa maningi. Ivona vakaziva kuti vainga na Jesu.
14 Pavainga vecivona mwanarume waraphwaya wakaima navo, ivona vakakonehwa co kunanga.
15 Ngo kudaro, vakavavhunja vabude mu Sinedhriyo, kusarepo vakatanga kuvhunjisana zvo kuita,
16 veciti: “Tovaitenyi vandhu ava? Ngokuti vaita mushamaiso ucikakanganiki, wavoneka ngo vagari vese vo Jerusarema, itusu atingazvikaniji.
17 Kuti zvitame kundhandhanika ku vandhu vese, ngativathyisijire, tovavhunja kuti vatame kuvhunjazve ari wese ngo pamusoro po zina iri.”
18 Ngo kudaro, ivona vakavadanija vovavhunja kuti vatame kunanga kana kujijisa ciri cese ngo zina ra Jesu.
19 Asi Pedhru na Johani vakavadavira kuti: “Kudari mecirangarira kuti zvakanaka pamberi pa Mwari, kuzwira imwimwi kuciripi iyena Mwari, izvo ngozvenyu.
20 Asi itusu atikwanisi kuregera kuvereketa zviro zvatakavona no zvatakazwa.”
21 Zvecivoneka kuti avazivi kuwana ndava inovaitisa kuti vatambujwe, vecithya vandhu, vakavathyisijirazve vovapindisa, ngokuti vandhu vese vaikuja Mwari ngo pamusoro po zviro zvainga zvaitika.
22 Mwanarume wakaraphwari ngo mushamaiso wainga no makore anodarika makumarongomuna.
23 Pavakasujunuhwa, vakaenda ku vajiji vamweni, vovavhunja zvavakavhunjwa ngo vapiri vakuru no madhodha.
24 Pavakazvizwa, vakaita mukumbiro pamwepo kuna Mwari, veciti:
“Mambo Mukuru-kuru, Ndimwi makaita denga no nyika no jombe no zviro zvese zviri mukati mazvo.
25 Ndimwi makashandisa mujimu mucena ngo muromo wa cekuru wedu Dhavhidhi, mushandiri wenyu, monanga kuti: ‘Ngenyi majinja ari kuita bope, vandhu vecirangarijisisa zviro zvicina shwiro?
26 Majimambo o nyika akanasirira kuti ahwisane na Jehovha* no wokuzojwa wake.* Vatungamiriri vakaungana voita umwe, kuti vahwisane navo.’
27 Zvokadi, Herodhi na Ponsiyo Pirato no vandhu vo majinja pamwepo no Vaiziraeri vakaungana mu dhorobha iri kuti vamukire Jesu mushandiri wenyu wakacena, wamakazoja,
28 kuti vaite zvainga zvakagajwa ngo simba renyu no kuda kwenyu kuti zviitike.
29 Wari Jehovha,* izwanyi kuthyisijira kwavo, muite kuti varanda venyu vaenderere mberi vecibhuya soko renyu ngo kucunga kwese,
30 pamunonga mecitambanuja nyara yenyu kuti murape, kweciitika zvitatijo no mushamaiso ngo zina ra Jesu, mushandiri wenyu wakacena.”
31 Pavakapeja kuita mukumbiro wo kudeketera, ndau yavaiunganaro yakazungunyika, vese vakazara ngo mujimu mucena, votanga kubhuya soko ra Mwari ngo kucunga.
32 Kusiyapo izvo, vandhu vese vakatenda vakava no mwoyo umwe no murangariro umwe, apana na umwe wavo wainanga kuti zviro zvaainga nazvo ngo zvake ega, asi vese vaipekejana zvavainga nazvo.
33 Vapostori vakaenderera mberi veciita ucapupu ngo simba guru ngo pamusoro po kumuswa ka Mambo Jesu no makomborero mazinji avaiwana ngo unyasha hucikaezaniswi.
34 Zvokadi, apana naumwe wavo wainga no utami ngokuti vese vainga no munda no nyumba, vaitengesa voviisa mare yavaiwanaro,
35 voipekeja vapostori. Perapo, yopekejwa umwe na umwe mu kuzwirana no zvaanotama.
36 Ngo kudaro, Josefa, waidanijwa ngo vapostori kuti Bharnabha (rikasandujwa rinoreva kuti: “Mwana wo Runyarajo”), Murevhi wakabarihwa Shipre,
37 wainga no munda, iyena wakautengesa, woviisa mareyo kuti aipekeje vapostori.
Masoko o Pasi
^ 5.000.
^ Vonanyi Kudurujihwa ko Magama.
^ Kana: “Kristu wake.”
^ Vonanyi Kudurujihwa ko Magama.
