Mabasa o Vapostori 2:1-47
2 Pa njiku yo Mutambo wo Pentekoste, vese vainga vakaungana pa ndau yondhoyo.
2 Ngo civhumbu, kwakazika kutindhira kwecivha kudenga, kwakaezana no kutindhira ko mbhepo yakavanga.* Kutindhira uku kwakazaja nyumba yese yavaigararo.
3 Murazvu wo muriro waiita inga rurumi, waivoneka kwavari wakamata pamusoro po umwe na umwe,
4 ivona vakazara ngo mujimu mucena, votanga kuvereketa ndumi jakasiyana-siyana, mukuzwira no kutungamirihwa kwavaiithwa ngo mujimu mucena kuti vaverekete.
5 Pa nguva iyi, Vajudha vaya vaithya Mwari, vainga vari mu Jerusarema, vecivha ku majinja ese ari panyika.
6 Ngo kudaro, pavakazwa kutindhira kwiya, mbungano yakaungana yecikahamara, ngokuti umwe na umwe waivazwa vecivereketa ndumi yake kamare.
7 Ivona vakakahamaradi kamare, veciti: “Vonanyi ava, asipi Vagarireya vari kuvereketari?
8 Waro, zviri kuitisa kudini kuti umwe na umwe wedu azwe ndumi yake kamare?
9 Pakati pedu pano vandhu vanogara Partiya, Medhiya no Erami; vagari vo Mezopotamiya, Judheya, Kapadhosiya, Ponto no porovhinsiya yo Aziya,
10 Frijiya no Pamfiriya, Ejipita no mutundhu yo Ribhiya phedo no Sirene; vavhakaci vakavha Roma, Vajudha no vakatendeuka kuti vave Vajudha;
11 vandhu vo Kreta; no Arabhiya. Asi tiri kuvazwa vecibhuya ngo ndumi jedu ngo pamusoro po mabasa o simba a Mwari.”
12 Vese vakakahamara, voperehwa ngo mazano, vecivhunjisana kuti: “Zvinorevenyi izvi?”
13 Vamweni vaivaseka veciti: “Ivona vakarejera ngo vhinyu inotapira.”
14 Pedhru wakamuka woima pamwepo no vapostori Gumi na Umwe, wovavhunja ngo izwi guru kuti: “Vandhu vo Judheya na imwimwi mwese munogara mu Jerusarema, zivanyi izvi, munase kupurukira masoko angu.
15 Vandhu ava avazivi kurejera inga zvamunorangarira, ngokuti jiciri nguva nvumbamwe jo mangwanani* o njiku.
16 Asi, izvi ndizvona zvainga zvakanangwa ngo muporofeti Joeri kuti:
17 ‘Mwari anoti: “Mu njiku jokupejisira, ndinozodurura mujimu wangu panyezuru po mushovo wese wo vandhu. Vana venyu vorume no vokaji vanozoporofeta, majaha enyu anozovona zvivoniso, madhodha enyu anozorota hope.
18 Mu njiku jondhojo ndinozodururazve mujimu wangu ku varanda vangu vorume no vokaji, ivona vanozoporofeta.
19 Ndinozoita mushamaiso kumatenga no panyika. Mushamaiso iji jinozova jo ngazi, muriro no makwiti o usi.
20 Zuva rinozoita cidima, mweji unozoita ngazi icito yaguma njiku huru ya Jehovha* icikazokanganiki.
21 Mundhu wese anodanija zina ra Jehovha* anozoponeswa.”’
22 “Vandhu vo Iziraeri, izwanyi masoko aya: Jesu wo Nazareta wakava mundhu wakakhombijwa pambhene kwamuri ndi Mwari ngo mabasa o simba, mushamaiso no zvitatijo zvakaithwa ndi Mwari pakati penyu ecimushandisa inga zvamunoziva.
23 Mundhu uwu wakapihwa ngo kuda ka Mwari no zvaaiziva, imwimwi makamukohomera pa mutanda ngo nyara jo vashaishi, momuuraya.
24 Asi Mwari wakamumusa no kumusujunura mu* rufu, ngokuti zvainga zvicikatendehwi kuti iyena agare akabathwa ngo rufu.
25 Ngokuti Dhavhidhi anonanga kudari ngo pamusoro pake: ‘Ndinoita kuti Jehovha* agare pamberi pangu mukuvo wese, ngokuti iyena ari pa mukono muho wangu, kuti inini nditame kuzungunyiswa.
26 Ndizvona zvinondiita kuti mwoyo wangu udakare, ndakabhuya ndakadakara maningi. Ndinorarama ndecigonda Mwari;
27 ngokuti amuzondiregeri mu Guva,* amuzosiyi mundhu wakagondeka ecivora.
28 Imwimwi makandiita kuti ndizive makwanja o upenyu; munozondizaja ngo mudakaro pa mberi penyu.’
29 “Hama, nditenderenyi kuti ndibhuye ndakasujunuka ngo pamusoro pa cekurukuruhwe wedu Dhavhidhi. Ivona vakafa vovigwa. Guva ravo riciri mudhorobha muno mbhera nyamasi.
30 Zvecivoneka kuti iyena wainga ari muporofeti, eciziva kuti Mwari wainga akamugondesa* kuti umwe wo mubarihwana wake waizogara pa kadera yake yo umambo,
31 iyena wakavona wobhuya ngo pamusoro po kumuswa kwa Kristu, kuti iyena aazivi kusiiwa mu Guva* nee nyama yake aizivi kuvora.
32 Mwari wakamusa Jesu uwu, itusu tese takakuvona* kumuswa kwake.
33 Ngo kudaro, zvecivoneka kuti iyena wakakujwa wodihwa pa mukono muho wa Mwari, iyena wakaashira mujimu mucena wakagondeswa ndi Baba. Iwona wakadururihwa kwamuri inga zvamuri kuvonari no kuzwa.
34 Dhavhidhi aazivi kukhwira kudenga, asi iyena wakati: ‘Jehovha* wakavhunja Mambo wangu kuti: “Garai pa mukono muho wangu
35 mbhera ndiite kuti vavengi vako vave ciciko co soka jako.”’
36 Ngo kudaro, jinja rese ro Vaiziraeri, ngarizive kamare kuti Mwari wakamuita Mambo na Kristu, Jesu wondhowo kamare wamakakohomeraya pa mutanda.”
37 Pavakazwa zviro izvi, vakatanga kujidemba mu mwoyo mwavo, vovhunja Pedhru no vapostori vamweni kuti: “Hama, waro toitenyi?”
38 Pedhru wakavavhunja kuti: “Khauyanyi! Umwe na umwe wenyu ngaabhabhatijwe ngo zina ra Jesu Kristu kuti muregerehwe zvishaishi zvenyu. Mukadaro, imwimwi munozoashira cipo co mwoyo wese co mujimu mucena.
39 Ngokuti cigondiso ici ngocenyu no vana venyu, no vese vari ndhambo, pomwe no vese vangadanijwa ndi Jehovha* Mwari wedu, kuti vaende kwaari.”
40 Iyena wainasa kuvadurujira ngo pamusoro po masoko akanaka no kuvangwaja ngo masoko mazinji eciti: “Jiponesenyi pa mubarihwana uwu wakashata.”
41 Ngo kudaro, vaya vakatenda masoko ngo mudakaro wese vakabhabhatijwa. Pa njiku iyi vandhu vakaengejeka, vaikhwedera kuita zviuru zvitatu.*
42 Ivona vakaenderera mberi vecibatisisa zvavaijijiswa ngo vapostori, veciungana pamwepo,* veciha, no kuita mukumbiro.
43 Zvokadi, vandhu vese vakathya. Vapostori vakatanga kuita zvishamaiso no zvitatijo zvakawanda.
44 Vese vaya vakava vatendi, vainga pamwepo vecipekejana zvavainga nazvo kuti vashandise,
45 vecitengesa zviro zvavo no upfumi hwavo vopekejana mare yavaiwanaro, mukuzwirana no zvaidiwa nga umwe na umwe.
46 Mukuvo wese, ivona vainga mu themberi njiku jese, vakabatana kuti vaite ciro cimwe. Ivona vaiha mu mamuzi mo vamweni, vecipekejana zvo kuha zvavo ngo mwoyo wese. Ivona vaizviita vakadakara maningi,
47 vecikuja Mwari no kudakarihwa ngo vandhu vese. Pamukuvo wondhowo, Jehovha* waiengejera vatendi njiku jese, kuti vazoponeswe.
Masoko o Pasi
^ Kana: “ko zidutu.”
^ Gama ngo Gama: “nguva yocitatu.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kangaije: “mu mapote o.”
^ Vonanyi Kudurujihwa ko Magama.
^ Kana: “Haidhesi,” kufa kunoita vandhu vese. Vonanyi Kudurujihwa ko Magama.
^ Kana: “akapika kwaari.”
^ Kana: “Haidhesi,” kufa kunoita vandhu vese. Vonanyi Kudurujihwa ko Magama.
^ Gama ngo Gama: “tiri zvapupu zvo.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ 3.000.
^ Kana: “vecishandisa zviro zvavo pamwepo.”
^ Vonanyi Kudurujihwa ko Magama.
