Johani 12:1-50
12 Njiku ndhandhatu Phasika icito yatanga, Jesu wakaguma Bhetaniya kwaingaya na Razaro, wiya wakamuswaya ndi Jesu mu rufu.
2 Ivona vakamunasirira zvokurarira. Marita ndiyena waiperekera. Razaro wainga umwe wo vaiha naye.
3 Mariya wakatora meya ritru yo mafuta anonuhira, o nardho icizivi kuvhengwa, anodhura maningi. Iyena wakamadururira pa soka ja Jesu, wopukuta ngo vhuji rake. Mumba mwese makazara ngo kunuhira ko mafuta.
4 Judha Iskariyote, umwe wo vajiji vake, waidaya kuzomutengesa, wakati:
5 “Ngenyi mafuta anonuhira aya aazivi kutengeswa ngo mutengo wo mazana matatu* o madhenariyo,* mareyo yopuwa varombo?”
6 Iyena aazivi kunanga izvi ngo kuda kubesera varombo, asi iyena wainga ari mbavha. Waigara no bhokiso ro mare, eciba mare yaidihwemo waro.
7 Perapo, Jesu wakati: “Muregerenyi ecizviita, ngokuti ari kuita zvandinozoithwa pa njiku yo kuvigwa kwangu.
8 Imwimwi muno varombo mukuvo wese, asi amuzovi na inini mukuvo wese.”
9 Vajudha vazinji pavakaziva kuti Jesu wainga ari kondhoyo, ivona vakaviya kuzomuvona, pomwe no kuvona Razaro, wakamuswaya ndi Jesu ku vakafa.
10 Vapiri vakuru vakaita zano ro kuurayavo Razaro,
11 ngokuti Vajudha vazinji vaiendeyo no kutenda Jesu ngo ndava yake.
12 Pa njiku yakatevera, mbungano yakaenda ku mutambo ku Jerusarema, yakazwa kuti Jesu ari kwendavo kondhono.
13 Ngo kudaro, ivona vakatora matavi o mucindu, voenda komutandamija,* vecidanijira kuti: “Mwari, tinodeketera kwamuri, ponesanyi! Komboreranyi wiya anoviya ngo zina ra Jehovha,* Mambo wo Vaiziraeri!”
14 Jesu paakawana cimwana co mbongoyo, wakacipakira inga zvakatahwa kuti:
15 “Ucathya mwana wokaji wo Ziyoni. Vonai! Mambo wako ari kuviya, wakapakira cimwana co mbongoyo.”
16 Pakutanga, vajiji vake avazivi kuzwisisa zviro izvi, asi Jesu paakazokujwa, ivona vakazorangarira kuti zviro zvavakamuitiraya, zvainga zvakatahwa ngo pamusoro pake.
17 Jesu paakadanija Razaro muguva, womumusa ko vakafa, vandhu vaainga navo vaiita ucapupu hwo ciitiko ici.
18 Ngo zvakaitisazve kuti mbungano iyende kosongana naye, ngokuti vainga vazwa kuti wakaita mushamaiso uwu.
19 Ngo kudaro, Vafarisi vakavhunjana ngocavo kuti: “Muri kuvona kuti apana catiri kukwanisa. Vonanyi! Vandhu vese vari kumutevera.”
20 Kwainga no Vagiriki vainga vakaviya kuzonamata pa mutambo.
21 Ivona vakakhwederera Firipi wo ku Bhetsaidha yo Garireya, vomukumbira kuti: “Taida kuvona Jesu.”
22 Firipi wakaenda kovhunja Andereya. Andereya na Firipi voenda kobhuya na Jesu.
23 Asi Jesu wakavapingura kuti: “Yaguma nguva yo kuti Mwana wo mundhu akujwe.
24 Ndinomuvhunja zvokadi kuti: Mucece wo tirigu ukatama kuwira pasi, wotama kufa, unondogara uri mucece wondhowo basi; asi ukafa, unobara mucero.
25 Wiya anoda upenyu hwake anohuruza,* asi wiya anonyenya upenyu hwake mu nyika ino, anozowana upenyu hucikaperi.
26 Kudari mundhu ecida kundishandira, ngaanditevere, pandinova ndiponavo panova mushandiri wangu. Kudari mundhu ecida kundishandira, Baba vanozomukuja.
27 Wari ndiri kuneseka, ndonangenyi? Baba, ndiponesenyi pa nguva iyi. Pikija zvakadaro, ndizvona zvandigumisari pa nguva iyi.
28 Baba, kujanyi zina renyu.” Perapo, kwakazika izwi rakavha kudenga reciti: “Ndakarikuja, ndinozorikujazve.”
29 Vandhu vazinji vainga vakaima pondhopo vakazvizwa, vakatanga kunanga kuti kwainga kwapaja mbheni. Vamweni vakananga kuti: “Ngirozi yabhuya na iyena.”
30 Jesu wakadavira kuti: “Izwi iri arizivi kuzika ngo ndava yangu, asi razika ngo ndava yenyu.
31 Nyika iyi iri kutongwa; mutongi wo nyika ino, anozogogomehwa.
32 Asi inini, kudari ndikakohomehwa pa mutanda, ndinozokwevera vandhu vo mushovo wese kwandiri.”
33 Iyena wainanga izvi kuti atatije mafire aaizoita.
34 Mbungano yakamudavira kuti: “Itusu takazwa ngo Mutemo kuti Kristu aazofi. Waro ngenyi unonanga kuti Mwana wo mundhu anozokohomehwa pa mutanda? Ndiyani Mwana womundhuwo?”
35 Ngo kudaro, Jesu wakati kwavari: “Ruvheneko huciri na imwimwi pa mukuvo wakati kuti. Fambanyi pamunonga muno ruvheneko, kuti cidima citame kumunyisa; wiya anofamba mu cidima aakuzivi kwaanoenda.
36 Tendanyi ruvheneko pamunonga muciri no ruvheneko, kuti muve vana vo ruvheneko.”
Jesu wakabhuya zviro izvi, woenda kofindara.*
37 Iyena wakaita mushamaiso jakawanda pamberi pavo, asi ivona avazivi kumutenda,
38 kuti masoko o muporofeti Isaya akwanirisike, okuti: “Jehovha,* ndiyani wakatenda zvatainanga? Ndiyani wakavoneswa mukono wa Jehovha?”
39 Isaya wakanangazve cavaitama ndicona kutenda eciti:
40 “Iyena wakapofumaja majiso avo no kutindivaja mwoyo yavo, kuti vatame kuvona ngo majiso avo no kuzwisisa ngo mwoyo yavo, votendeuka, kuti ndivarape.”
41 Isaya wakabhuya zviro izvi ngo pamusoro pa Kristu ngokuti wakavona cigaro cake cakakhwirira.
42 Pikija zvakadaro, vatungamiriri vazinji vo Vajudha vaimutenda, asi avacaijibudisepi pambhene ngokuti vaithya kugogomehwa mu sinagoga ngo Vafarisi;
43 ngokuti vaida maningi kukujwa ngo vandhu kuciripi ndi Mwari.
44 Jesu wakananga ngo izwi guru kuti: “Wiya anonditenda aatendi inini basi, asi anotendavo wakandituma;
45 wiya anondivona, anovonavavo Wiya wakandituma.
46 Inini ndakaviya inga ruvheneko mu nyika, kuti mundhu wese anonditenda atame kugara mu cidima.
47 Kudari mundhu akazwa masoko angu wotama kumatenda, andizomutongi; ngokuti andizivi kuza kotonga nyika, asi ndakaviya kuzoponesa nyika.
48 Asi mundhu wese anondiramba, wotama kuashira masoko angu, ariyo anomutonga. Masoko andinovereketa ndiwona anozomutonga pa njiku yokupejisira.
49 Ngokuti andizivi kuvereketa masoko angu, asi Baba vakandituma vakandipa mupango ngo pamusoro po zvandinodikana kunanga no kujijisa.
50 Inini ndinozviziva kuti mupango wavo unowanisa upenyu hucikaperi. Ngo kudaro, zvese zvandinovereketa, ndinovereketa inga zvandakavhunjwa ndi Baba.”
Masoko o Pasi
^ 300.
^ Zingwenjere ro Ciroma rairema mutengo wo 3,85g, raidanijwa kuti dhenariyo.
^ komukhinga.
^ Vonanyi Kudurujihwa ko Magama.
^ Gama ngo Gama: “anohuparaja.”
^ Kana: “kovanda.”
^ Vonanyi Kudurujihwa ko Magama.
