Jeremiya 34:1-22
34 Nebhukadhinezari* Mambo wo Bhabhironi pamwepo no masoca ake ese no umambo hwese hwo panyika waitongwa ndiyena no vandhu vese, paainga ecihwisa Jerusarema no madhorobha aro ese akaritendeneja, Jehovha wakavhunja Jeremiya masoko aya:
2 “Jehovha Mwari wo Iziraeri wakananga kudari: ‘Endai woovhunja Zedhekiya mambo wo Judha masoko aya: “Izvi ndizvona zvinonanga Jehovha. ‘Ndiri kudira dhorobha iri mu nyara ja mambo wo Bhabhironi, iyena anozoripisa ngo muriro.
3 Iwewe auzopokonyoki mu nyara jake, ngokuti unozotohwa woenda koodihwa mu nyara jake. Iwewe unozosota majiso a mambo wo Bhabhironi, iyena anozobhuya na iwewe meso ngo meso, tevere wozoenda ku Bhabhironi.’
4 Ngo kudaro, izwai soko ra Jehovha iwewe Zedhekiya mambo wo Judha. ‘Izvi ndizvona zvinonanga Jehovha ngo pamusoro pako: “Iwewe auzofi ngo banga.”
5 Iwewe unozofa mu runyararo, ivona vanozopisa muviri wako inga zvavakaita no majicekuru ako, majimambo akatanga kutonga iwewe ucito wabahwa. Vandhu vanozocumba veciti: ‘Maiwee, mambo wangu’ ngokuti inini ndakavereketa masoko aya,’ izvi ndizvona zvinonanga Jehovha.”’”’”
6 Ngo kudaro, muporofeti Jeremiya wakavhunja masoko aya Zedhekiya mambo wo Judha mu Jerusarema,
7 pa mukuvo wokuti masoca a mambo wo Bhabhironi aihwisa Jerusarema no madhorobha ese o Judha ainga akasara, zvinoreva Rakishi no Azeka, ngokuti ndiwona basi ainga akavanga pa madhorobha ainga asara o Judha.
8 Jehovha wakavhunja masoko aya Jeremiya, pasure pokuti mambo Zedhekiya wainga apera kuita citenderano no vandhu vese vo Jerusarema kuti vazivise rusujunuko,
9 kuti mundhu umwe na umwe asujunure varanda vake vo Cihebheru, varanda vorume no vokaji kuti patame kuwanika mundhu anoenderera mberi eciita muranda hama yake yo Cijudha.
10 Vatungamiriri vese no vandhu vese vakazwira. Ivona vakaita citenderano cokuti vandhu vese vaizosujunura varanda vavo vorume no vokaji, apacaidikanazve kuwanika mundhu anoenderera mberi ecivaita varanda. Ivona vakazwira vovasujunura.
11 Pakufamba ko nguva, vakaviisazve varanda vorume no vokaji, vovavangirija kuti vavezve varanda.
12 Ngo kudaro, Jeremiya wakaashira soko ra Jehovha. Jehovha wakamuvhunja kudari:
13 Jehovha Mwari wo Vaiziraeri wakati: ‘Inini ndakaita citenderano no majicekuru ako pa njiku yandakavavhisa mu nyika yo Ejipita, pa nyumba yo varanda ndeciti:
14 “Makore manomwe akapera, umwe na umwe wenyu anodikana kusujunura hama yake yo Cihebheru yaakatengesehwa yomushandira ko makore matandhatu; iwewe unodikana kumusujunura.” Asi majicekuru ako aazivi kundizwira nee kuteya njeve.
15 Nopapera mukuvo mushoma,* imwimwi mahwirira sure, moita zvakanaka pamberi pangu, mozivisa rusujunuko ku mudoni wenyu, makaita citenderano pamberi pangu pa nyumba inozivika ngo zina rangu.
16 Imwimwi makasvipija zina rangu pamakaviisa varanda venyu, vorume no vokaji ngo kuda kwavo, movavangirija kuti vavezve varanda.’
17 “Ngo kudaro, izvi ndizvona zvinonanga Jehovha: ‘Imwimwi amuzivi kundizwira pamakazivisa rusujunuko ku umwe na umwe wenyu ku hama yake no ku mudoni wake. Ngo kudaro, wari ndiri kumuzivisa rusujunuko,’ izvi ndizvona zvinonanga Jehovha, ‘rusujunuko hwokuti imwimwi munozofa ngo banga, ndhendha no njara. Ndozomuita kuti muve ciro cinothyisa ku umambo hwese hwo panyika.
18 Izvi ndizvona zvinoitika ku vandhu vaya vakaphwanya citenderano cangu, ngokuti avazivi kuzwira masoko o citenderano covakaita pamberi pangu pavakagura ngo pakati mwana wo n’gombe vopinda ngo pakati po matimbu ayo,
19 kunangira vatungamiriri vo Judha, vatungamiriri vo Jerusarema, vatongi vo umambo no vandhu vese vo nyika ino vakapinda ngo pakati po matimbu o mwana wo n’gombe:
20 Ndinozovadira mu nyara jo vavengi vavo vari kupsanga kuvauraya, mutembo yavo inozoita zvokuha ku shiri no ku zvinyama zvo musora.
21 Ndinozodira Zedhekiya mambo wo Judha no vatungamiriri vake mu nyara jo vavengi vavo no munyara jo vandhu vaya vari kupsanga kuvauraya no munyara jo masoca a mambo wo Bhabhironi, avo vari kutamaro kumuhwisa.’
22 “‘Inini ndinozovavhunja zvavanozoda kuita,’ izvi ndizvona zvinonanga Jehovha, ‘ndinozovaviisa ku dhorobha iri, ivona vanozorihwisa, voritora no kuripisa ngo muriro; madhorobha o Judha anozoita mathere, acina mundhu anozogaremo.’”
Masoko o Pasi
^ Gama ngo Gama: “Nebhukadhirezari.” Aya ndiwona matarihwe amweni.
^ Gama ngo Gama: “Nyamasi.”
