Jeremiya 29:1-32
29 Aya ndiwona masoko ainga mu karata yakatumihwa ndi Jeremiya kuvha ku Jerusarema, yoendeswa ku vakuru vainga vakasara pakati po vandhu vainga vakaendeswa kuuranda, ku vapiri, ku vaporofeti no ku vandhu vese vainga vakatohwa ndi Nebhukadhinezari kuvha ku Jerusarema voendeswa kuuranda ku Bhabhironi.
2 Iyena wakatumira karata iji mambo Jekoniya paakapera kubuda mu Jerusarema pamwepo na mai wake,* vatongi, vatungamiriri vo Judha no vo Jerusarema, vavezi no vanyungurusi vo simbi.*
3 Iyena wakatumira karata iyi na Erasa mwana wa Shafani na Gemariya mwana wa Hirikiya, avo vakatumwa ndi Zedhekiya mambo wo Judha kwenda ku Bhabhironi kuna Nebhukadhinezari mambo wo Bhabhironi, karata iyi yainanga kudari:
4 “Izvi ndizvona zvinonanga Jehovha wo hondo Mwari wo Vaiziraeri ku vandhu vese vari kuuranda, avo vandakatora kuvha ku Jerusarema ndovaendesa kuuranda ku Bhabhironi,
5 vakanyi nyumba mugaremo. Rimanyi munda yo mucero, muhe mucerojo.
6 Rovoranyi vanakaji mubare vana vorume no vokaji, itanyi kuti vana venyu vorume varovore, rovoresanyi vana venyu vokaji kuti ivona vabarevo vana vavo vorume no vokaji. Munodikana kuwanda, amudikani kupunguka.
7 Vangisiranyi kuti muve no runyararo mu dhorobha rondakamuendesa kuuranda, itanyi mukumbiro kuna Jehovha ngo pamusoro po dhorobhero, ngokuti kudari irona rikava no runyararo imwimwi munozovavo no runyararo.
8 Ngokuti izvi ndizvona zvinonanga Jehovha wo hondo Mwari wo Vaiziraeri: “Mucacengejwa ngo vaporofeti no vafemberi vari pakati penyu, nee amuvhiri kuteya njeve ku hope jovanorota.
9 Ngokuti ‘ivona vari kuporofeta zviro zvo kunyepa kwamuri vecishandisa zina rangu. Inini andizivi kuvatuma,’ izvi ndizvona zvinonanga Jehovha.”’”
10 “Ngokuti Jehovha anonanga kudari: ‘Akapera makumanomwe o makore imwimwi muri ku Bhabhironi, inini ndinozomurangarira, ndozokwanirisa cigondiso cangu, ndozomuviisazve mu ndau ino.’
11 “‘Ngokuti inini ndinonasa kuziva ushoni zviro zvandinoda kumuitira’ izvi ndizvona zvinonanga Jehovha, ‘ndinoda kuti muve no runyararo kuciripi dambujiko, ndinoda kumupa zviro zvakanaka zvo kumbeji no vetero.
12 Imwimwi munozondidaninja no kuita mukumbiro kwandiri, inini ndinozomuzwa.’
13 “‘Imwimwi munozondipsaka mondiwana, ngokuti munozondipsaka ngo mwoyo wenyu wese.
14 Inini ndinozoita kuti imwimwi mundiwane,’ izvi ndizvona zvinonanga Jehovha. ‘Ndinozounganija vandhu venyu vari kuuranda no kumuunganija pakati po majinja ese no mu ndau jese jondakamundhandhanisira,’ izvi ndizvona zvinonanga Jehovha. ‘Ndinozomuhwirijazve ku ndau yondakamutora ndomuendesa kuuranda.’
15 “‘Asi imwimwi makati, ‘Jehovha wakatipa vaporofeti mu Bhabhironi.’
16 “Ngo kudaro, izvi ndizvona zvinonanga Jehovha kuna mambo wakagara pacigaro co umambo ca Dhavhidhi no ku vandhu vese vanogara mu dhorobha iri, hama jenyu jicizivi kwenda na imwimwi kuuranda.
17 ‘Jehovha wo hondo anonanga kudari: “Ndiri kumutumira banga, njara no ndhendha. Ndinozoita kuti muve inga mafigu akavora, mafigu akavoresesa zvokuti aahiki.”’
18 “‘Ndinozovateverera ngo banga, njara no ndhendha, ndozovaita kuti vave ciro cinothyisa ku umambo wese wo panyika. Ndinozovaita kuti vave muezaniso wo ciro catukwa. Ndinozoita kuti ku majinja ese andinozovandhandhanisa, vandhu vanovavona vathye, varije mundozva no kuvatuka,
19 ngokuti ivona avazivi kuzwira masoko angu, izvi ndizvona zvinonanga Jehovha, andakavatumira ndecishandisa vashandiri vangu vaporofeti, kuphinda no kuphinda.’
“‘Asi imwimwi amuzivi kuzwira,’ izvi ndizvona zvinonanga Jehovha.
20 “Izwanyi soko ra Jehovha imwimwi mwese muri kuuranda, vandhu vandakapindisa kuvha ku Jerusarema kwenda ku Bhabhironi.
21 Izvi ndizvona zvinonanga Jehovha wo hondo Mwari wo Vaiziraeri ngo pamusoro pa Ahabhi mwana wa Koraya na Zedhekiya mwana wa Maaseya, avo vari kuporofeta zviro zvokunyepa kwamuri vecishandisa zina rangu. ‘Ndinozovadira mu nyara ja Nebhukadhinezari mambo wo Bhabhironi, iyena anozovauraya imwimwi makasota.
22 Zviro zviri kuda kuitika na ivona zvinozoshandiswa inga cituko ngo vandhu vese vo Judha vari kuuranda ku Bhabhironi: “Jehovha ngaakuitire zvimwezvo zvaakaitira Zedhekiya na Ahabhi avo vakakocwa pa muriro ndi mambo wo Bhabhironi!”
23 Ngokuti ivona vakaita zviro zvinopseruja mu Iziraeri, pavakaita upombo no mukaji wo mudoni wavo no kubhuya zviro zvokunyepa vecishandisa zina rangu, zvandainga ndicizivi kuvavhunja.
“‘“Inini ndinozviziva, ndinoita ucapupu wo zviro zvondhozvo,” izvi ndizvona zvinonanga Jehovha.’”
24 “Vhunjai Shemaya wo ku Neherami kudari:
25 ‘Izvi ndizvona zvinonanga Jehovha wo hondo Mwari wo Vaiziraeri: “Zvecivoneka kuti iwewe wakatumira karata ngo zina rako, ku vandhu vese vari mu Jerusarema, ku mupiri Sofoniya mwana wa Maaseya no ku vapiri vese yeciti:
26 ‘Jehovha wakagaja iwewe kuti uve mupiri pa ndau po mupiri Jehoyadha kuti uve muvonereri pa nyumba ya Jehovha, kuti ungwarire benji riri rese rinoita zviro inga muporofeti urisungire pa danda;
27 waro ngenyi iwewe auzivi kupangira Jeremiya wo ku Anatoti, uwo anoita zviro inga muporofeti kwamuri?
28 Ngokuti iyena wakatotumira masoko kwatiri kuno ku Bhabhironi eciti: “Imwimwi munozogara kondhoyo ko mukuvo wakareba! Vakanyi nyumba mugaremo. Rimanyi munda jo mucero, muhe mucerojo,—”’”’”
29 Mupiri Sofoniya paakaverenga karata iyi pamberi po muporofeti Jeremiya
30 Jehovha wakabhuya na Jeremiya eciti:
31 “Tumirai masoko ku vandhu vese vari kuuranda weciti: ‘Izvi ndizvona zvinonanga Jehovha ngo pamusoro pa Shemaya wo ku Neherami: “Zvecivoneka kuti Shemaya wakaporofeta kwamuri inini ndicizivi kumutuma, woeja kuita kuti imwimwi muthembe manyepo,
32 Jehovha anonanga kudari: ‘Ndinozopanica Shemaya wo ku Neherami no mubarihwana wake. Apana na umwe wo pambhuri pake anozopona pakati po vandhu ava, iyena aazovoni zviro zvakanaka zvandinozoitira vandhu vangu,’ izvi ndizvona zvinonanga Jehovha, ‘ngokuti iyena wakacengeja vandhu kuti vapandukire Jehovha.’”’”
