Ezekiyeri 40:1-49
40 Mu gore ro cimakumaviri na shanu tiri muuranda, pa njiku yo cigumi yo mweji wokutanga, no gore ro cigumi na rongomuna, kuvha parakaphwanywa dhorobha, pa njiku yondhoyo, nyara ya Jehovha yakaviya panyezuru pangu. Iyena wakanditora wondiendesa ku dhorobha rondhoro.
2 Ngo zvivoniso zvaivha kuna Mwari, ndakavona iyena acinditora wondiendesa ku nyika yo Iziraeri, wondidira panyezuru po dundhu rakareba maningi, kwainga no ciro cakatojana no dhorobha* ngo divi ro kakusi.
3 Paakanditora wondiendesa kondhoyo, inini ndakavona mwanarume wainga no muviri wakaita inga utare. Iyena wainga wakabata bote no njanga* yo kupima ndiyona akaima ngo pamusuvo.
4 Mwanarume uwu wakandivhunja kudari: “Mwana wo mundhu, nasai kusota, unase kuzwa, no kunasa kuteya njeve ku zvese zvandinoda kukukhombija, ngokuti ndizvona zvakuitisari kuti ugume pano. Verengerai Vaiziraeri, zviro zvese zvaunozovona.”
5 Ndakavona muru wakatendeneja ndau yokunja yo themberi.* Mu nyara yo mwanarume uwu, mainga no njanga yo kupima ndiyona yainga no kovhadho ndhandhatu (kovhadho imwe nga imwe yainga no upambhi unopindirija nyara imwe.)* Iyena wakatanga kupima muru. Muru uwu, wainga uno utindi unokwana kuita njanga imwe. Kureba kwawo, kwainga ko njanga imwe.
6 Ngo kudaro, iyena wakaenda mbhera pa musuvo wakasota kumavhazuva, wokhwira sikada. Wakapima cikotamo.* Icona cainga no upambhi unokwana kuita njanga imwe. Cikotamo co divi rimweni, caingavo no upambhi unokwana kuita njanga imwe.
7 Sara imwe nga imwe yo vangwariri, yainga yakareba mutengo wo njanga imwe, no upambhi unokwana kuita njanga imwe. Kuvha pa sara imwe yo vangwariri kwenda pa sara imweni, painga no kovhadho shanu. Cikotamo* co musuvo wainga wakabatana no berere ro* pamusuvo wairinga mukati, caireba mutengo wo njanga imwe.
8 Iyena wakapima berere ro* pamusuvo, rairinga ku divi ro mukati, mutengo wo njanga imwe.
9 Ngo kudaro, wakapima berere ro* pamusuvo, kovhadho jinokwana kuita sere. Wopimazve njiki jo pamutivi, kovhadho jinokwana kuita mbiri. Berere ro pamusuvo, rairinga divi ro mukati.
10 Kwainga no sara ndhatu jo vangwariri ku divi rimwe nga rimwe ro kumavhazuva. Jese jo ndhatu, jainga no mudida wakaezana. Njiki jo mumativi jainga ngo divi rimwe nga rimwe, jainga no mudida wakaezana.
11 Tevere, iyena wakapima upambhi wo musuvo, kovhadho jinokwana kuita gumi. Kureba ko musuvowo, kwainga ko kovhadho jinokwana kuita gumi na ndhatu.
12 Ndau yainga yakafungwa ngo muru pambeji po sara jo vangwariri jainga ngo mativi maviri, yainga no kovhadho imwe. Sara jo vangwariri jainga ngo mativi maviri, jainga no kovhadho jinokwana kuita ndhandhatu.
13 Kuvha pondhopo, iyena wakapima musuvo kutangira padenga ro sara jo vangwariri mbhera padenga rimweni. Wainga uno mutengo unokwana 25 o kovhadho jo upambhi. Musuvo umwe, wainga ngo pambeji po musuvo umweni.
14 Ngo kudaro, wakapima njiki jo mumativi maviri, mutengo wo 60 o kovhadho. Wopimazve njiki jo mativi maviri o musuvo jakatendeneja ruvanje.
15 Kuvha pa musuvo wokunghwina ndiwona wakasota mukati, mbhera panoperera berere,* painga no 50 o kovhadho.
16 Mukati mo musuvo, no mu sara jo vangwariri, no mu njiki jo mativi maviri, mainga no jhanera jakakura ngo mukati, jododoka ngo kunja. Mukati mo maberere,* maingavo no jhanera mu divi rimwe nga rimwe ro mumativi ese o maviri. Mu njiki jaingaro ngo mumativi, mainga makanyohwa mucindu.
17 Perepo, iyena wakanditora wondiendesa pa ruvanje wokunja. Ndakavona sara jo kuhira no ruvanje hwainga hwakatakihwa ngo mapuwe. Painga no 30 o sara jo kuhira jainga jiri pa ruvanje.
18 Ndau yainga mumativi o musuvo iji, yainga yakatakihwa ngo mapuwe, yaingazve yakapambhama mutengo wakaezana no kureba ko musuvo iji. Ndau iyi, yainga yakaterera.
19 Ngo kudaro, iyena wakapima mumango* wokutangira pa musuvo wo mudoko mbhera panoperera ruvanje hwo mukati. Iwona wainga no kovhadho jinokwana kuita 100 ngo divi ro kumavhazuva no divi ro kanjikazi.
20 Pa ruvanje wo kunja, painga pano musuvo waibudira ngo kanjikazi. Iyena wakapima kureba kwawo no kupambhama kwawo.
21 Kwainga no sara ndhatu jo vangwariri ku divi rimwe nga rimwe. Njiki jo mativi aya, no jo berere rakona,* jainga jakaezana no jo musuvo wokutanga. Iwona wainga no 50 o kovhadho jo kureba no 25 o kovhadho jo kupambhama.
22 Jhanera jawo no maberere awo* no mucindu jainga jakanyohwa pa mapiravira awo, jainga jakaezana no musuvo wokumavhazuva. Mainghwinwa ngo kukhwira sikada nomwe. Sikada nomwe iji, jainga ngo pambeji pawo.
23 Ngo ruvanje wo mukati, mainga no musuvo ngo kumbeji ko musuvo wo kanjikazi, no musuvo umweni wainga ngo kumbeji ko musuvo wo kumavhazuva. Iyena wakapima mumango* unovha pa musuvo umwe kwenda pa musuvo umweni, kovhadho jinokwana kuita 100.
24 Iyena wakanditora wondiendesa ngo divi ro kakusi, ndovona musuvo wainga ngo divi ro kakusi. Iyena wakapima njiki jo mativi awo no berere rawo.* Izvona zvainga zvakaezana no zvimweni.
25 Kwainga kuno jhanera jakaezana no jhanera jimweni ku mativi maviri o musuvo no ku berere.* Ijona jainga no kovhadho jinokwana kuita 50 o kureba no 25 o kovhadho jo kupambhama.
26 Painga no sikada nomwe jokunghwina ndijona. Berere rawo, rainga* ngo kumbeji ko sikada. Mu njiki jaingaro ngo mumativi, mainga makanyohwa mucindu, divi ngo divi, painyohwa mucindu umwe.
27 Ruvanje wo mukati, waingavo no musuvo wairinga kakusi. Iyena wakapima mumango* wo musuvo muviri jaisota kakusi kovhadho jinokwana kuita 100.
28 Ngo kudaro, iyena wakanditora wondiendesa ku ruvanje wo mukati ngo musuvo wo kakusi, wopima musuvo wo kakusi. Iwona wainga no mudida wakaezana no musuvo jimweni.
29 Sara jo vangwariri no njiki jo mumativi no berere,* zvainga zvino mudida wakaezana no zvimweni. Mu mativi maviri o musuvo no o mu berere, mainga no jhanera. Iyena wakapima kovhadho jinokwana kuita 50 o kureba no 25 o kovhadho jo upambhi.
30 Ngo mumbhiripiri, mainga no maberere,* iwona ainga no 25 o kovhadho jo kureba no upambhi hwawo hwo kovhadho shanu.
31 Berere ro* musuvo wo kakusi rainga rakaringa ku ruvanje wo kunja. Mu njiki jaro jo mumbhiripiri, mainga makanyohwa mucindu. Kuti mundhu agumepo, waidikana kukhwira sikada sere.
32 Iyena wakanditora wondiendesa kumavhazuva ko ruvanje wo mukati, wopima musuvo. Iwona wainga no mudida wakaezana no musuvo jimweni.
33 Sara jo vangwariri, njiki jo mumativi no berere,* zvainga zvino mudida wakaezana no zvimweni. Painga no jhanera mumativi maviri o musuvo no o mu berere. Iyena wakapima kovhadho jinokwana kuita 50 o kureba no 25 o kovhadho jo upambhi.
34 Berere* rayo rairinga ku ruvanje wo kunja. Njiki jayo jo mbiri jainga jakanyohwa mucindu. Kuti mundhu agumepo, waidikana kukhwira sikada sere.
35 Tevere, iyena wakandiendesa ku musuvo wo kanjikazi, woupima. Iwona wainga no mudida wakaezana no musuvo jimweni.
36 Sara jo vangwariri, njiki jo mumativi no berere,* zvainga zvino mudida wakaezana no zvimweni. Iyena wakapima kovhadho jinokwana kuita 50 o kureba no 25 o kovhadho jo upambhi.
37 Njiki jayo jo mativi, jairinga ku ruvanje wo kunja, jainga jakanyohwa mucindu. Kuti mundhu agumepo, waidikana kukhwira sikada sere.
38 Phedo no njiki jo mativi o musuvo, painga no sara yo kuhira yainga no musuvo. Pondhopo, paisukihwa zvipo zvokupiswa.
39 Pa divi rimwe nga rimwe ro berere ro* musuvo,* painga no meza mbiri jaiuraihwa zvipo zvokupiswa, zvipo zvo kuregerehwa zvishaishi no zvipo zvo kuripira ndava.
40 Ngo divi ro kunja ro musuvo panokhwihwa ndipona kwenda ku musuvo wo kanjikazi, kwainga no meza mbiri. Ngo divi ro mukati mo berere* maingavo no meza mbiri.
41 Painga no meza murongomuna pa divi rimwe nga rimwe ro musuvo. Meza jese, jaikwana kuita sere. Meza iji ndijona jaiuraihwa zvibairo.
42 Meza murongomuna jo zvipo zvokupiswa, jainga jo mapuwe akacecwa. Ijona jainga no kovhadho imwe yo kureba. Upambhi hwajo hwainga hwo kovhadho imwe no meya, jokhwira mutengo wo kovhadho imwe. Mujiyo jaishandiswa pa kuuraya zvipo zvokupiswa no zvibairo, zvaidihwa panyezuru po meza iji.
43 Painga no tarimba jaipambhama mutengo wo nyara imwe jakakohomehwa pa mabiravira o mukati, mumbhiripiri mayo mese. Panyezuru po meza iji, paidihwa nyama jaiizwa mupiro.
44 Ngo divi ro kunja phedo no musuvo wo mukati, painga no sara jo kuhira jo vaimbi. Ijona jaisota kakusi jiri pa ruvanje wo mukati, phedo no musuvo wo kanjikazi. Painga no sara imweni yo kuhira yaisota kanjikazi yainga phedo no musuvo wokumavhazuva.
45 Iyena wakandivhunja kuti: “Sara iyi yo kuhira yakasotari kakusi, ngo yo vapiri vanoita basa mu themberi.
46 Sara yakasota kanjikazi, ngo yo vapiri vanoita basa pa artari. Basa iri, ngoro vana va Zadhoki vakavhaya pakati po varevhi, vakagajwa kuti vakhwedere kuna Jehovha kuti vamushandire.”
47 Iyena wakapima ruvanje wo mukati. Iwona wainga no mativi marongomuna akaezana no kovhadho jinokwana kuita 100 jo kureba no kovhadho jinokwana kuita 100 jo upambhi. Artari, yainga ngo pambeji po themberi.
48 Perepo iyena wakanditora kwenda ku berere ro* themberi, wopima njiki jo bererero jo mativi ese. Jo divi rimwe, jainga jino kovhadho shanu. Jo divi rimweni, jaingavo no kovhadho shanu. Upambhi wo musuvo, wainga no kovhadho ndhatu. Wo divi rimweni, waingavo no kovhadho ndhatu.
49 Berere, rainga* no 20 o kovhadho jo kureba no 11* kovhadho jo kupambhama. Kuti mundhu agume ku berere iri, waidikana kukhwira sikada. Ngo mumativi mo majiro, mainga no njiki.
Masoko o Pasi
^ Kana: “sidhadhi.”
^ Vonanyi Masoko Okuengejera B14.
^ Gama ngo Gama: “nyumba.” Gama rokuti “themberi” rakashandiswa mu zvipauko 40-48 pa ndau yokuti nyumba. Gama iri, rinonga recinangira zvese zvakavakwa pa themberi kana themberiyo kamare.
^ Gama ngo Gama: “njanga yo kupima ndiyona yo kovhadho 6, kovhadho imwe no nyara.” Kana kuti, kovhadho jokureba. Vonanyi Masoko Okuengejera B14.
^ Kana: “cizingiti.”
^ Kana: “Cizingiti.”
^ Kana: “vharanda yo.”
^ Kana: “vharanda yo.”
^ Kana: “vharanda yo.”
^ Kana: “vharanda.”
^ Kana: “vharanda.”
^ Kana: “musango.” Gama ngo Gama: “kupambhama.”
^ Kana: “vharanda yakona.”
^ Kana: “no vharanda jawo.”
^ Kana: “musango.”
^ Kana: “vharanda jawo.”
^ Kana: “vharanda.”
^ Kana: “Vharanda jawo jainga.”
^ Kana: “musango.”
^ Kana: “vharanda.”
^ Kana: “vharanda.”
^ Kana: “vharanda yo.”
^ Kana: “vharanda.”
^ Vharanda.
^ Kana: “vharanda.”
^ Kana: “vharanda yo.”
^ Kana kuti, musuvo o kanjikazi.
^ Kana: “vharanda yo.”
^ Kana: “vharanda yo.”
^ Kana: “Vharanda, yainga.”
^ Kangaije: “12.”
