Ezekiyeri 34:1-31
34 Ndakaashirazve soko ra Jehovha reciti:
2 “Mwana wo mundhu, phorofetai ngo pamusoro po vahavisi vo Iziraeri, phorofetai kudari ku vahavisi: ‘Jehovha Mambo Mukuru-kuru anoti: “I dambujiko ku vahavisi vo Iziraeri, vanoda kutaja* upenyu hwavo basi! Vahavisi ava, avacaidikanepi kutaja mavhuta here?
3 Imwimwi munoha mabembhe. Munosimira nguvo jakaithwa ngo ukuse wo* mavhuta. Mouraya cinyama cakanuna. Asi amutaji mushambi.
4 Amuzivi kuvangisa mavhuta airemba, nee kutaja aihwaja, nee kupombera ainga no zvivonje, nee amuzivi kuviisa akapauka, nee amuzivi kupsaka ainga asvejeka. Kusiyapo izvo, imwimwi maimashupha no kumatambuja.
5 Ngo kudaro, iwona akandhandhanika ngokuti ainga acina muhavisi. Iwona akandhandhanika ohiwa ngo zvinyama zvo musora.
6 Mavhuta angu, akasvejeka mu matundhu ese no mu zvimatundhu zvese zvakakhwirira. Mavhuta angu akandhandhanika pasi pese, pacina mundhu anomapsaka no kumatora.
7 “‘“Ngo kudaro, imwimwi vahavisi izwanyi soko ra Jehovha:
8 ‘Jehovha Mambo Mukuru-kuru anoti: “Ndinopika ngo zina rangu, kuti zvecivoneka kuti mavhuta angu ainga pa ngozi, ohiwa ngo zvinyama zvese zvo musora, ngokuti ainga acina muhavisi, zvecivonekazve kuti vahavisi vangu avazivi kwenda kopsaka mavhuta angu, asi ivona vaitaja upenyu hwavo basi vacikataji mavhuta angu,”’
9 ngo ndava yazvo, imwimwi vahavisi, izwanyi soko ra Jehovha.
10 Jehovha Mambo Mukuru-kuru anoti: ‘Inini ndinozosvuzvunura vahavisi. Ndinozovavhunjisa zvovaiitira mavhuta angu. Nee andizovatenderi kuti vataje mavhuta angu. Vahavisi, avazotajizve upenyu hwavo basi. Ndinozoponesa mavhuta angu pamuromo javo. Iwona aazovizve zvokuha zvavo.’”
11 “‘Jehovha Mambo Mukuru-kuru anoti: “Ndiri pano inini, inini kamare ndinozopsaka mavhuta angu no kumangwarira ndega.
12 Ndinozotaja mavhuta angu inga muhavisi anowana mavhuta ake akandhandhanika, womataja.* Mu njiku yomakwiti no yocidima cikuru, ndinozoponesa mavhuta angu kuri kwese kwaanongaro ari.
13 Ndinozomavhisa kuvha pakati po vandhu, no kumaunganija kuvha pakati po nyika, ndomaendesa ku nyika yawo. Ndinozomahavisira ku matundhu o Iziraeri phedo no kumwa inopopoma mu ndau jese jino gara vandhu.
14 Ndinozomahavisira mu mahavo akanaka. Anozohavira mu matundhu akareba o Iziraeri. Kondhono, iwona anozozororera mu mahavo akanaka, ozohava mu mahavo aushoni o mu matundhu o Iziraeri.”
15 “‘Jehovha Mambo Mukuru-kuru anoti: “Inini kamare ndinozotaja* mavhuta angu, ndomapekeja ndau yokuzorora.”
16 “Ndinozopsaka akasvejeka, ndoviisa rakapauka, ndopombera rino civonje, ndoviisa rakaremba. Asi ndinozopeja rakavanga ronuna. Ndinozomatonga no kumasvuzvunura mukuzwirana no zviito zvawo.”
17 “‘Kwamuri mavhuta angu, Jehovha Mambo Mukuru-kuru anoti: “Ndiri kuda kutonga mavhuta angu, mavhuta okaji no orume no makotokoto.
18 Azvikwani kwamuri kuhavira mu mahavo akanaka here? Mwaidikana kucika-cika mahavo enyu akasara here? Pakupera kumwa kumwa yakacena, mwaidikana kucika-cika kumwa yasararo, yosara yakasvipa here?
19 Mavhuta angu aidikana kuhava mu mahavo amakacika-cika no kumwa kumwa yomakasvipisa ngo makumbo enyu here?”
20 “‘Ngo kudaro, Jehovha Mambo Mukuru-kuru anomavhunja kudari: “Ndiri pano, inini kamare ndinozotonga mavhuta akakora no mavhuta akaonda.
21 Asi imwimwi makaenderera mberi mecindundana ngo muviri no mapfuji.* Makareesa mavhuta ese anohwaja ngo manyanga, mbhera kumaparajanisa.
22 Inini ndinozoponesa mavhuta angu, iwona aazonyangwizve. Ndinozotonga mavhuta.
23 Pakati pawo, ndinozodira muhavisi, mushandiri wangu Dhavhidhi, iyena anozomataja. Iyena anozomataja kamare, wozova muhavisi wawo.
24 Inini Jehovha, ndinozova Mwari wawo. Mushandiri wangu Dhavhidhi, anozova mukuru pakati pawo. Ndini Jehovha ndazvinangari.
25 “‘“Ndinozoita nawo citenderano co runyararo, ndozovhisa zvinyama zvinothyisa mu nyika iyi, kuti iwona agare ushoni no kuvata mu makwasha.
26 Ndinozokomborera mavhuta angu, kubatanijavo no anogara mumbhiripiri mo dundhu rangu.* Ndinozonisa nvura panguva kwayo. Kunozova no nvura yo makomborero.
27 Mavhu anozobudisa mbeu. Mavhuta angu anozogara ushoni mu nyika yondhoyo. Iwona anozoziva kuti inini, ndini Jehovha, pandinozogura kanga jawo no kumaponesa mu nyara ja vaya vaimatambuja.
28 Iwona aazonyangwizve ngo vo majinja. Zvinyama zvo musora, azvizomarumi. Iwona anozogara ushoni, pacina mundhu anozomathyisa.
29 “‘“Ndinozosima muti jinomaita kuti akujwe. Iwona aazofizve ngo njara mu nyika, nee aazopserujwizve ngo majinja.
30 ‘Ngo kudaro, anozoziva kuti inini Jehovha, Mwari wawo, ndina iwona. Iwona, nyumba yo Iziraeri, ivandhu vangu.’ Izvi ndizvona zvinonangwa ndi Jehovha Mambo Mukuru-kuru.”’
31 “‘Imwimwi mavhuta angu, mavhuta andinotaja, imwimwi mutorivo vandhu havo.’ Izvi ndizvona zvinonangwa ndi Jehovha Mambo Mukuru-kuru.”
Masoko o Pasi
^ Gama ngo Gama: “kujihisa.”
^ Kana: “mandhenga o.”
^ Gama ngo Gama: “womahavisa.”
^ Gama ngo Gama: “ndinozohavisa.”
^ Kana: “makhaja.”
^ Kana: “mo citandharuwa cangu.”
