Ezekiyeri 24:1-27
24 Mu njiku yocigumi, yo mweji wocigumi, yo gore* ro cipfumbamwe, ndakaashirazve soko ra Jehovha reciti:
2 “Mwana wo mundhu, tarirai njiku* iyi, njiku ya nyamasi. Mu njiku ya nyamasi kamare, mambo wo Bhabhironi watanga kuhwisa Jerusarema.
3 Nangai mazwi akangwara ku vandhu ava vanopandukira.
Vavhunjei kudari ngo pamusoro pavo:
“‘Jehovha Mambo Mukuru-kuru anoti:
“Terekai* panera yo utare;* terekai panera pa muriro,
Ukapeja udire kumwa mu paneremo.
4 Dirai mu paneremo ndhindhi jo nyama, ndhindhi jese jakanaka, mutezo no bandauko.
Zajai mu paneremo ngo maphondo aushoni.
5 Batai vhuta rakanaka ro mushambi wako,
Perapo wodira huni pasi po panera iyi, woitendeneja.
Bikai ndhindhi jaro no maphondo aro mu paneremo.”’
6 “Ngo kudaro, Jehovha Mambo Mukuru-kuru anoti:
‘Idambujiko ku dhorobha rakazara ngo sangi,
Ku panera yakazara ngo furujhu icizivi kuvhiswa!
Vhisai ndhindhi jese jiri mukati mayo, imwe nga imwe.
Ucaita ngo kusana kuti ndovhisa yapi.
7 Ngokuti sangi yaro, yakazara mukati maro.
Irona rakaidururira pa buwe rakati setete.*
Arizivi kuidururira pasi, kuti riifushire.
8 Kuti ndimuse ushungu hwangu wo kuhwirijira,Inini ndadira sangi yaro pa buwe rakati setete*Kuti itame kufushihwa.’
9 “Jehovha Mambo Mukuru-kuru anoti:
‘Idambujiko ku dhorobha rakazara ngo sangi!
Inini ndinozounganija mututu wo huni.
10 Unganijai huni, ukapeja ubwakije muriro.
Nasai kubika ushoni nyameyo,Ukapeja, dururai mutowo kuti maphondo ayo, apse.
11 Terekai* panera yo utare icina zviro pa masimbe,Kuti iyona ipise mbhera utare hwayo upise.
Svina yayo inozonyunguruka mukati mayo,Furujhu yayo yopera.
12 Asi izvi zvinonyangaja maningi no kurembesa,Ngokuti furujhu yayo, yakawanda maningi, nee aitobudizve.
Khandiranyi panereyo no furujhu yayo pa muriro!’
13 “‘Iwewe wakasvipiswa ngo ndava yo mufambiro wako unopseruja. Inini ndakaeja kukucenesa, asi iwewe auzivi kucena. Iwewe unozoenderera mberi wakasvipa mbhera ushungu hwangu kwauri hupere.
14 Inini Jehovha, ndazvinanga. Izvi zvinozoitikadi. Ndinozozviita nee kudini, andizozwiri pena nee kuhwirira sure. Vanozokutonga mukuzwirana no mufambiro no zviito zvako.’ Izvi ndizvona zvinonangwa ndi Jehovha Mambo Mukuru-kuru.”
15 Ngo kudaro, ndakaashirazve soko ra Jehovha reciti:
16 “Mwana wo mundhu, inini ndinozoita kuti mukaji wako waunodaya maningi, afe ngo civhumbu. Iwewe audikani kumucumba.* Nee audikani kumucema* nee kumbhweja musoji.
17 Gomerai cinyararire, ucaita zvinocianjaya kuithwa pa ciriro. Simirai dhuku, usimire no sandariya jako.* Iwewe audikani kufukija muromo* wako, nee kuha zvokuha zvinoviiswa ngo vamweni.”*
18 Inini ndakavereketa ndecivhunja vandhu comangwanani, mukaji wangu wofa co usikuco. Comamgwana fumi, ndakaita zvondakavhunjwaro kamare.
19 Vandhu vaindivhunjisa kudari: “Iwewe auzotivhunji kuti zviro zvaurikuitari zvinoda kurevenyi kwatiri here?”
20 Inini ndakavadavira kudari: “Ndaashira soko iri recivha kuna Jehovha,
21 ‘Vhunjai nyumba yo Iziraeri kudari: “Jehovha Mambo Mukuru-kuru anoti: ‘Ndiri kuda kusvipisa ndau yangu yakacena, zviya zvinomuitisaya kuti mudade, zviya zvamunodaya maningi zviri pa mwoyo wenyu. Vana venyu vokaji no vorume, vamakasiyaya, vanozofa ngo banga.
22 Imwimwi munozoitavo zvandakaitaya kamare. Amuzofukiji muromo* wenyu, nee kuha zviro zvinoviiswa ngo mundhu umweni.
23 Imwimwi munozogara makasimira madhuku mumusoro menyu no sandariya* mu soka jenyu. Amuzocumbi nee amuzocemi.* Asi munozovorera mu zvishaishi zvenyu mecigomera makasotana.
24 Ezekiyeri waita inga citatijo kwamuri. Imwimwi munozoitavo zvaaitaro kamare. Izvi pazvinozoitika, imwimwi munozoziva kuti inini, ndini Jehovha Mambo Mukuru-kuru.’”’”
25 “Asi iwewe mwana wo mundhu, njiku yandinozovavhisira ndau yo kutizira, yavanodadaya ndiyona, yavanodaya maningi iri pa mwoyo pavo, kubatanijavo no vana vavo vokaji no vorume,
26 iwewe unozozvivhunjwa ngo mundhu anonga apona.
27 Pa njiku iyi, iwewe unozofunungura muromo wovereketa na wiya anonga apona, aucazovizve mbeveve. Iwewe unozova citatijo kwavari, ivona vanozoziva kuti inini, ndini Jehovha.”
Masoko o Pasi
^ Zviri kunangira gore ro uranda hwa mambo Jehoyakini, Ezekiyeri no Vajudha vamweni.
^ Gama ngo Gama: “zina ro njiku.”
^ Kana: “Gajai.”
^ Kana: “cikari cakakura muromo.”
^ Kana: “ngwiro.”
^ Kana: “ngwiro.”
^ Kana: “Gajai.”
^ Kana: “audikani kutaka paditi.”
^ Kana: “kumurira.”
^ Kana: “magwada ako.”
^ Kana: “ndevhu jo panyezuru po muromo.”
^ Kana: “zvokuha zvo vandhu.”
^ Kana: “ndevhu jo panyezuru po muromo.”
^ Kana: “magwada.”
^ Kana: “amuzoriri.”
