Ekisodho 27:1-21
27 “Unodikana kuita artari ngo matabwa o muti wakavanga.* Artariyo inodikana kuva yakareba makovhadho* mashanu, yopambhama makovhadho mashanu. Artari iyi inodikana kuva no zvikina zvirongomuna zvakaezana, yoreba makovhadho matatu.
2 Unodikana kuita nyanga wojidira mu zvikina zvirongomuna zvo artari. Ijona jinozobatana no artari. Unozonama artariyo yese ngo utare.
3 Unodikana kuita mujiyo jokuvhisa marota.* Unozoitazve foshoro, no zvibasiya, no magarfu no mujiyo jokudirira muriro. Unozoita mujiyo jese iji ngo utare.
4 Unodikana kuita bandhi ro artari wecishandisa utare. Bandhi iri ngariite inga juya. Unodikana kuita zvibato zvirongomuna zvo utare, uzvidire mu zvikina zvirongomuna zvo bandhi iri.
5 Zvidirei ngo pasi po bhande ngo pakati no pakati po kukhwira ko artari.
6 Unodikana kuita mupingo jo artari ngo muti wakavanga* wojinama ngo utare.
7 Mupingo iji jinozonghwiniswa mu zvibato zviri mu mativi maviri o artari kuti muithware ndijona.
8 Unodikana kuita artari ngo matabwa, yoshama mukati mwayo. Wozoiita inga zvandakakutatija pa dundhu.
9 “Unodikana kuita ruvanje wo tabherinake. Ku ruvanje wo divi ro kakusi, kunozoghwimbwa jira rakaithwa ngo ruji wokuseja* wakakoswa. Ngo divi rondhoro kunozova no makovhadho anokwana kuita 100.
10 Ruvanje uwu unozova no 20 o njiki jo utare no 20 o zvigajikiro zvajo zvo utare. Zvikorokotejero* zvo njiki no zvokubatanija* ndizvona, zvinodikana kuva zvo sirivha.
11 Ngo divi ro kanjikazi kunozovavo no jira rakagwimbwa rinonga rakareba 100 ro makovhadho, no 20 o njiki jo utare no 20 o zvigajikiro zvo utare, no zvikorokotejero* zvo sirivha no zvokubatanija* ndizvona njiki jazvo.
12 Ngo divi ro kumavirira ko ruvanje, kunodikana kuva no jira rakagwimbwa, rakareba makovhadho 50 ku upambhi wo ruvanje, no 10 ro njiki no 10 ro zvigajikiro.
13 Upambhi hwo ruvanje hwo divi ro kumavhazuva, hunodikana kuva hwo 50 o makovhadho.
14 Kunodikana kuva no jira rakagwimbwa roreba mutengo wo 15 o makovhadho ngo divi ro pa musuvo, no njiki ndhatu no zvigajikiro zvitatu.
15 Ngo divi rimwenizve kunodikana kuva no jira rakagwimbwa ro 15 o makovhadho, no njiki ndhatu no zvigajikiro zvitatu.
16 “Pa musuvo wokunghwina ndiwona paruvanje, panodikana kugwimbwa jira rokufunga, rakareba 20 o makovhadho. Jira iri rinodikana kuithwa ngo ruji hwo bhurumu, hwokupsukirikira, hwo kupsuka, pomwe no ruji hwakanaka no kukoswa. Panodikana kuva no njiki murongomuna no zvigajikiro zvajo zvirongomuna.
17 Njiki jese jakatendeneja ruvanje jinodikana kuva no zvokuzvibatanija ndizvona zvo sirivha. Zvikorokotejero* zvajo zvinodikana kuva zvo sirivha, asi zvigajikiro zvakona zvinodikana kuva zvo utare.
18 Ruvanje hunodikana kureba 100 ro makovhadho, hwakapambhama 50 o makovhadho. Jira rinonga rakatendeneja ruji uwu, rinodikana kukhwira makovhadho 5. Irona rinodikana kuithwa ngo ruji. Asi zvigajikiro zvakona zvinodikana kuva zvo utare.
19 Mujiyo yese no zvese zvinozoshandiswa mu tabherinake, kubatanija no mbhingu jayo no mbhingu jese jo ruvanje, zvinodikana kuva zvo utare.
20 “Unodikana kuvhunja Vaiziraeri kuti vakuviisire mafuta o maorivhe* o kuvheneka ndiona, kuti zvibani* zvirambe zvakabwaka nguva jese.
21 Aroni no vana vake vanozodira zvibani* izvi mu tende yo musongano sure ko jira riri phedo no Bhokiso ro Ucapupu vozvinasirira kuti zvibani izvi zviejehwe zvecibwaka pamberi pa Jehovha Mwari. Uwu unozova mutemo unozotevejwa ngo Vaiziraeri ko mubarihwana yavo yese.
Masoko o Pasi
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kovhadho imwe inoezana no masentimentro anokwana kuita 44,5. Vonanyi Masoko Okuengejera B14.
^ Kana: “marota anomafuta.” Kana kuti, marota anonga akazara ngo mafua o zvinyama zvaiithwa mupiro.”
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “wokunyara.”
^ Kana: “zvokunghwinisira.”
^ Kana: “magangiro no mapote.”
^ Kana: “zvokunghwinisira.”
^ Kana: “magangiro no mapote.”
^ Kana: “zvokunghwinisira.”
^ Kana: “o azeite.”
^ Kana: “zvigabhu-gabhu.”
^ Kana: “zvigabhu-gabhu.”
