Dhanyeri 6:1-28
6 Dhariyo wakavona kuti zvainga zviri ushoni kugaja vavonereri vanokwana kuita 120 kuti vatungamirire mu umambo hwese.
2 Kunja ko vavonereri ava, kwainga kuno vatungamiriri vakuru vatatu, umwe wavo wainga Dhanyeri. Vavonereri ava vaidikana kuendesa masoko kwavari, kuti mambo atame kuneswa.
3 Dhanyeri wainga akasiyana no vatungamiriri vakuru vamweni no vavonereri, ngokuti iyena wainga no mujimu unoshamaisa. Ngo kudaro, mambo wairangarira kumupa cigaro cakakhwira mu umambo.
4 Pa mukuvo wondhowo, vatungamiriri vakuru no vavonereri, vaipsaka thangwe kuti vanyepere* Dhanyeri ngo pamusoro po shwiro jo umambo. Asi avazivi kuwana thangwe riri rese nee ciri cese cakashata ngokuti iyena waithembeka no kuita basa rake mu njira yakanaka.
5 Vanarume ava vakati: “Kudari tikatama kupsaka thangwe ngo pamusoro po mutemo wa Mwari wake, atizowani thangwe riri rese ro kunyepera* Dhanyeri.”
6 Ngo kudaro, vatungamiriri vakuru no vavonereri vakaenda vese pamberi pa mambo vonanga kudari: “Mambo Dhariyo, raramanyi no kucingaperi.
7 Vatungamiriri vese va mambo, nduna jese, vavonereri, vapangiri vese va mambo no magovhernadhori vakaungana vopangana kuti kuithwe mutemo wa mambo unonanga kudari: Mukati mo makumatatu o njiku mundhu wese anoita mukumbiro ku mwari ari wese kana ku mundhu ari wese kuciripi imwimwi mambo, iyena anodikana kukhandihwa mu gomba ro mbhondoro.
8 Wari mambo diranyi mutemo, mutare zina renyu kuti utame kucinjwa, mukuzwirana no mutemo jo Vamedhiya no Vapersiya jicikacinjwi.”
9 Ngo kudaro, mambo Dhariyo wakatara zina rake pa mutemo ecirambija.
10 Asi Dhanyeri paakaziva kuti mutemo uwu wainga watahwa ngo zina ra mambo, wakaenda pa nyumba yake yo mudenga wonghwina mu kwartu mainga no jhanera jakashama jakasota Jerusarema. Iyena wakagwadama woita mukumbiro, wosimba Mwari wake inga zvaiita njiku jese izvi zvicito zvaitika, katatu pa njiku.
11 Pa nguva yondhoyo kamare, vanarume ava vakanghwina ngo civhumbu vokhanda Dhanyeri eciita mukumbiro no kudeketerera unyasha pamberi pa Mwari wake.
12 Ivona vakaenda kobhuya na mambo vomuceukija mutemo wo umambo veciti: “Imwimwi amuzivi kutara zina renyu pa mutemo wainanga kuti mukati mo makumatatu o njiku, mundhu wese waizoita mukumbiro kuna mwari ari wese no ku mundhu kuciripi imwimwi mambo, waidikana kukhandihwa mu gomba ro mbhondoro?” Mambo wakadavira kudari: “Shwiro iyi yakanasa kudhindhwa mukuzwirana no mutemo jo Vamedhiya no jo Vapersiya, jicikacinjwi.”
13 Ivona ngo kukasika vakavhunja mambo kudari: “Dhanyeri umwe wa vaya vakatohwa kuvha ku Judha, aazivi kumuzwira mambo nee aazivi kuzwirazve mutemo wamakataraya ngo zina renyu. Iyena ari kuita mukumbiro katatu pa njiku.”
14 Mambo paakazwa izvi wakahwajihwa maningi. Ngo kudaro, wakarangarira mazano aangaita kuti aponese Dhanyeri. Mbhera kuvira ko zuva, waindoeja kuita zvese zvaaikwanisa kuti amuponese.
15 Pejisire, vanarume ava vese vakaenda kobhuya na mambo vomuvhunja kudari: “Mambo mucakanganwa kuti mukuzwirana no mutemo jo Vamedhiya no jo Vapersiya, azvitendehwi kucinja zvarambijwa kana mutemo watahwa ngo zina ra mambo.”
16 Ngo kudaro, mambo wakavavhunja kuti vaviise Dhanyeri. Ivona vakamuviisa vomukhandira mu gomba ro mbhondoro. Mambo wakati kuna Dhanyeri: “Mwari wako waunoshandira nguva jese, anozokuponesa.”
17 Tevere, vakaviisa buwe voridira pabovo ro* gomba. Perapo, mambo wakaridhindha ngo mbhete yake ino cidhindho, woridhindhazve ngo mbhete ino cidhindho co vazivi vake, kuti patame kucinjwa ciri cese ngo pamusoro pa Dhanyeri.
18 Ngo kudaro, mambo wakaenda ku nyumba yake yo mudenga. Wakapeja usiku hwese ecizira, aacaidepi zviri zvese zvinomuvaraija.* Iyena aazivi kukwanisa kuvata.*
19 Comangwanani matete, mambo wakamuka woenda ngo kukasika ku gomba ro mbhondoro.
20 Paakaguma phedo po gomba, iyena wakadaninja Dhanyeri akanyangajwa womuvhunjisa kudari: “Dhanyeri mushandiri wa Mwari anopona, kureva kuti Mwari wako waunoshandiraya nguva jese, aazivi kukuponesa pakati po mbhondoro here?”
21 Dhanyeri ngo kukasika wakadavira mambo eciti: “Mambo raramanyi no kucingaperi.
22 Mwari wangu watumira ngirozi, yofunga muromo jo mbhondoro. Ajizivi kundiita ciri cese cakashata, ngokuti ndainga ndicina ndava pamberi pake. Kunja kwaizvi, andizivi kuita ciri cese cakashata kwamuri mambo.”
23 Mambo wakadakara maningi, wotuma vandhu kuti vavhise Dhanyeri mu gomba. Dhanyeri paakandopera kuvhiswa mu gomba, vakavona kuti wainga acizivi kukhuvazika, ngokuti iyena wainga akathemba Mwari wake.
24 Tevere, mambo wakadaninjisa vanarume vese vaingaya vakanyepera* Dhanyeri. Ivona vakakhandihwa mu gomba ro mbhondoro pamwepo no vana vavo no vakaji vavo. Asi ivona vacito vaguma pasi po gomba, mbhondoro jakavahaka jogura-gura maphondo avo.
25 Perapo mambo Dhariyo wakatarira vandhu vese, majinja ese no ndumi jese jaigara pa nyika eciti: “Ivanyi no runyararo hwakawanda!
26 Ndiri kutara mutemo ku umambo hwangu hwese, kuti vandhu vese vandhyandhye no kuthya Mwari wa Dhanyeri. Ngokuti iyena ndi Mwari anopona. Anogara no kucingaperi, umambo hwake ahuzoperi, utongi hwake ngo hwo kwenda no kwenda.
27 Iyena anosujunura, anoponesa, anoita zvitatijo no mushamaiso kumatenga no pasi pano. Ngokuti iyena waponesa Dhanyeri pa muromo jo mbhondoro.”*
28 Ngo kudaro, Dhanyeri wakabudirira mu umambo hwa Dhariyo no mu umambo hwa Siro mu Persiya.
Masoko o Pasi
^ Gama ngo Gama: “vapumbhe.”
^ Gama ngo Gama: “kupumbha.”
^ Gama ngo Gama: “pamuromo po.”
^ Kangaije: “aacaidepi kuviisihwa vaimbi.”
^ Gama ngo Gama: “hope jaimutiza.”
^ Gama ngo Gama: “vakapumbha.”
^ Gama ngo Gama: “pakuurawa ngo mbhondoro.”
