Apokaripsi 22:1-21
22 Iyena wakanditatija murambo wo kumwa yo upenyu, waimonikira inga kristari, waivha ku cigaro co umambo ca Mwari no co Vhuta,
2 wecipopoma pakati po gwanja guru ro dhorobha. Mu mativi maviri o murambo, mainga muno miti yo upenyu, yaibara mucero gumi na ruviri pagore, yecibara mweji ngo mweji. Masakani o miti iji airapa majinja.
3 Apazovizve no cituko ciri cese. Asi cigaro co umambo ca Mwari no co Vhuta cinozova mu dhorobha iri, varanda vake vanozomuitira basa rakacena.
4 Ivona vanozovona kumeso kwake, zina rake rinozova pa huma javo.
5 Cimwenizve, akuzoiti usiku, ivona avazodi ruvheneko hwo magezi, nee ruvheneko hwo zuva, ngokuti Jehovha* Mwari anozovavhenekera. Ivona vanozotonga mbhera narini, kwenda no kwenda.
6 Iyena wakandivhunja kuti: “Masoko aya anogondeka, ngo ocokwadi. Jehovha,* Mwari wakafemeraya vaporofeti, wakatumira ngirozi yake, kuti itatije varanda vake zviro zvinoda kuitika ngo kukasika.
7 Izwai! ndiri kuzeyo ngo kukasika. Anodakara wiya anozwira masoko o uporofeti ari mu muphukutu uwu.”
8 Inini Johani, ndini ndaizwa zviro izvi, ndozvivona. Pandakazvizwa no kuzvivona, ndakagwadama pambeji po ngirozi yainditatijaya zviro izvi kuti ndiinamate.
9 Iyona yakandivhunja kuti: “Basopai! Ucadaro! Ndirivo muranda doni wako no muranda doni wo hama jako vaporofeti no vanozwira masoko ari mu muphukutu uwu. Namatai Mwari.”
10 Iyona yakandivhunjazve kuti: “Ucafunga masoko o uporofeti ari mu muphukutu uwu, ngokuti nguva yakagajwa iri phedo.
11 Asi wiya acizivi kururama, ngaagare acizivi kururama, asi wiya acizivi kucena, ngaagare acizivi kucena. Wiya wakarurama, ngaagare akarurama, asi wiya wakacena, ngaagare akacena.
12 “‘Izwai! Ndiri kuza ngo kukasika, mupfupo wandinozopa una inini, kuti ndipe umwe na umwe mukuzwirana no zviito zvake.
13 Ndini Arfa na Omega,* wokutanga no wokupejisira, womaambo no womagumo.
14 Vanodakara vaya vanopaja nguvo javo jakareba, kuti vakwanise kuenda ku miti yo upenyu, kuti vanghwine mu dhorobha ngo musuvo jaro.
15 Kunjeyo kuno vandhu vanoita inga imbhwa, vanoita zvo mujimu, vanoita zvo uhure,* vanouraya, vanonamata zvithombi no vese vanoda no kuita zvo kunyepa.’
16 “‘Inini Jesu, ndakatuma ngirozi yangu kuti ikuzivise zviro izvi zvinobesera ungano. Inini ndiri miji no mubarihwana wa Dhavhidhi, ndhondho inomonikira yo mangwanani.’”
17 Mujimu mucena no murovohwa wo Vhuta vari kunanga kuti: “Izai!” Wiya anozwa ngaanange kuti: “Izai!” Wiya ano nyota ngaaze, wiya anoda ngaamwe biresi kumwa yo upenyu.
18 “Ndiri kuzivisa mundhu wese anozwa masoko o uporofeti ari mu muphukutu uwu, kuti: Kudari ari wese akaengejera zviro izvi, Mwari anozomuengejeravo matambujiko akatahwa mu muphukutu uwu.
19 Kudari ari wese akavhisa ciro co masoko o uporofeti uhwu, Mwari aazomutenderi kuti awane zviro zvakanaka zvakatahwa mu muphukutu uwu. Izvi zvinoreva kuti Mwari aazomutenderi kuti ahe mucero yo upenyu no kunghwina mu dhorobha rakacena.
20 “Wiya anoita ucapupu ngo zviro izvi, anoti: ‘Ndiri kuza ngo kukasika.’”
“Ameni! Izanyi, Mambo Jesu.”
21 Unyasha hucikaezaniswi hwa Mambo Jesu ngahuve no vakasanwa.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “ndini A na Z.” Gama rokuti: Arfa, rinoimirira retra yokutanga. Omega rinoimirira retra yo kupejisira yo maarfabheto o Cigiriki.
^ Vonanyi Kudurujihwa ko Magama.
