Apokaripsi 16:1-21
16 Ndakazwa izwi guru raivha ku ndau yakacenesesa, recivhunja ngirozi nomwe kuti: “Endanyi moodururira pasi zvibasiya zvinomwe zvo ushungu hwa Mwari.”
2 Yokutanga, yakaenda, yodururira pasi cibasiya. Vandhu vainamata cikara no cithombi caco, vakawana zvivonje zvinohwaja, zvoshata maningi.
3 Yocipiri, yakadururira cibasiya mu jombe. Jombe rakacinja kuita ngazi yo mundhu wakafa, zvisikwa zvese zvinopona zvainga mu jombe, zvakafa.
4 Yocitatu, yakadururira cibasiya cayo mu murambo no mu ndau jinobuda kumwa. Mwese makacinja kuita ngazi.
5 Ndakazwa ngirozi yainga no simba ro kutonga kumwa yeciti: “Imwimwi, Wiya aripo, Wiya waingepo, imwimwi makagondeka no kururama, ngokuti madira matongero enyu aya.
6 Ngokuti ivona vakauraya vakasanwa no vaporofeti, imwimwi makavapa ngazi kuti vamwe; izvi ndizvona zvavaifanera.”
7 Inini ndakazwa izwi raibuda pa artari reciti: “Hina, Jehovha* Mwari wo Masimba Ese, matongero enyu akarurama. Iwona ngo ocokwadi.”
8 Yocirongomuna, yakadururira cibasiya cayo pa zuva. Zuva rakatendehwa kuti ripise vandhu inga muriro.
9 Vandhu vakapsa maningi ngo kupisa, ivona vakatuka zina ra Mwari, wiya ano simba rokutonga matambujiko aya. Ivona avazivi kukhauya kuti vamukuje.
10 Yocishanu, yakadururira cibasiya cayo pacigaro co umambo co cikara. Umambo hwo cikara hwakaita cidima, vandhu vakatanga kujiruma rurimi ngo kuhwajihwa.
11 Asi ivona vakatuka Mwari wo kudenga ngo ndava yo kuhwajihwa kwavo no zvivonje zvavo, ivona avazivi kukhauya pa mabasa avo.
12 Yocitandhatu, yakadururira cibasiya cayo ku murambo mukuru Eufrate, kuti pave no gwanja ro ku majimambo o kumavhazuva kuti afambe ndirona.
13 Ndakavona masoko matatu akafemehwa akashata* aiezana no macehe, aibuda pamuromo po zinyoka, pamuromo po cikara no pamuromo po muporofeti wo kunyepa.
14 Zvokadi, masoko aya, akafemehwa ngo madhimoni, anoita mushamaiso.* Iwona anoenda ku majimambo o pasi pese, kuti avaunganijire pa hondo yo njiku huru ya Mwari wo Masimba Ese.
15 “Izwanyi! Ndiri kuviya inga mbavha. Anodakara wiya anogara akamuka, ano nguvo jake, kuti atame kufamba mitu, wovonesa zvinopseruja zvake.”
16 Masoko akafemehwa aya,* akaunganija majimambo pa ndau inodanijwa Armagedhoni mu Cihebheru.
17 Ngirozi yocinomwe yakadururira mu mbhepo cibasiya cayo. Kwakazika izwi guru raivha mu ndau yakacenesesa yo cigaro co umambo, reciti: “Zvaitika!”
18 Kwakarazva, ko zika maizwi, kupaja ko mbheni no kuzungunyika ko nyika kukuru kucizivi kuitika kuvhira pa kusikwa ko vandhu pa nyika. Kuzungunyika ko nyika uku, kwakaguma ku ndau jakawanda, kokura.
19 Dhorobha guru rakamweka kuita mativi matatu, madhorobha o majinja akawa; Mwari wakaceuja Bhabhironi Guru, kuti aripe kopo yo vhinyu yakazara ngo ushungu hwake.
20 Cimwenizve, zvirundhu zvese zvakatiza, matundhu akangara-ngara.
21 Perapo, mapuwe makuru o nvura, buwe rimwe na rimwe recirema mutengo unokwana kuita tarenta* imwe, akawira vandhu ecivha kudenga. Vandhu vakatuka Mwari ngo ndava yo dambujiko ro mapuwe, ngokuti dambujiko iri, raikura maningi.
Masoko o Pasi
^ Vonanyi Kudurujihwa ko Magama.
^ Gama ngo Gama: “mujimu yakashata.”
^ Gama ngo Gama: “Zvitatijo.”
^ Kana: “mujimu yakashata.”
^ Tarenta rimwe ro Cigiriki rairema kiro jinokwana 20,4.
