Apokaripsi 11:1-19
11 Ndakapuwa njanga yakaezana no mushakwe, pandaivhunjwa kuti: “Mukai uende koopima ndau yakacena yo themberi ya Mwari, no artari pomwe no vari kunamatemo.
2 Asi ruvanje huri kunja ko ndau yakacena yo themberi, husiyei. Ucahupima, ngokuti hwakapuwa vo majinja. Ivona vanozocika dhorobha rakacena ko makumarongomuna o mweji no mweji muviri.
3 Ndinozoita kuti zvapupu zvangu zviviri zviporofite pa njiku jinokwana kuita ciuru mazana maviri no makumatandhatu,* zvakasimira saku.”
4 Zvapupu zviviri izvi zvinoimiririhwa ngo muti muviri jo maorivhe no zvigajikiro zviviri zvo zvibani* zvakaima pamberi pa Mambo wo nyika.
5 Kudari aripo anoda kuzvikhuvaza, pa muromo pazvo panobuda muriro wopisa vavengi vazvo. Kudari aripo anoda kuzvikhuvaza, anozourawa ngo njira yondhoyo.
6 Izvona zvino simba ro kufunga kudenga, kuti nvura itame kuna pa njiku jazvinonga zveciporofita. Izvona zvino simba ro kucinja kumwa kuti iite ngazi, kuti zvikhuvaze nyika mu mutengo wa zvinoda ngo mushovo wese wo matambujiko.
7 Zvapupu zviviri zviya pazvinozopeja kuita ucapupu hwazvo, cikara cinovhaya mu rindi rakajikisisa cinozoita hondo na izvona, cozozviwina no kuzviuraya.
8 Mutembo yazvo inozodihwa mu makwanja makuru o dhorobha guru, mu njira yo kumujimu, dhorobha iri rinodanijwa kuti Sodhoma no Ejipita, kwakafira Mambo wavo pa mutanda.
9 Vandhu ava no mavhumbo no ndimi no majinja, vanozosota mutembo javo pa njiku ndhatu no meya, ivona avazotenderi kuti mutembo javo jivigwe mu guva.
10 Vagari vo pasi pano vanozodakara no kuita mabuso, ivona vanozotumirana zvipo ngokuti vaporofita vaviri ava vakatambuja vagari vo pasi pano.
11 Pasure po njiku ndhatu no meya, ivona vakanghwinwa ngo mujimu wo upenyu unovha ka Mwari, voima ngo soka javo. Vandhu vakazvivona, vakathya maningi.
12 Ivona vakazwa izwi guru raivha kudenga recivavhunja kuti: “Khwiranyi kuno.” Ivona vakakhwira kwenda kudenga, mu makwiti, vavengi vavo vakavavona.
13 Pa nguva yondhoyo kwakaitika kuzungunyika kukuru ko nyika, divi doko* ro dhorobha rakawa, zviuru zvinomwe* zvo vandhu zvakauraiwa ngo kuzungunyika ko nyika, vakasararo vakathya maningi vokuja Mwari wo kudenga.
14 Dambujiko rocipiri rapera. Bhasopanyi! Dambujiko rocitatu riri kuza ngo kukasika.
15 Ngirozi yocinomwe yakarija mbhayapaya yayo. Kwakazika maizwi makuru kudenga, eciti: “Umambo hwo nyika hwaita Umambo hwa Mambo wedu no hwa Kristu wake. Iyena anozotonga inga mambo mbhera narini, kwenda no kwenda.”
16 Makumaviri o vakuru no vakuru varongomuna vaigara pamberi pa Mwari pa zvigaro zvavo, vakagwadama pasi vonamata Mwari,
17 veciti: “Tinomubonga Jehovha* Mwari wo Simba Rese, wiya aripo, waingepo, ngokuti makashandisa simba renyu, motanga kutonga inga mambo.
18 Asi majinja akanyangajwa, ushungu hwenyu hwakaza, nguva yakagajwa yakaguma yo kutonga vakafa no kupfupa varanda venyu, vaporofeti, vakasanwa, vaya vanothya zina renyu, vadoko no vakuru no kuparaja vaya vanophwanya-phwanya nyika.”
19 Ndau yakacena yo themberi ya Mwari kudenga yakafununguhwa, bhokiso ro citenderano rakavoneka mu ndau yakacena yo themberi yake. Kwakarazva, kozika maizwi, mbheni yakapaja, kwakaitika kuzungunyika ko nyika, kona nvura yo mapuwe makuru.
