Apokaripsi 10:1-11
10 Ndakavona ngirozi imweni yakavanga yecibzuka kuvha kudenga, yakasimira* gore. Mu musoro mayo mainga no uta hwahumbe.* Kumeso kwayo kwaitojana no zuva. Murenje jayo jaitojana no murazvu wo muriro.
2 Iyona yainga no cimuphukutu cakafununguka mu nyara jayo. Murenje wayo wo ku mukono muho waicika mu jombe, murenje wayo wo ku mukono boshwe waicika pasi.
3 Iyona yakakhuwa* inga kubhonga ko mbhondoro. Payakakhuwa,* maizwi o mbheni nomwe akavereketa.
4 Mbheni nomwe pajaivereketa ndainga ndoda kuzvitara, asi ndakazwa izwi recivha kudenga reciti: “Fisai zviro zviri kubhuiwaro ngo mbheni nomwe, ucazvitara.”
5 Ngirozi yandakavonaya yakacika mu jombe no pasi, yakamusa kudenga mukono muho wayo.
6 Iyona yakapika ngo zina ra Wiya anopona mbhera narini, kwenda no kwenda, wakasika kudenga no zviro zviriyo, pasi pano no zviro zviripo, mu jombe no zviro zvirimo, yeciti: “Apacina nguva yo kuimira.
7 Asi ngirozi yocinomwe painozoda kurija mbhayapaya yavo, cakafisika ca Mwari caakazivisa inga masoko akanaka ku vashandiri vake, vaporofeti, cinozokwanirisikadi.”
8 Ndakazwa izwi recivha kudenga recibhuyazve na inini, reciti: “Endai kotora muphukutu wakafununguka wakabathwaro ngo ngirozi yakaimaro mu jombe no pasi.”
9 Inini ndakaenda ku ngirozi iya ndoivhunja kuti indipe cimuphukutu ciya. Iyona yakandivhunja kuti: “Citorei ucihe, icona cinozovava mu ndani mako, asi pa muromo pako cinozotapira inga uci.”
10 Inini ndakacitora mu nyara yo ngirozi iya, ndociha. Icona caitapira inga uci mukanwa mangu, asi pandakacimija mu ndani mangu makavava.
11 Inini ndakavhunjwa kuti: “Unodikana kuporofitazve ngo pamusoro po vandhu no majinja no ndimi pomwe no majimambo mazinji.”
