2 Vatesaronika 2:1-17
2 Ngo kudaro hama, ngo pamusoro po kuvepo ka Mambo wedu Jesu Kristu no kuunganijwa kwatinozoitwa naye, tinomukumbira
2 kuti mucakasika kuruza murangariro wenyu wakanaka ngo kuthyiswa ngo masoko akafemehwa* kana ngo masoko anobhuiwa, kana ngo karata jinovoneka inga kuti jiri kuvha kwatiri, jecinanga kuti njiku ya Jehovha* yaguma.
3 Pacadowanika mundhu anomucengeja ngo njira iri yese, ngokuti njiku iyi aizoviyi ucengejeri hucito hwaviya no kuvoneswa ko mundhu acikazwiri mutemo, mwana wo kuparajwa.
4 Iyena anohwisana ecijikuja panyezuru po zviro zvese zvinojiita mwari kana ciro cinonamathwa, kuti agare mu themberi ya Mwari, ecijivonesa pambhene kuva mwari.
5 Makanganwa kuti pandainga na imwimwi ndaimuvhunja zviro izvi here?
6 Wari imwimwi munozviziva zviri kumuphinga, kuti azovoneswe pa nguva kwayo.
7 Ndizvona kuti kutama kuzwira mutemo uku kuri kuitika ngo njira yakafisika, asi kunozobuda pambhene kudari wiya ari kuzvinyanyisa, akazotama kuvepo.
8 Zvokadi, mundhu wokutama kuzwira mutemo uwu anozovoneswa. Iyena anozoparajwa ndi Mambo Jesu ngo simba rinovha pa muromo wake no kuzopejwa ngo kuvoneswa ko kuvepo kwake.
9 Asi kuvepo ko mundhu acikazwiri mutemo, ndi Sathana ari kuita mabasa o simba no zvitatijo pamwepo no mushamaiso jo kunyepa
10 ecishandisa mushovo wese wokucengejera kucizivi kururama ku vaya vanozopera inga kuhwirijihwa kwavo, ngokuti avazivi kutendera rudo hwo cokwadi kuti vaponeswe.
11 Ngo zvinoitisa kuti Mwari avaregere vecicengejwa kuti vatendere manyepo,
12 kuti vese vatongwe ngokuti avazivi kutenda cokwadi, perapo vodakarira zvicizivi kururama.
13 Asi hama jinodiwa ndi Jehovha,* tinodikana kubonga Mwari mukuvo wese ngo ndava yenyu, ngokuti Mwari wakamusana kuti muponeswe kuvhira pakutanga ngo kumucenesa ngo mujimu mucena wake no kutenda kwamunoita cokwadi.
14 Iyena wakamudanijira zvondhozvo ngo masoko akanaka atinotokotesa, kuti muwane rukujo hwa Mambo wedu Jesu Kristu.
15 Ngo kudaro hama, ivanyi makavanga, mobatisisa zvirovejeso zvamakajijiswa. Zvingaita kuti makazvijijiswa ngo masoko akabhuiwa kana ngo karata yakavha kwatiri.
16 Kusiyapo izvo, Mambo wedu Jesu Kristu na Mwari Baba wedu wakatidaya wotitondhoja kwenda no kwenda ngo vetero yakanaka ecishandisa unyasha hucikaezaniswi,
17 ngaatondhoje mwoyo yenyu, womuvangisa pa mabasa enyu ese no masoko akanaka.
Masoko o Pasi
^ Vonanyi Kudurujihwa ko Magama , pa gama rinoti “Mujimu.”
^ Vonanyi Kudurujihwa ko Magama .
^ Vonanyi Kudurujihwa ko Magama .
