2 Vakorinte 7:1-16
7 Ngo kudaro hama jangu, zvecivoneka kuti tino zvigondiso izvi, ngatijicenese pa zviro zvese zvinosvipisa muviri no mujimu, teciengejera kuva takacena, tecithya Mwari
2 Tiashirenyi. Atizivi kushaishira mundhu, atizivi kukhuvaza mundhu, atizivi kucengeja mundhu kuti tibesereke.
3 Andiripi kunanga izvi kuti ndimutonge. Ngokuti ndakamuvhunja kare kuti muri mu mwoyo jedu, kuti tife tese no kurarama* tese.
4 Ndinobhuya ndakasujunuka na imwimwi. Ndinozvikuja maningi ngo ndava yenyu. Ndatondhojwa maningi; mudakaro wangu wakakura maningi ngo ndava yo matambujiko edu.
5 Zvokadi, patakaguma Masedhoniya, atizivi* kuzorora, takaenderera mberi tecitambujika mu mativi ese; ngo kunja kwainga no hondo, ngo mukati taithya.
6 Asi Mwari, anonyaraja vakasuruvara, wakatinyaraja ngo kuguma kwa Tito;
7 atinyarajwi ngo kuguma kwake basi, asi tinonyarajwa ngo nyarajo yaakaashira yecivha kwamuri. Iyena wakandiverengera cido cenyu co kuza kuzondivona, wondiverengera kucema kwenyu no rudo hwamunahwo kwandiri. Inini ndakadakara maningi.
8 Pikija ndakamucamwisa pa karata yangu, inini andizvidembi ndizvona. Pikija pa kutanga ndakambozvidemba (pandakavona kuti karata yakamunyangajisa pa nguva doko),
9 wari ndakadakara, asi andiripi kudakara ngokuti ndakamucamwisa, asi ndakadakara ngokuti kucamwa kwenyu kwakamuita kuti mukhauye. Imwimwi makacamwiswa mu kuzwirana no kuda ka Mwari, ngokuti imwimwi amuzivi kukhuvazwa ngo ndava yedu.
10 Ngokuti kucamwa mu kuzwirana no kuda ka Mwari, kunobara kukhauya kunoendesa mu kuponeswa. Akuna anozvidemba ngo kucamwa kwakadari. Asi kucamwa mu kuzwirana no nyika, kunobara rufu.
11 Vonanyi zvabahwa ngo kusuruvara kwenyu mu kuzwirana no kuda ka Mwari: Zvamuita kuti mujicenese, musuruvare, muthye, mude ngo mwoyo wese, muvangisire, munasirire zviro zvakashata! Imwimwi makatatija mu mativi ese kuti makacena mu shwiro iyi.
12 Pikija ndakamutarira, andizivi kumutarira ngo ndava yo mundhu wakashaisha, nee ngo ndava yo mundhu wakashaishihwaro. Asi ndakamutarira kuti cido cenyu co kutizwira ngo mwoyo wese cibude pambhene pakati penyu mu mavonero a Mwari.
13 Ndizvona zvakatitondhoja.
Kusiyapo kutondhojwa kotakaithwa, takadakara maningi ngo kudakara kwa Tito ngokuti makamutondhoja.
14 Kudari ndakabhuya naye ngo pamusoro penyu ndecijikuja, andizivi kupseruka; zvecivoneka kuti zvese zvotakamuvhunja zvainga zvokadi, zvovonesavo kuti zvotakavhunjaya Tito tecijikuja, ndizvona.
15 Kusiyapo izvo, mazwiro ake ngo pamusoro penyu ari kuengejeka ngo ndava yo kuzwira kwenyu, maashirire amakamuita ngo kuthya no kutetemera.
16 Ndinodakara ngokuti ndinomuthemba pa zviro zvese.
