1 Vakorinte 6:1-20
6 Kudari ari wese wenyu ano ndava no mudoni wake, ngenyi munoendesana ku dare rokutonga kusiyapo kwenda naye ku vandhu va Mwari?
2 Amuzvizivi here kuti vandhu va Mwari ndivona vanozotonga? Kudari muri imwimwi munozotonga nyika, ngenyi amukwanisi kutonga shwiro jakadari?
3 Amuzvizivi kuti tinozotonga ngirozi kani? Waro ngenyi munoregera kutonga shwiro jo upenyu huno?
4 Kudari imwimwi muno shwiro jo upenyu huno jinoda kutongwa, waro ngenyi munosana vandhu vacikatendehwi ngo ungano kuti vajitonge?
5 Ndiri kubhuya izvi kuti ndimupseruje. Pakati penyu apana mundhu ano uzivi kuti atonge hama jake here?
6 Kusiyapo izvo, ngenyi hama inoendesa hama yayo ku dare ro kutonga, pamberi po vandhu vacikatendi?
7 Zvokadi, mukaendesana ku utongi ngocenyu, munonga manyiswa. Azvicaingepi zviri nane kutendera kuitihwa zvakashata here? Azvicaingepi zviri nane kutendera kuruza here?
8 Mukusiyana, imwimwi munoita zvicizivi kururama, mokhuvazana ngocenyu!
9 Amuzvizivi kuti vandhu vacizivi kururama avazogari utaka mu Umambo hwa Mwari? Mucacengejwa. Vandhu vanoita uhure,* vanonamata zvithombi, vanoita upombo, vanarume vanotendera kuvathwa ngo vanarume, vanarume vanovatana no vanarume,
10 vanoba, vanokara, vanodhakwa, vanotuka no vandhu vanocengeja vamweni kuti vavatorere zviro zvavo, avazogari utaka mu Umambo hwa Mwari.
11 Vamweni venyu vaingavo vakadaro. Asi imwimwi makasukwa, makaceneswa, movoniwa kuva varurami ngo zina ra Mambo Jesu Kristu no mujimu wa Mwari wedu.
12 Ndinotendehwa zviro zvese, asi asipi zviro zvese zvinondibesera. Ndinotendehwa zviro zvese, asi anditenderi kuitwa muranda ngo ciro ciri cese.
13 Zvokuha ngo zvomundani, ndani ngo yozvokuha, asi Mwari anozoparaja zvese zvo zviviri. Muviri auzivi kuitihwa uhure,* asi wakaitihwa Mambo. Mune wo muviri ndiyena Mambo.
14 Mwari wakamusa Mambo, iyena anozotimusavo mu rufu ecishandisa simba rake.
15 Amuzvizivi kuti muviri yenyu ndiyona mativi a Kristu kani? Zvinoita here inini kuvhisa mativi a Kristu ndomabatanija pa mundhu anoita upombo? Azviiti!
16 Amuzvizivi kuti wiya anobatana no mundhu anoita upombo anova muviri umwe no mwanakaji wo upombowo? Ngokuti iyena wakati: “Vovaviri vanozova nyama imwe.”
17 Wiya wakabatana na Mambo anoita umwe naiyena mu mujimu.
18 Tizanyi uhure.* Cishaishi cese cinoitwa ngo mundhu, acisvipisi muviri wake. Asi wiya anoita uhure ari kushaishira muviri wake.
19 Amuzvizivi kuti muviri wenyu ndiwona themberi yo mujimu mucena uri mukati mwenyu, womakapuwa ndi Mwari? Imwimwi amuripi veno venyu pacenyu,
20 ngokuti imwimwi makatengwa ngo mutengo mukuru. Ngo kudaro, kujanyi Mwari mu muviri yenyu.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
