1 Vakorinte 3:1-23
3 Ngo kudaro hama, andizivi kukwanisa kubhuya na imwimwi inga vandhu vanotungamirihwa ngo mujimu wa Mwari, asi ndakabhuya na imwimwi inga vandhu vo kunyama, inga kuti ndaibhuya no vana vadoko mu gwanja ra Kristu.
2 Inini ndakamupa mukaka,* kuciripi zvokuha zvakavanga, ngokuti mainga mucito manasa kuvanga. Pikija wari uno, amuto manasa kuvanga,
3 ngokuti muciri vo nyama. Zvecivoneka kuti pakati penyu pano ushanje no kupopana, ndizvona zvinotatija kuti muri vandhu vo kunyama meciita kuda ko vandhu vo nyika ino.
4 Ngokuti pamunonanga kudari: “Inini ndiri wa Pauro,” asi umweni wonanga kuti: “Inini ndiri wa Aporo,” amuripi kuita zvinoitwa ngo vandhu vo nyika ino?
5 Waro Aporo ndiyani? Pauro ndiyani? Ivona vashandiri vakamuita kuti muve vatendi, mukuzwirana no zvakapuwa umwe na umwe ndi Mambo.
6 Inini ndakasima, Aporo wakadirijira, asi wairebesa ndi Mwari.
7 Ngo kudaro, anosima no anodirijira avaripi ciri cese, asi Mwari ndiyena anokurisa.
8 Mundhu anosima no mundhu anodirijira, vese vano cinangwa cimwe, asi mundhu umwe na umwe anozoashira mupfupo wake mukuzwirana no basa rake.
9 Ngokuti itusu tinoshanda pamwepo na Mwari. Imwimwi muri munda wa Mwari uri kurimwa. Murizve nyumba ya Mwari iri kuvakwa.
10 Mukuzwirana no unyasha hucikaezaniswi hwa Mwari hwandakapuwa, ndakadira njiki inga muvaki waushoni, asi mundhu umwenivo ari kuvaka panyezuru payo. Asi umwe na umwe ngaangwarire mavakire aari kuita panyezuru po njiki iyi.
11 Ngokuti akuna mundhu umweni angacira njiki imweni kuciripi yakacihwaya kare. Njiki iyi, ndi Jesu Kristu.
12 Kudari mundhu akavaka panyezuru po njiki iyi ngo goridhi, sirivha, mapuwe o mutengo mukuru, matabwa kana ngo maushwa,
13 basa ra umwe na umwe rinozokhombijwa zvariri, ngokuti njiku yakona inozoritatija ngo muriro. Murirowo unozotatija mavakire aakaita umwe na umwe.
14 Mundhu anozoashira mupfupo wake kudari zvaakavaka zvikasara;
15 kudari zvakavakwa ngo ari wese zvikapsa, mune wazvo anozoruza, asi iyena anozopona. Zvikadaro, zvinozoita inga kuti wapona kuvha pa muriro.
16 Amuzvizivi kuti imwimwi muri themberi ya Mwari? Imwimwi amuzvizivi kuti mujimu wa Mwari unogara mukati mwenyu?
17 Kudari ari wese akaparaja themberi ya Mwari, Mwari anozomuparajavo ngokuti themberi yake yakacena. Themberi yakona ndimwi.
18 Mucajicengeja: Kudari ari wese pakati penyu akarangarira kuti wakangwara maningi mu nyika* ino, ngaaite rethe, kuti azove no ungwaru.
19 Ngokuti uzivi hwo nyika ino, urethe kuna Mwari, ngokuti zvakatahwa kuti: “Iyena anobata vazivi ngo ungwaru hwavo.”
20 Zvotahwazve kuti: “Jehovha* anoziva kuti murangariro jo vandhu vakangwara ajibeseri.”
21 Mucajikuja ngo pamusoro po vandhu; ngokuti zviro zvese ngozvenyu,
22 pikija Pauro, Aporo, Khefasi, nyika, upenyu, rufu, zviro zvawari, kana kuti zviro zvinozoviya, zvese ngozvenyu;
23 imwimwivo muri vandhu va Kristu, Kristu nghwa Mwari.
