1 Timoti 6:1-21
6 Vaya vari pasi po kanga yo uranda ngavavone kuti majipatarau avo anofanera kureremejwa, kuti jijiso ja Mwari no zina rake ritame kushohwa.
2 Kusiyapo izvo, vaya vanoshandira majipatarau anotenda avadikani kuvarerusa ngo kuva kwavo hama. Asi vanodikana kuvashandira ngo mwoyo wese, ngo kuti basa ravo rakanaka, rinobesera vatendi doni vavo vanodiwa.
Endererai mberi wecijijisa no kupangira zviro izvi.
3 Kudari mundhu akajijisa jijiso imweni, acikatendi jijiso yakacena,* inovha kuna Mambo wedu Jesu Kristu, no acikatendi jijiso inozwirana no kujipira kuna Mwari,
4 mundhuwo wakazara ngo kujikuja, apana caanozwisisa. Iyena wakaitwa bofu ngo kuda kuvereketesana no kuhwisana ngo pamusoro po magama. Zviro izvi zvinobara cishatihwa, kuita mapope, magumbu,* kurangarijira zvakashata ku vamweni,
5 kuvereketesana kucikaperi ngo ciro cidoko ko vandhu vano murangariro wakavora no vacina cokwadi, vanorangarira kuti kujipira kuna Mwari i njira yo kuwana upfumi.
6 Zvokadi, kujipira kuna Mwari kunopa upfumi no mudakaro.*
7 Itusu atizivi kuviya no ciro mu nyika, atizopindizve no ciro.
8 Ngo kudaro, tinozodakara ngo kuwana zvokuha no zvokusimira.
9 Asi vaya vanocunga kupsanga uthende vanowira mu muejo no mu murau, no kuemura zvabiresi no zvinokhuvaza, izvi zvinoitisa kuti ivona vatambujike no kufa.
10 Ngokuti kudisisa mare ndiwona muji wo mushovo wese wo zviro zvakashata, vamweni vakapsaka kuteverera rudo uhu, rutendo hwavo hwakapera, vojiviisira matambujiko mazinji.
11 Asi iwewe, mundhu wa Mwari, tizai zviro izvi. Asi psakai ururami, kujipira kuna Mwari, rutendo, rudo, kucungirira no kupfava.
12 Ihwai hondo yakanaka yo rutendo; batisisai upenyu hucikaperi, hwawakadanijihwa wonasa kuubhuya pambhene, pamberi po zvapupu zvizinji.
13 Ndinokuvhunja pamberi pa Mwari, anoita kuti zviro zvese zvirambe zvecipona, na Kristu Jesu, wiya wakaita ucapupu hwakanaka pamberi pa Ponsiyo Pirato
14 kuti uteveje mutemo mu njira yakacena no kutama kupumbhwa mbhera pa kujivonesa kwa Mambo wedu Jesu Kristu,
15 kujivonesa uku kunozotatijwa pa nguva yakagajwa ndi Mambo umwe basi Ano Simba, wakadakara. Iyena ndi Mambo wo majimambo no Mutongi wo vatongi,
16 ndiyena basi acingafi, anogara mu ruvheneko hucikakhwederereki. Apana wakambomuvona kana anokwanisa kumuvona. Ngaakujwe no kupuwa simba ricikaperi. Ameni.
17 Vhunjai vakhupuki* vo nyika* ino kuti vatame kujikuja, vatame kugonda upfumi hunopera asi ngavathembe Mwari anotipa zvese zvinotiita kuti tidakare.
18 Vavhunjei kuti vaite zvakanaka, vakhupuke ngo mabasa akanaka, vaite vanokova, vano cido cokukovana,
19 vakaita izvi, vanozojiunganijira upfumi hunovha kuna Mwari kuti vave no kumbeji kwakangwaririka, kuti vabatisise upenyu hwokadi.
20 Timoti, ngwarirai zvawakapuwa, wecitiza mabhuyo acina shwiro anotuka Mwari, no murangariro jinophiphana jo “zivo” yo kunyepa.
21 Rutendo hwo vamweni hwakapera ngo ndava yo kuda kuvonesa uzivi uhu.
Unyasha hucikaezaniswi ngahuve na imwimwi.
Masoko o Pasi
^ Kana: “inobesera.”
^ Kana: “magumba; kutuka.”
^ Gama ngo Gama: “no kujizwa kuti tino zvakakwana.”
^ Kana: “vakaganya.”
^ Vonanyi Kudurujihwa ko Magama.
