1 Timoti 5:1-25
5 Ucapangira musharuka ngo hasha. Asi mupangirei ngo mwoyo wakapfava inga baba, ku majaha inga vanukuna,
2 ku vanakaji vakura inga majimai, ku vasikane inga hambzaji jako, no uceni hwese.
3 Reremejai noni jiri noni kamare.*
4 Asi kudari kuno noni jino vana kana vazukuru, ava ndivona vanodikana kujijira kusapota vo paukama hwavo vecikhombija kuti ivona vakajipira kuna Mwari, veciita zvakanaka ku vabari no ku majicekuru pamwepo no majimbiya avo, ngokuti ndizvona zvinodakajisa Mwari.
5 Noni iri noni kamare icina anoikorondha, iyona inogonda Mwari basi no kuramba yeciita mukumbiro yecideketera usiku no masikati.
6 Asi noni inoda zvinodakajisa muviri basi, kunyange yecirarama,* yakafa.
7 Ngo kudaro rambai wecipa mupango iji, kuti jive jicina zvajinopumbhwa.
8 Zvokadi, ari wese acikapi zvinodiwa ngo vandhu vake, maningi-ningi vo pa muzi pake, anoramba rutendo, iyena wakashata maningi kupinda mundhu acina rutendo.
9 Mwanakaji anodikana kudihwa pa cikwata co noni, nga wiya ano makore o kubahwa aciripi pasi po makumatandhatu, wainga akagondeka ku mwamuna wake,*
10 anozivika ngo mabasa ake akanaka, akadari inga kurera vana, kuashira varendo, kusambija soka jo vatendi doni, kubesa vanoneseka no kuita mufumbo wese wo mabasa akanaka.
11 Asi, ucadira noni jiciri vasikane pa cikwata ici, ngokuti pajinozoda kurovohwa ijona jinozosiya Kristu joenda korovohwa.
12 Ijona jinojiviisira kutongwa ngo ndava yo kusiya rutendo hwajo hwo pakutanga.*
13 Pa nguva yondhoyo, vanonyanya kugara vacina cokuita, vecifamba mu mamuzi; avatami cokuita basi, asi vanoita magumbu* no kunghwinira mu shwiro jo vamweni, vecibhuya zviro zvovacaidikana kubhuya.
14 Ngo kudaro, ndinoda kuti noni jiciri vasikane jirovohwe, jibare vana, jikorondhe muzi, kuti jitame kupa muvengi ndava yo kushora.
15 Zvokadi, noni jimweni jakapauka jotevera Sathana.
16 Kudari kuno mwanakaji ari wese ari mutendi ano noni mu ukama hwake, ngaajibese kuti ungano itame kuremehwa. Ngo kudaro ungano inozobesera noni jiri noni kamare.*
17 Vakuru vo ungano vanonasa kutungamirira ushoni, ngavavoniwe inga hama jinofaneya kupuwa nderemejo yakapetwa ruviri, maningi-ningi vayani vanoshanda ngo simba pa kuvereketa ngo pamusoro po soko ra Mwari no kujijisa.
18 Ngokuti Matahwa anoti: “Ucadofunga muromo wo n’gombe painonga yecipura mbeu,” no “mushandi anotendehwa kuashira mupocero wake.”
19 Ucatenda kupumbhwa ko dhodha* pacina ucapupu hwo vandhu vaviri kana vatatu.
20 Pangirai vanoita cishaishi pamberi po vandhu vese, kuti zvingwajevo vamweni.*
21 Ndinokukumbira pamberi pa Mwari na Kristu Jesu no ngirozi jakasanwa, kuti uteveje mupango uwu ucikaiti ciricese ngo mukheto kana ngo kusana mundhu.
22 Ucakasika kucanjika nyara jako pa musoro po mundhu;* ucanghwinira mu zvishaishi zvo vandhu vamweni; rambai wakacena.
23 Ucamwazve kumwa basi, asi imwaivo padoko vhinyu ngo ndava yo mundani mako ngo kugara kwako wecihwaja-hwaja.
24 Zvishaishi zvo vandhu vamweni zvinozivika ngo vese, zvovaita kuti vatongwe kamare, asi zvishaishi zvo vamweni zvinozozivika pa kufamba ko nguva.
25 Ndizvona zvondhozvo, mabasa akanaka anozivika ngo vese, pikija acikaziviki, aazorambi akafisika.
Masoko o Pasi
^ Kana: “noni jiri pa utami”; kana kuti, noni jicina mundhu anojisapota.
^ Kana: “yecipona.”
^ Gama ngo Gama: “wainga no mwamuna umwe.”
^ Kana: “kusiya mbhiko yajo yo kare.”
^ Kana: “magumba.”
^ Kana: “noni jiri pa utami”; kana kuti, noni jicina mundhu anojisapota.
^ Kana: “mukuru wo ungano.”
^ Gama ngo Gama: “kuti vamweni vathye.”
^ Kana kuti: ucakasika kugaja mundhu.
