Johani 5:1-47
5 Sure kwazvo, kwakava no mutambo wo Vajudha. Ngo kudaro, Jesu wakaenda ku Jerusarema.
2 Mu Jerusarema, mainga muno gandhwa rinodanijwa kuti Bhetizata ngo Cihebheru. Gandhwa iri rainga no maperere mashanu ngo phedo no Musuvo wo Mavhuta.
3 Pa ndau iyi, painga no vatenda vakawanda vainga vakavata, vakadari inga mapofu, vanothobinya, no vandhu vese vainga vakaremara.*
4 *—-—
5 Painga no mwanarume wakapeja makumatatu o makore no makore masere ecihwaja.
6 Ecivona mwanarume uwu wakavata pondhopo, no kuziva kuti wainga aano makore akawanda ecihwaja, Jesu wakamuvhunjisa kuti: “Unoda kurapwa?”
7 Mwanarume wiya wakamudavira kuti: “Andina mundhu anondinghwinisa mu gandhwa kumwa yecivhunduhwa. Mukuvo wa ndinoda kukhwedera, umweni anotungamira kunghwina.”
8 Jesu wakamuvhunja kuti: “Mukai! Torai bonde rako ufambe.”
9 Mwanarume uwu wakavanga ngo kukasika, wobata bonde rake, wotanga kufamba.
Njiku iyi yainga Sabudu.
10 Ngo kudaro, Vajudha vakatanga kuvhunja mwanarume uwu kuti: “Nyamasi i Sabudu, autendehwi kuti uthware bonde.”
11 Iyena wakavadavira kuti: “Mwanarume wandiraparo, ndiyena wandivhunja kuti: ‘Torai bonde rako ufambe.’”
12 Ivona vakamuvhunjisa kuti: “Ndiyani wakuvhunjaro kuti: ‘Torai bonde rako ufambe’?”
13 Asi mwanarumewo aacaimuzivepi kuti wainga arapwa ndiyani, ngokuti Jesu wainga abuda pakati po mbungano yaingepo.
14 Pasure pazvo, Jesu wakamuvona ari mu themberi, womuvhunja kuti: “Wari iwewe wavanga. Ucaitazve cishaishi kuti utame kusongana no zvinopinda izvi.”
15 Mwanarume uwu wakaenda kovhunja Vajudha kuti wainga arapwa ndi Jesu.
16 Ngo ndava yazvo, Vajudha vakazonda Jesu ngo thangwe ro kuita zviro izvi ngo Sabudu.
17 Iyena wakavapingura kuti: “Baba wangu vaciri kushanda mbhera na wari, na ininivo, ndinoenderera mberi ndecishanda.”
18 Ndizvona zvinoitisa kuti Vajudha vapsange kuuraya Jesu, ngokuti waiphwanya Sabudu no kudanija Mwari kuti ndi Baba wake, wojiita inga wakaezana na Mwari.
19 Jesu wakavavhunja kuti: “Ndinomuvhunja zvokadi kuti: Mwana apana caanotanga kurangarira ega kuti aite, acingavoni ceciithwa ndi Baba wake. Zvese zvinoithwa ndi Baba, ngo zvinoithwavo ngo Mwana.
20 Baba vano rudo no Mwana wavo. Ivona vanomutatija zvese zvavanoita. Vanozomutatija mabasa makuru kupinda aya, kuti imwimwi mukahamare.
21 Zvecivoneka kuti Baba vanomusa vandhu vakafa nokuvapekeja upenyu, ngo njira yondhoyo, Mwana anopavo upenyu ku mundhu waanoda.
22 Baba avatongi mundhu ariwese, asi utongi hwese vakahupekeja Mwana,
23 kuti vandhu vese vakuje Mwana inga makujire avanoita Baba. Mundhu acikakuji Mwana, aakuji Baba vakamutuma.
24 Ndinomuvhunja zvokadi kuti: Mundhu wese anozwa masoko angu no kutenda wiya wakandituma, ano upenyu hucikaperi. Iyena aazotongwi, asi wavha pa rufu kwenda kuupenyu.
25 “Ndinomuvhunja zvokadi kuti, inozoguma nguva. Wari yatoguma nguva yokuti vakafa vanozozwa izwi ro Mwana wa Mwari. Vaya vanonasa kupurutana, vanozorarama.*
26 Inga ndi Baba vano cipo co upenyu pacavo, ivona vakapavo Mwana cipo cokuva no upenyu pacake.
27 Ivona vakamupa simba ro kutonga, ngokuti ndiyena Mwana wo mundhu.
28 Mucakahamara nga izvi, ngokuti inozoguma nguva yokuti vese vari mu makuva anoceukijwa, vanozozwa izwi rake
29 vobuda. Vese vakaita zviro zvakanaka vanozomuswa kuti vaende ku upenyu, asi vaya vakaita zviro zvakashata vanozomuswa kuti vaende kootongwa.
30 Apana candinotanga kurangarira ndega kuti ndiite. Ndinotonga mukuzwirana no zvandakavhunjwa ndi baba wangu, matongero angu akarurama, ngokuti andipsaki kuda kwangu, asi ndinopsaka kuita zvinoda wiya wakandituma.
31 “Kudari ndikajiitira ndega ucapupu, ucapupu hwangu ahuzovi hwocokwadi.
32 Kuno mundhu umweni anondiitira ucapupu. Inini ndinozviziva kuti ucapupu hwaanondiitira ngo hwocokwadi.
33 Imwimwi makatumira vandhu kuti vaende ka Johani, iyena wakaita ucapupu hwocokwadi ngo pamusoro pangu.
34 Asi andiashiri ucapupu hunoithwa ngo vandhu, asi ndananga zviro izvi kuti muponeswe.
35 Mundhu uwu wainga ruvheneko hwaibwaka no kumonikira, imwimwi maida kudakara pa mukuvo mushoma ngo ruvheneko hwake.
36 Asi inini ndino ucapupu hwakakura kupinda hwa Johani, ngokuti mabasa andakagajwa kuita ndi Baba wangu, andiri kuitari, anoita ucapupu hwokuti Baba vakandituma.
37 Baba vakanditumari vakaita ucapupu ngo pamusoro pangu. Imwimwi amuzivi kuzwa izwi ravo pa nguva iri yese nokuti kuvona mugariro wovakaita,
38 soko ravo arigari mamuri, ngokuti amutendi wiya wavakatuma.
39 “Imwimwi munopsakisisa Matahwa ngokuti munorangarira kuti munozova no upenyu hucikaperi ngo pamusoro pawo; iwona anoita ucapupu ngo pamusoro pangu.
40 Asi imwimwi amudi kuviya kondiri kuti muwane upenyu.
41 Andidi kukujwa ngo vandhu,
42 asi ndinonasa kuziva kuti imwimwi amudi Mwari.
43 Ndakaviya ngo zina ra Babangu, asi imwimwi amuzivi kundiashira. Kudari ari wese akaviya ngo zina rake, imwimwi mwaizomuashira.
44 Pamunokujana ngocenyu, munohuashira ushoni rukujo uhu. Asi imwimwi amupsaki rukujo hunovha ka Mwari basi, waro mungazonditendesa kudini?
45 Mucarangarira kuti ndinozomupa ndava pamberi pa Baba; ariyo mundhu anozomupa ndava, Mosi, mundhu wamunogondaya.
46 Zvokadi, kudari nomakatenda Mosi, maizonditendavo, ngokuti iyena wakatara ngo pamusoro pangu.
47 Kudari mucikatendi zvaakatara, munozotendesa kudini zvandinonanga?”
Masoko o Pasi
^ Kana: “wakaoma makumbo no mukono.”
^ Vonanyi masoko o pasi ari pana Mateu 17:21.
^ Kana: “vanozopona.”
